Өзбекстан: АКШга мыйзамсыз кетирүүнү убада кылгандар кармалды
Ага ылайык, Самарканд жана Фергана облустарында атайын операциянын негизинде алдамчылар жарандардан ири суммадагы акча алып жаткан маалда колго түштү.
Өткөн айда Кошмо Штаттардын Өзбекстандагы элчилиги Мексика-АКШ чек арасынан мыйзамсыз өткөн өзбекстандыктар эми иммиграциялык иши каралып бүткүчө кармалып турарын билдирген. Аларга АКШга кирүүгө тыюу салынган.
Маалыматка ылайык, элчилик мыйзамсыз жүргөн өзбекстандык жарандарды өлкөдөн чыгаруу маселесин чечүүдө Ташкент менен кызматташып жатат. Дипломатиялык өкүлчүлүк АКШга Мексикадан өтүү жолу кооптуу жана кымбат экенин эскерткен.
18-октябрда “Озодлик” АКШ президенти Жо Байдендин администрациясы Еврошаркеттен Америкага бет алган тажик жана өзбек жүргүнчүлөргө транзит визасын киргизүүнү өтүнгөнүн маалымдаган. Вашингтон ошол өлкөлөрдүн жарандары үчүн виза режимин катаалдаштыруу ыктымал террористтердин келишин алдын алууну көздөрүн билдирген.
Анын алдында өзбекстандык бир нече киши АКШга Мексика чек арасынан “Ислам мамлекети” террордук уюму менен байланышы бар аткезчинин жардамы менен өткөнү аныкталган.
Август айынын этегинде журналисттер Өзбекстандан АКШга адамдарды мыйзамсыз жөнөтүп турган түйүндүн бети ачылганын жазышкан. Америкалык расмий булактардын маалыматында, ал түйүндүн кеминде бир мүчөсү чет элдик террордук уюм менен байланышта болгон. Алар аркылуу Кошмо Штаттарга кирген 120 өзбекстандык мигранттын 15ине Федералдык иликтөө бюросу издөө салган.
13-октябрда Fox News телеканалы америкалык чек ара кызматы берген маалыматтын негизинде акыркы эки жылда Өзбекстан АКШнын чек арасынан мыйзамсыз өткөн жарандардын саны жагынан Түркия жана Мавританиядан кийинки үчүнчү орунга чыкканын кабарлаган. Канал ошол аралыкта 13 624 өзбекстандык АКШга мыйзамсыз кирүүгө аракеттенгенин кошумчалады.
АКШга Мексика аркылуу мыйзамсыз кеткен, кетүүгө аракет кылган кыргызстандык жарандар дагы бар.