Лейлек: Андаракта бир жылда он аял суицидге барып, алтоо каза болду
Баткен облусунун Лейлек районундагы Андарак айылында быйыл 10 аял өз өмүрүнө кол салып, анын алтоо каза тапты. Төртөөнүн өмүрүн дарыгерлер сактап калган.
Мындай маалыматты ушу тапта Лейлекте жүргөн "Азаттыктын" кабарчысы жергиликтүү активисттер, дарыгерлерден, маркумдардын жакындарынан тактады.
"Азаттык" ал жакта суицидге барган келиндер тууралуу видео иликтөө даярдап жатат. Кабарчылар маалымат чогултуп жүргөндө, 6-декабрда Баткендин милициясы Андарак айылында жыл башынан берки он бир айдын статистикасын жарыялап, бул мезгил аралыгында "жети аял өз өмүрүнө кол салып, бешөө каза болгонун, алардын эң жашы 20, улуусу 43 жашта экенин" билдирди.
Облустук ички иштер башкармалыгы өз жанын кыйган алтынчы келин тууралуу маалымат декабрдын статистикасына кошулат деп түшүндүрдү. Анын сөөгү Андаракта 5-декабрда коюлду.
«Азаттыктын» журналистине келиндер дары, уксус ичип же муунуп алганын жакындары айтып беришкен.
Лейлек районунда аялдардын суициди тууралуу маселени буга чейин депутат Жанарбек Акаев парламент жыйында көтөрүп, маселеге көңүл буруу зарылдыгын айткан.
Кыргызстанда быйыл жыл башынан берки сегиз ай ичинде үй-бүлөлүк зордук-зомбулук боюнча 8,5 миң учур катталган. 7,4 миң аялга милиция коргоо ордерин жазып берген.
Тынчтыктын жана аялдар үчүн коопсуздуктун индексинде (WPS) Кыргызстан эки жыл катары менен Борбор Азияда кыз-келиндер үчүн эң кооптуу өлкө деп табылган. (AiA/NT)