Новости за 17.11.2022

Азнакай районы юлларында ел башыннан 27 авария теркәлеп, аларда сигез кеше һәлак булды, утызы төрле тән җәрәхәтләре алды.

Шимбә көнне, 19 ноябрьдә, Самараның Модерн музее тамашачыларны Самара композиторы Галина Разбаева концертына чакыра. Анда Габдулла Тукай, Ольга Борисова һәм ХХ гасырның башка шагыйрьләре әсәрләренә иҗат ителгән романслар яңгыраячак. Бу хакта «Самар татарлары» сайты хәбәр итә.

Кырым Республикасының Саки районы Уютное (Отар-Мойнак) авылында мәчет төзелеше дәвам итә. Шушы көннәрдә аның гөмбәзенә ярымай урнаштырдылар. Бу хакта Россия мөселманнары Дини җыены Үзәкләштерелгән дини оешмасының матбугат хезмәте хәбәр итә.

Винегрет һәм «тиз әзерләнә торган» солы боткасы диабетикларга зыян китерергә мөмкин, дип кисәтте Чаллының 5нче Шәһәр хастаханәсе табиб-эндокринологы Еатерина Кирова. Бу турыда Татарстан Сәламәтлек саклау министрлыгының матбугат хезмәте хәбәр итте.

Лениногорскида Россия Герое Дамир Исламовның әтисе яшәгән йортка ремонт ясадылар. ТР Президенты Рөстәм Миңнеханов быелның маенда Геройның әнисе Саҗидә Вәлиәхмәтова белән очрашканнан соң шундый күрсәтмә биргән иде. Бу хакта Лениногорск районының матбугат хезмәте хәбәр итә.

Татарстанда ял көннәрендә температураның сизелерлек түбәнәюе көтелә. Иртәгәдән башлап һава торышы бозыла һәм республикада янә кар явачак, буран һәм көчле җил чыгачак. Бу хакта ТР Гидрометеорология һәм әйләнә-тирә мохитне күзәтү идарәсе хәбәр итә.

Ульяновск шәһәренең милли китапханәсендә драматург, режиссер һәм актер Кәрим Тинчуринның тууына 135 ел тулуга багышланган әдәби-музыкаль кичә узды. Бу турыда Бөтендөнья татар конгрессы хәбәр итте.

Татарстанда махсус хәрби операциядә катнашучыларның балалары өчен акчалата түләү алучылар исемлеге киңәйтелде. ТР Юстиция министрлыгы хокукый мәгълүмат порталында ТР Министрлар Кабинетының шул хактагы карарын урнаштырган. Бу турыда «Татар-информ» хәбәрчесе Наталья Рыбакова яза.

Самараның Камышлы театр артистлары Яңа Ярмәк авылында Данил Салиховның «Коткарыгыз, каравыл» дигән спектаклен куйды. Камышлы театры 100 еллык юбилеен билгеләп үтте. «Самара татарлары» сайты шул хакта хәбәр итте.

Бүген Татарстанда һава торышының кисәк начараюы көтелә, дип кисәтә ТР Гидрометеорология һәм әйләнә-тирә мохитне күзәтү идарәсе.

19-20 ноябрьдә илнең төп мөселман гыйбадәтханәсендә – Мәскәү Җәмигъ мәчетендә XX Мәскәү халыкара Коръән укучылар бәйгесе узачак. Бу хакта Россия Мөфтиләр шурасының матбугат хезмәте хәбәр итә.

Татарстанда быелның 1 декабреннән халык өчен газ бәясе 53 тиенгә артып, бер кубометры 6,78 сум (өстәмә кыйммәткә салымны исәпкә алып) тәшкил итәчәк. Татарстан Республикасы Тарифлар буенча дәүләт комитеты әлеге карарны газны күпләп сату бәясен индексацияләүгә бәйле рәвештә кабул итте, дип яза «Татар-информ».

