Мөхәммәтшин: Татарстан Африка илләре белән хезмәттәшлеккә аерым игътибар бирә

Татарстан Африка дәүләтләре белән хезмәттәшлеккә аерым игътибар бирә, төбәкара һәм муниципальара элемтәләрне киңәйтә. Бу хакта ТР Дәүләт Советы Рәисе, Халыкара хезмәттәшлек проблемалары буенча комиссия рәисе Фәрит Мөхәммәтшин Санкт-Петербургта комиссия утырышында әйтте.

Дискуссиянең төп мәсьәләсе булып, Африка илләре белән төбәкара хезмәттәшлекнең перспективалы формалары торды.

«Соңгы елларда Россия тышкы сәясәте чыннан да Глобаль Көньяк илләре белән хезмәттәшлек юнәлешендә активлаша. Шулай итеп, РФ тышкы сәясәтенең яңартылган концепциясендә дөнья үсешенең үзенчәлекле һәм йогынтылы үзәге буларак Африка континентына зур игътибар бирелә, неоколониализмга каршы көрәшнең мөһимлегенә басым ясала», — дип китерә Мөхәммәтшин сүзләрен Дәүләт Советы матбугат хезмәте.

Комиссия башлыгы билгеләп үткәнчә, Татарстанда Африка дәүләтләре белән хезмәттәшлеккә ТР Рәисе дәрәҗәсендәге ике яклы элемтәләрдән тыш та аерым игътибар бирелә.

Рөстәм Миңнехановның, шул исәптән «Россия — Ислам дөньясы» стратегик күзаллау төркеме рәисенең парламентарийлар, җәмәгатьчелек һәм фән вәкилләре белән элемтәләр активлаша.

«Алжир, Тунис, Мисыр, Судан, Сенегал, Конго Демократик Республикасы, Көньяк Африка Республикасы югары дәрәҗәдәге делегацияләре һәм вәкилләре бездә 2009 елдан бирле үткәрелә торган «Россия — Ислам дөньясы: Казан форумы « Халыкара икътисади форумында даими катнашучы булдылар. Без киләчәктә дә бу эшкә үз өлешебезне кертергә әзер», - дип белдерде Мөхәммәтшин.

Ул агымдагы геосәяси чынбарлыкларда, махсус хәрби операция үткәргәндә һәм Россиягә каршы санкцияләр фонында халыкара хезмәттәшлекнең яңа формаларын кертү, төбәк һәм муниципаль дәрәҗәләрдә тышкы икътисади элемтәләрне тирәнәйтү мөһим дип саный.