نیویارک ټایمز: تېره اوونۍ په ټوله نړۍ کې د القاعده شبکې لپاره ډېره بده وه
کانبرا ټایمز
کانبرا ټایمز ورځپاڼې د هغه تفصیلي راپور په اړه یوه لیکنه خپره کړې چې پهکې ادعا شوې، استرالیایي ځواکونو افغانستان کې جنګي جرمونه کړي دي.
د ورځپاڼې په باور، داسې اندېښنې شته چې ممکن دغه راپور له خپرېدو مخکې په پراخه کچه اېډېټ شي.
په مطلب کې راغلي، داسې وېره هم شته چې په جنګي جرمونو د تورنو سرتېرو قضیې به په منصفانه ډول تعقیب نهشي.
د ورځپاڼې په لیکنه، د استرالیا د دفاعي ځواکونو عمومي پلټونکي په افغانستان کې د ۲۰۰۵ نه تر ۲۰۱۶ کال پورې د خپلو ځانګړو ځواکونو لهخوا د ادعا شویو جنګي جرمونو په اړه څېړنه کړې ده.
د استرالیا صدراعظم سکاټ مورېسن د چهارشنبې په ورځ په کانبرا ښار کې خبریالانو ته وویل، په دې اړه راپورونه د اندېښنې وړ دي او په دقیق ډول د ادعاوو پر بنسټ څېړنې پیل شوي.
مورېسن زیاته کړې، د هغو کسانو لهخوا جدي څېړنه کېږي چې دغه ډول حساسو مسایلو کې ډېر مهارت لري.
د کانبرا ټایمز په وینا د استرالیا لوی څارنوال ویلي، د څېړنډلې مشر پاول بری ریتون به هغه مهال د خپلو موندنو راپور خپور کړي چې لازمه وګڼي.
نیویارک ټایمز
نیویارک ټایمز ورځپاڼې لیکلي، تېره اوونۍ په ټوله نړۍ کې د القاعده شبکې لپاره ډېره بده وه.
د ورځپاڼې په لیکنه، د سوریې په شمال لوېدیځ کې د القاعده شبکې ۷ لوړپوړي غړي د امریکایي بېپیلوټه الوتکو برید کې وژل شوي دي.
ورځپاڼې د افغانستان په غزني ولایت کې د القاعده د یوه مشر وژل کېدو ته هم اشاره کړې، د افغانستان ملي امنیت ویلي چې حسام عبدالرؤف د طالبانو تر واک لاندې سیمه کې وژل شوی دی.
په مطلب کې د ملګرو ملتونو راپور ته اشاره شوې چې پهکې راغلي، القاعده شبکې د افغانستان په ګډون یو شمېر ټولنو کې د پښې ځای پیدا کړی.