له متقي سره د بریتانیایې چارواکو ناسته: لندن د ښځینه فعالانو په اړه اندېښمن دی

د لوږې د مخنیوي او بشري چارو لپاره د بریتانیا څانګړي استازي نیک دییر او شارژدافير هوګو شارتر پرون په کابل کې له یو شمېر طالب مشرانو سره وکتل. 

د بریتانیا د بهرنیو چارو وزارت په اساس، ښاغلي دییر او په کابل کې د بریتانیا موقت شارژدافير هوګو شارتر د طالبانو د حکومت د بهرنیو چارو له سرپرست وزیر امیرخان متقي سره په کتنه کې د ښځو، نجونو او اقلیتونو په شمول د بشري حقونو او همداراز د ښځو د حقونو له فعالانو سره د چلند په اړه د بریتانیا د حکومت جدي اندېښنه ښکاره کړه.  

له بلې خوا د طالبانو د حکومت د بهرنیو چارو وزارت یو ویاند حافظ ضیا احمد تکل وايي چې بریتانیايي مقاماتو په افغانستان کې له نوي حکومت سره د راغلي بدلون په تړاو وویل چې جنګ ختم شوی، امنیت ټینګ شوی، وضعیت عادي دی، بشري مرستې په ښه ډول رسېږي او تعلیمي مرکزونه خلاص شوي دي. 

د ښاغلي ضیا احمد په وینا، بریتانیايي پلاوي دا هم وویل چې د هېواد صدراعظم یې ورته لارښوونه کړې چې د افغانستان له نوي حکومت سره تعامل زیات کړي او له دې سره به افغانستان ته په بشري مرستو کې زیاتوالی راشي.  

ده همداراز وویل:" یاد پلاوي په افغانستان کې د بهرنیو ډلو د شتون په تړاو یادونه وکړه چي کوم فعالیت ونه لري. د بهرنیو چارو وزیر د دوی د اندېښنو په اړه وویل؛ موږ تعهد کړی چې د افغانستان خاوره به د هېڅ هېواد په زیان نه استعمالیږي او نه هم دلته داسي چاته د فعالیت اجازه ورکوو." 

د طالبانو د بهرنیو چارو وزارت د ویاند په وینا بریتانیايي پلاوي وویل چې له نړیوالو هم غواړي چې د افغانستان د اقتصادي پرمختګ لپاره همکاری وکړي خو د طالبانو له حکومته هم غواړي چې د اقتصادي ودې لپاره پلان جوړ او پانګونې ته فرصتونه برابر کړي.