Бүген Казанда «Социаль-хезмәт мәсьәләләрен хәл итүдә нәтиҗәле механизм буларак социаль партнерлык» дигән фәнни-гамәли конференция узды. Аның эшендә ТР Дәүләт Советы депутатлары, министрлык һәм ведомство, муниципаль берәмлек, иҗтимагый оешма вәкилләре катнашты. Кунакларны һәм форумда катнашучыларны республика җитәкчелеге исеменнән ТР Дәүләт Советы Рәисе Фәрит Мөхәммәтшин сәламләде.

«Безнең максат – татар телен, гореф-гадәт, милли ашлар, үрнәк булырдай сыйфатларыбызны түкми-чәчми яшь буынга тапшыру», - диде Флюра Абдуллина.

Татарстан Президенты Рөстәм Миңнеханов Континенталь хоккей лигасының даими чемпионаты кысаларында Санкт-Петербургның СКА командасына каршы матч алдыннан «Ак Барс» хоккейчыларына мөрәҗәгать итте.

Үпкәдәге яман шеш бик нык яшәрә, бүгенге көндә 30-59 яшьлек пациентлар шушы чир белән авырый. Республика клиник онкология диспансерының икенче торакаль бүлеге табиб онкологы Марат Бакиров «Татар-информ» агентлыгында узган матбугат конференциясендә шулай дип белдерде.

Федераль ташламалы ипотека программасын 2023 елда да дәвам итәргә кирәк. ТР төзелеш, архитектура һәм ТКХ министры урынбасары Илшат Гыймаев шундый фикерен белдерде.

Чаллыдан шефлык ярдәменең чираттагы партиясен озаттылар. 6,7 миллион сумлык гуманитар йөкне өч автомобильгә бүлделәр – һәркайсына егермешәр тонна. Автокала мэриясенең телеграм-каналында шуның фото һәм видеосы чыкты.

Буа якташлык җәмгыяте мобилизацияләнгән якташлары һәм хәрбиләргә ярдәм йөзеннән 250 мең сум акча күчерде. Буа районы башлыгы Ранис Камәртдинов үзенең телеграм-каналында шулай дип язган.

Татарстанның һәм Башкортстанның атказанган артисты Элвин Грей Бөтендөнья юл-транспорт һәлакәте корбаннарын искә алу көне алдыннан юл хәрәкәтендә катнашучыларны юл йөрү кагыйдәләрен үтәргә чакырды.

Бүген кич Татарстанда урыны белән буран көтелә, күз күреме 1 мең метрга кадәр начараячак, көнчыгыштан искән җилнең тизлеге секундына 18 метрга кадәр җитәчәк, юлларда кар көртләре һәм бозлавык фаразлана. 18  ноябрьдә төнлә һәм көндез һава торышының начарлануы дәвам итәчәк.

«Концертлар аша балалар ана теленең кирәклеген күреп, белеп үсә», - диде «Шаян ТВ» телеканалы башкарма директоры Рамилә Сәхабетдинова.

Татарстанның 25 яшькә кадәрге яшь эшмәкәрләре «Кече һәм урта эшмәкәрлек» илкүләм проекты буенча 47 миллион сум грант ярдәме алачак. Республика Икътисад министрлыгының матбугат хезмәте шул турыда хәбәр итә.

Татарстан Президенты Рөстәм Миңнеханов Казанда яшәүче Гөлүсә Закированы «Ел китапханәчесе – 2022» Бөтенроссия бәйгесендә җиңүе белән котлады. Республиканың сукырлар һәм начар күрүчеләр өчен махсус китапханәсенең Оештыру-методик һәм библиографик эшчәнлеге бүлеге җитәкчесе «Иң яхшы тифлокитапханәче» номинациясендә җиңү яулады.

Татарстанда җәмәгать урыннарын төзекләндерүгә һәм «Безнең ишегалды» президент программасына йомгак ясалды. Бүгенге көндә барлык эшләр дә төгәлләнгән, дип хәбәр иттеләр «Татар-информ»га Татарстан Республикасы шәһәрләре үсеше институтында.