За нападот во Истанбул приведени 22 лица, меѓу нив и осомничен за поставување на бомбата

Турската полиција уапси маж осомничен дека ја поставил бомбата што експлодира на прометната пешачка улица во Истанбул, изјави утринава турскиот министер за внатрешни работи Сулејман Сојлу.

Тој рече дека првите наоди од истрагата укажуваат дека за смртоносниот напад се одговорни курдските екстремисти.

Во вчерашната експлозија на авенијата Истиклал, популарна туристичка дестинација со продавници и ресторани во близина на познатиот плоштад Таксим во Истанбул, загинаа шест лица, а над 80 се повредени.

„Набргу по детонацијата, полицијата уапси едно лице за кое се верува дека ја поставило експлозивната направа“, потврди министерот за внатрешни работи Сулејман Сојлу, пренесе агенцијата Анадолија.

Експлозија во Истанбул - Најмалку 6 загинати и над 80 повредени

Иако не го откри идентитетот на осомничениот, Сојлу рече дека во врска со експлозијата се приведени уште 21 лице и потврди дека првите наоди од истрагата упатуваат на ПКК и нејзиниот огранок во Сирија ПИД.

Сојлу рече дека наредбата за нападот на авенијата Истиклал во Истанбул е дадена во Кобане, град во северна Сирија, каде турските сили извршија операции против сириската курдска милиција во последните години, пренесува Ројтерс.