Որևէ մեկին գեղեցիկ աչքերի համար աջակցություն չեն տրամադրում, պետք է հասկանալ՝ ինչը ինչի դիմաց է․ ընդդիմադիր պատգամավորը՝ Բրյուսելի առաջիկա հանդիպման մասին
Արտաքին աջակցությունն արտաքին քաղաքականության գործիքներից մեկն է և որևէ մեկին գեղեցիկ աչքերի համար աջակցություն չեն տրամադրում։
Այս մասին Tert.am-ի հետ զրույցում ասաց ՀՀ ԱԺ «Հայաստան» խմբակցության պատգամավոր Արթուր Խաչատրյանը՝ անդրադառնալով ՀՀ վարչապետ Նիկոլ Փաշինյանի, Եվրոպական հանձնաժողովի նախագահ Ուրսուլա Ֆոն դեր Լայենի և ԱՄՆ պետքարտուղար Էնթոնի Բլինքենի ապրիլի 5-ին Բրյուսելում կայանալիք հանդիպմանը։
Հարցին՝ իշխանություններն այդ հանդիպումից մեծ ակնկալիքներ ունեն և դա ներկայացնում են, որ տնտեսության համար բում կլինի, Խաչատրյանը հիշեցրեց, որ տնտեսական բումի մասին իշխանությունները խոսում էին դեռևս հինգ տարի առաջ, երբ եվրոպական փողերից 2,5 մլրդ եվրոյի օգնության հարցը կար։
«Տարիներ են անցել, սակայն, կարծեմ, տրամադրվել է միայն կես մլրդը, այն էլ մաս-մաս։ Այսինքն եթե նայենք, ապա այդ աջակցությունը ոչինչ չի փոխել։ Այնպես որ մեկ բում մենք արդեն բաց ենք թողել»,- ասաց նա և հավելեց․
«Մյուս կողմից պետք է հաշվի առնենք, որ արտաքին աջակցությունը դա արտաքին քաղաքականության գործիքներից մեկն է, իսկ որևէ մեկին գեղեցիկ աչքերի համար աջակցություն չեն տրամադրում։ Խոսքը չի վերաբերում մարդասիրական աջակցությանը, խոսքը գնում է լուրջ՝ «բումային» աջակցության մասին։ Այնպես որ այստեղ էականը է հասկանալ ՝ ինչը ինչի դիմաց է»։
Պատգամավորի կարծիքով՝ նախ պետք է հասկանալ՝ ինչ են առաջարկում, ինչ են ակնկալում, դա ինչ հնարավորություններ է ընձեռելու և ինչ ռիսկեր է պարունակելու։
«Ամենամեծ ռիսկը որ մենք այսօր ունենք դա անվտանգային խնդիրն է, իսկ ամսի 5-ի հանդիպման մասին հայտարարված նպատակը Հայաստանի տնտեսության դիմակայության բարձրացումն է, այլ ոչ թե անվտանգային խնդիրը։ Այնպես որ սպասել ինչ-որ մի արագ, կենսական կարևորության ճեղքման, օրինակ, հայտարարության, որ մենք Ադրբեջանի ռազմական ագրեսիայի դեպքում ռազմական պատասխան կտանք, կամ պատրաստ ենք թեկուզ պատժամիջոցներ կիրառել, նման բան ո՛չ այսօր, ո՛չ էլ ամսի 5-ին չենք տեսնի»,- նկատեց նա։
Դիտարկմանը՝ արդյոք այդ հանդիպումը նշանակում է, որ տնտեսական խնդիրերն իշխանության համար ավելի գերակա են, քան անվտանգայինը, նա արձագանքեց․
«Դե ասվում է՝ քննարկվելու է տնտեսական հարց, մնացածը հայտնի կլինի այն ժամանակ, երբ ձեռք բերված համաձայնությունը սեղանին կդնենք, բայց իհարկե, մյուս կողմից էլ իրենք հասկանում են, որ Հայաստանի տնտեսությունը կոլափսի եզրին է կանգնած։ Թվերը որ տեսնում ենք պայմանավորված են բացառապես Հայաստանի կառավարության քաղաքականությամբ, կառավարության կողմից չվերահսկվող արտաքին գործոններով, իսկ դրական գործոնները գնալով նվազում են։ Հիմա եթե հարաբերությունները շարունակվի սրվել ԵԱՏՄ-ի, ՀԱՊԿ-ի, ԱՊՀ-Ի շրջանակներում ապա մենք ունենալու ենք շատ կոշտ վայրէջք տնտեսական եզրույթն օգտագործելով, իսկ տնտեսական կոշտ վայրէջքը կբերի սոցիալական մեծ ցնցումների, ինչին Փաշինյանի ռեժիմը կարող է չդիմանալ»։
Նա շեշտեց, որ տեղի է ունենում Ռուսաստան-կոլեկտիվ Արևմուտքի միջև վերջին 100 տարվա ընթացքում ամենամեծ բախումը․
«Բնականաբար, թե՛ կոլեկտիվ Արևմուտքը, թե՛ Ռուսաստանը փորձում են դաշնակիցներ ձեռք բերել, փորձում են մյուս կողմի դաշնակցիներին տանել իրենց կողմ և միմյանց համար փոքր գլխացավանքներ ստեղծել։ Այստեղ խնդիրը պետք է լինի՝ չդառնալ գործիք»,- շեշտեց Խաչատրյանը։
Հիշեցնենք, որ ապրիլի 5-ին Բրյուսելում տեղի է ունենալու ՀՀ վարչապետ Նիկոլ Փաշինյանի, Եվրոպական հանձնաժողովի նախագահ Ուրսուլա Ֆոն դեր Լայենի և ԱՄՆ պետքարտուղար Էնթոնի Բլինքենի եռակողմ հանդիպումը։ Քննարկվելու են Հայաստանի զարգացմանը նպաստող եռակողմ համագործակցության ուղիները։