Новости за 11.06.2023

Кайбыч районының Кошман авылында халык Сабан туена җыелды. Барысын да район башкарма комитет җитәкчесе Алексей Макаров сәламләде һәм бәйрәм белән котлады, Түбән Кошман мәчете имам-хатыйбы Ибраһим хәзрәт Сабиров хәер-фатыйхасын биргәннән соң, хезмәт алдынгыларын, юбилярларны, актив пенсионерларны, авыл җирлеге үсешенә өлеш кертүчеләрне бүләкләделәр. Бу хакта «Кайбыч таңнары» хәбәр итә.

Татарстанның Биектау районының «Коркачык» аэродромыннан очып киткән самолеттагы парашютчылар республиканың Лаеш районында яшәүчеләр өчен Сабантуйда сюрприз ясады. Лаеш шәһәре өстендә күктә алар Россия, Татарстан һәм Лаеш районының байракларын ачты.

Татарстан Республикасы Экология һәм табигать ресурслары министрлыгының Көньяк-Көнчыгыш территориаль идарәсе адресына Бөгелмә районы Ключевка авылындагы буага ирекле керүне чикләү турында шикаять килде. Бу хакта министрлык сайтында хәбәр ителә.

Питрәч районының иң зур хуҗалыгы «Ак барс-Питрәч» 9 мең тонна сенаж, 15 мең тонна силос салырга һәм өч мең тонна печән әзерләргә планлаштыра. Бу хакта «Алга» сайтында хәбәр ителә.

Уфада Ә.Вәлиди исемендәге Милли китапханәнең Балалар уку үзәгендә яшь язучылар һәм шагыйрьләр өчен «Язучы үстерәбез» дигән балалар әдәби студиясе ачылды. Бу хакта «Башинформ» агентлыгы яза.

Яшел Үзән Сабан туенда көрәшнең финалын 38 меңнән артык тамашачы күзәтте. Беренче урын өчен көрәш буенча Россия чемпионы, Яшел Үзән Сабан туеның 10 тапкыр абсолют батыры Фирдүс Зәйнуллин һәм Олы Ачасыр авылыннан Айдар Әхмәтов бил алышты.

Кыргыз диаспорасы вәкилләре Иркутск Җәмигъ мәчетендә өмә үткәрде. Алар Аллаһ йорты тирәсендәге территорияне җыештырды, бинаны буяды һәм агартты, чүп-чарны төяп озатты. Бу хакта Россия мөселманнары Дини җыены Үзәкләштерелгән дини оешмасының матбугат хезмәте хәбәр итә.

Төнлә Татарстан территориясендә һавада һәм туфракта урыны белән кырау көтелә. 

Татарстанның Тукай районында кеше үлеменә китергән юл һәлакәтенең видеосы «Татар-информ» агентлыгы карамагында барлыкка килде.

Яшел Үзән Сабан туенда чәчү батыры Фидаил Тимуршин махсус приз – трактор белән бүләкләнде. Аграрийга «Кентавр T-244 pro» маркалы транспорт чарасын «Кызыл Шәрык Агро» агросәнәгать комплексы системасында күпьеллык намуслы хезмәте өчен тапшырдылар. Бүген ул «ВЗП Заволжья» җаваплылыгы чикләнгән җәмгыятендә чит ил техникасы буенча әйдәп баручы инженер булып эшли.

Кичә, 10 июньдә, Нижневартовскида Сабан туенда Бөтендөнья татар конгрессы Башкарма комитеты җитәкчесе урынбасары Рәзил Зиннәтуллин «Татар милләтенә күрсәткән олы хезмәтләр өчен» Югра Думасы рәисе Борис Хохряковка Бөтендөнья татар конгрессы медален тапшырды.

Башкортстанның Миякә районы Илчегол авылында Керчь кушаматлы легендар атка һәйкәл ачылды. Бу хакта «Башинформ» агентлыгы җирле муниципалитетның матбугат хезмәтенә сылтама белән хәбәр итә.

