Putin “TürkAkymy” geçirijisiniň açylyş dabarasyna gatnaşmak üçin Türkiýä geldi

Orsýetiň prezidenti Wladimir Putin, “TürkAkymy” tebigy gaz geçirijisiniň işe giriziljek gününiň öňüsyrasynda, 7-nji ýanwarda Stambula geldi. Bu barada Kremliň habar gullugy habar berýär. Öz ýurduny energiýa merkezine öwürmäge çalyşýan türk prezidenti Rejep Taýyp Erdoganyň 8-nji ýanwarda Putin bilen açylyş dabarasyna gatnaşmagyna garaşylýar.


Umumy bahasy 8 mlrd dollara golaý bolan “TürkAkymy” geçirijisiniň gurluşygy bäş ýyl wagt aldy.


Bu geçiriji ýylda 31.5 mlrd kub metr rus gazyny Türkiýäniň günbatar welaýatlaryna getirer, ol gazyň ýarysy Balkanlara we Merkezi Ýewropa, şol sanda Bolgariýa, Serbiýa we Wengriýa iberiler.


Bu Orsýetiň Ukrainanyň üstünden gaz geçirmegi bes etmek ýa azaltmak baradaky uzak wagtlyk maksadynyň,“Demirgazyk akym 1” we “Demirgazyk akym 2” ýaly alternatiw taslamalaryň bir bölegi bolup durýar.


Bu iki geçiriji suw astyndan Germaniýa barmaly, emma ABŞ sanksiýalary zerarly “Demirgazyk akym 2” gurlup gutarylmagynyň öň ýanynda gijikdirildi.


Geçen ýyl Ýewropa 200 mlrd kub metre golaý gaz iberen Orsýet Balkanlary we Türkiýäni gury ýer, Ukraina, Moldowa, Rumyniýa topraklary arkaly üpjün edýärdi.Geljekde bu gaz “TürkAkymy” arkaly, Gara deňiz astyndan, 930 km ýol geçip, alyjylaryna gowşar.