“მისი ყვირილი დარაჯს ესმოდა, მიშველეთო ყვიროდა თურმე. სცემეს და იქ დააგდეს” – კასპში შშმ პირი სცემეს და უმწეო მდგომარეობაში მიატოვეს
კასპში 33 წლის გიორგი ედიშერაშვილი 50 წლამდე ასაკის კაცმა სასტიკად სცემა და უმწეო მდგომარეობაში მიატოვა მეტეხის სადგურთან – ინფორმაციას კასპში მცხოვრები ირაკლი მილაძე ფეისბუკზე ავრცელებს. ედიშერაშვილი შშმ პირია, უჭირს საუბარი და დამოუკიდებლად გადაადგილება. მილაძის თქმით, ის ჯერ კასპის, შემდეგ კი მცხეთის საავადმყოფოში გადაიყვანეს.
“იმდენი შესძლო სასტიკად ნაცემმა შშმ პირმა, რომ პიროვნების სახელიც თქვა და მანქანის მარკა და ფერიც გაიხსენა. ასევე გაიხსენა, რომ როდესაც ნაცემი რაღაც შენობასთან დააგდეს, ცოტა ხანში სხვა პიროვნებებთან ერთად მისულა და ერთმანეთში საუბრობდნენ, რომ უკვე მკვდარი იყო თურმე” – წერს მილაძე.
ნაცემი შშმ პირის დედა კი ამბობს, რომ მის შვილზე ფიზიკურად რამდენიმე ადამიანმა იძალადა.
“მომიყვა, რომ წიხლებით უცემიათ, სამნი ყოფილან მანქანებით. ერთ-ერთს გამოუვლია გზაზე და გაუჩერებია, უთქვამს, წამო, გიო გაგასეირნო მანქანითო, ეს ყველას ენდობა და ჩაუჯდა. ყვიროდა თურმე გამიშვით, თორემ გადავხტებიო, არ გაუშვეს და წაიყვანეს, სადაც დაგეგმილი ჰქონდათ ალბათ. დაბლა დამაგდეს, წიხლები და მუშტები მირტყესო. მისი ყვირილი დარაჯს ესმოდა, მიშველეთო ყვიროდა თურმე. სცემეს და იქ დააგდეს, ერთი საათის შემდეგ, თვითონ მისულა ამ დარაჯთან და უთხოვია მიშველე, სახლში წამიყვანეო”, – ამბობს დედა.
შინაგან საქმეთა სამინისტროს განცხადებით. მომხდარზე გამოძიება სისხლის სამართლის კოდექსის 126-ე მუხლით დაიწყო, რაც ძალადობას გულისხმობს.