Узган пәнҗешәмбедә Казан үзәгендә юл-транспорт һәлакәте турында өстәмә белешмә ачыкланды. Кыйммәтле чит ил машинасы бәрдереп үтергән кеше Карелиядән килгән танылган табиб-травматолог Сергей Шуркин булып чыкты.

13 июньгә каршы төндә Татарстан территориясендә урыны белән һавада һәм туфракта 0 градустан -1 градуска кадәр кырау көтелә. ТР Гидрометеорология һәм әйләнә-тирә мохитне күзәтү идарәсе әлеге уңайдан кисәтү игълан итте.

Казахстан Президент Касым-Жомарт Токаев 12 июньне Абай өлкәсендәге урман янгыннарында һәлак булучылар истәлегенә илкүләм матәм көне дип игълан итте. Бу хакта ТАСС агентлыгы яза.

7-8 июльдә Троицкида ХII «Рәсүлев укулары: ислам Россиянең тарихында һәм бүгенге тормышында» Бөтенроссия фәнни-гамәли конференциясе узачак, ул «Традицион конфессияләр Ватан һәм рухи кыйммәтләрне яклау юлында» дигән темага багышлап үткәрелә. Бу хакта Бөтендөнья татар конгрессының матбугат хезмәте хәбәр итә.

2025 елда эшләмәүче пенсионерларның иминият пенсиясе күчеш чоры тәмамлану аркасында ике тапкыр индексацияләнәчәк. Дәүләт Думасының Хезмәт, социаль сәясәт һәм ветераннар эше комитеты рәисе, ЛДПР фракциясе җитәкчесе урынбасары Ярослав Нилов шулай дип белдерде. Бу хакта «Российская газета» яза.

24 июньдә булачак Сабан туе алдыннан Тынычлык бистәсендәге Каенлыкта урнашкан Казанның төп бәйрәм мәйданчыгын җыештыралар, черки һәм талпаннарга каршы эшкәртәләр. Болар барысы да килешү нигезендә башкарыла, шәһәр хакимияте әлегә тагын да масштаблырак төзекләндерү эшләре үткәрергә җыенмый.

Татарстан Дәүләт җыр һәм бию ансамбле бүген, 11 июнь көнне, 77 яшендә Татарстанның халык артисты, үзенең баш дирижёры. мәшһүр музыкант, композитор Рәшит Шәкүр улы Мостафин вафат булуын хәбәр итә.

Район башлыгы Рәнис Кәмәртдинов Буа ветеринария техникумын 30 августта ачарга кушты, ул биредә ремонт эшләре белән танышкан вакытта төзекләндерү темпларын арттыру кирәклегенә игътибар юнәлтте.

Россиядә ипотека буенча ташламалы программалардан файдалану кагыйдәләрен катгыйландырырга, күбесен ябарга кирәк. Үзәк банк башлыгы Эльвира Нәбиуллина регуляторның директорлар советы утырышы нәтиҗәләре буенча шулай дип белдерде. Бу хакта Газета.ru сайты хәбәр итә.

Табиб-сомнолог Роман Бузунов йокы туймауның нинди нәтиҗәләргә китерүе турында сөйләде. Бу хакта РИА Новости агентлыгы хәбәр итә.

Чирмешәндә Сабан туе батырына бүләккә квадроцикл әзерләгәннәр, шулай ук район батырына тәкә дә биреләчәк. Бу хакта «Безнең Чирмешән» сайтында хәбәр ителә.

Лаеш районы Усад җирлегендә 235,6 млн сумга канализация челтәрләре урнаштырылачак. Бу тендер дәүләт сатып алулары сайтында чыкты. «Кама ягы» шул хакта хәбәр итә.

Санитар-экологик икеайлык нәтиҗәләре буенча быел да махсус комиссия Әлмәт районы авыл җирлекләренең төзеклеген, чисталыгын карап чыгып, урыннар билгеләде. Комиссия авылларны баштан ук ике төркемгә бүлеп бәяләгән булып чыкты. Беренче төркемгә халык саны 1000 кешедән артып киткән торак пунктлар булса, икенче төркемгә халык саны 1000 кешедән ким булган авыл җирлекләре кергән. Бу хакта «Әлмәт таңнары» хәбәр итә.