12-январда Катарда футбол боюнча Азия чемпионаты башталды. Кыргызстандын курама командасы экинчи жолу Азия Кубогу үчүн ат салышканы турат. Улуттук курама 2019-жылы алгачкы жолу Азия кубогуна чыгып, 1/8 финалга чейин жеткен. Бул кыргыз футбол тарыхындагы эң чоң жетишкендик болгон. “Азаттык” ошол оюндарда кураманын чабуулчусу катары жылдызы жанып, күйөрмандардын назарына түшкөн Виталий Люкс менен маектешти.
Жаза аткаруу кызматы Кыргызстандагы абактарда криминалдык идеологияга каршы иш-чаралар башталганын билдирди. Маалыматка караганда, эми “мыйзамдагы ууру” сыяктуу түшүнүктөрдү жайылтууга бөгөт коюлат. Бирок анын так механизмдери айтылган жок. Маселени ичтен билгендер абактардагы криминалдын таасирин толук жок кылуу үчүн алардын бийликтеги, күч органдарындагы байланыштарын үзүү зарылдыгын белгилешет.
Кыргыз-тажик чек арасындагы айрым талаштуу аймактар боюнча кезектеги мунаса табылганы жарыяланды. Ал арада расмий Бишкек менен Дүйшөмбү мамлекеттик чек ара сызыгы боюнча макулдашууга март айында кол коюшу мүмкүн деген маалыматтар чыкты.