فرانسې د سوریې په اړه لا زیاتو اقداماتو ته چمتووالی اعلان کړ

د فرانسې ولسمشر امانویل مکرون د پنجشنبې په ورځ (د سلواغې ۲۵مه) په پاریس کې د سوریې نړیوال کنفرانس ته په وینا کې وویل چې فرانسه چمتو ده چې د سوریې په جګړه کې د سختدریځو ډلو پر ضد لا زیات اقدامات وکړي.


هغه ټینګار وکړ:«سوریې ته باید ایران پلوه ملېشې بیا را نه شي.»


مکرون وړاندیز وکړ چې د لویدیځ تر ملاتړ لاندې د «سوریې دیموکراتیک ځواکونه» دې د سوریې له ملي ځواکونو سره یو ځای شي.


ده همداراز د سوریې له موقت حکومت څخه وغوښتل چې د امریکا تر مشرۍ لاندې ائتلاف سره د سختدریځو ډلو پر ضد همکاري وکړي.


یاد کنفرانس، چې د اروپايي او عربي چارواکو په ګډون جوړ شوی و، د بشار اسد د حکومت له پرزېدو وروسته د سوریې په اړه درېیمه نړیواله ناسته وه.


په دې غونډه کې د سوریې د موقت حکومت د بهرنیو چارو وزیر، اسعد الشیباني، هم ګډون درلود.