Новости за 23.07.2023

Апас районында «Алга» яшүсмерләр клубында «көмеш волонтерлар» «Тормышны кадерлибез» хәйрия оешмасы җитәкчесе Илнар Зиннәтуллин белән очрашты. Бу хакта «Апастово-информ» хәбәр итә.

Кукмара районында матур бер гадәт традициягә кереп бара: бишенче ел рәттән уракка төшәр алдыннан район җитәкчелеге, авыл хуҗалыгы предприятиеләре җитәкчеләре һәм хуҗалыкларның агрономнары һәр хуҗалыкта булып, игеннәрнең торышын карыйлар. Бу хакта «Хезмәт даны» сайтында хәбәр ителә.

Болгарда тугыз көн дәвам иткән «Яңарыш: Эпосның заманча укылышы» фестивале «Кара пулат» операсы белән тәмамлана. Спектакльне карарга килгән Татарстан Республикасы Рәисе Рөстәм Миңнеханов, Татарстан Республикасы Дәүләт Киңәшчесе Минтимер Шәймиев фестивальне югары бәяләде.

Бу көннәрдә Азнакайның Урсай авылы ханым-туташлары бергә җыелып токмач кисү өмәсе ясаган. Алар аны махсус хәрби операциядә катнашучылар өчен әзерли. Бу хакта ветераннар советы рәисе Рүзилә ханым Зарипова хәбәр итте. «Азнакай» сайтында шул хакта хәбәр ителә.

Алабуга районы башлыгы Рөстәм Нуриев күчмә киңәшмә барышында «Безнең ишегалды» программасы буенча башкарылган эшләр һәм күпфатирлы йортларны капиталь ремонтлау барышы белән танышты. Бу хакта «Алабуга нуры» хәбәр итә.

Бүген Мәскәүдә армия генералы Мәхмүт Гәрәев каберенә чәчәкләр салу тантанасы булды. Танылган хәрби җитәкчене искә алырга Татарстанның Мәскәүдәге тулы вәкаләтле вәкиле Равил Әхмәтшин, Саклану министрлыгы, Хәрби фәннәр академиясе вәкилләре, генералның туганнары, дуслары һәм якыннары, яшь армиячеләр килде. Бу хакта вәкаләтле вәкиллекнең матбугат хезмәте хәбәр итә.

Бүген Татарстанга Җиңү поезды килде. Нурлат – виртуаль экспозиция белән танышу мөмкинлеге тудырылган беренче станция булды. ТР Рәисе Рөстәм Миңнеханов үзенең телеграм-каналында шулай дип белдерде.

Бүген Татарстан башкаласында яшәүчеләргә һәм кунакларга «Казанның белем бирү учреждениеләре: тарих һәм бүгенге заман» дип аталган яңа туристик автобус маршрутын тәкъдим иттеләр.

Татарстан Рәисе Рөстәм Миңнеханов республиканың берничә районында урып-җыю эшләренең барышын тикшерде. Ул тикшерүне Алексеевск районыннан башлады, дип хәбәр итә ТР җитәкчесенең матбугат хезмәте.

Россиянең атказанган юристы Иван Соловьев пенсионерларга нинди түләүләр өчен документларны шәхсән тапшырырга кирәклеге турында сөйләде. Бу хакта ТАСС агентлыгы хәбәр итә.

Татарстан Рәисе Рөстәм Миңнеханов бүген төрле районнарда республика кырларын тикшерүе хакында хәбәр итте. Очар кошлар биеклегеннән төшерелгән фотоларны ул үзенең телеграм-каналында урнаштырган.

Санкт-Петербург Закон чыгару җыены куркыныч токымлы этләрне муенчаклы баудан башка гына урамда йөрткән өчен аларның хуҗаларын штрафка тартырга тәкъдим итте. Дәүләт Думасына шул хактагы закон проекты тапшырылган, дип яза «Российская газета».

24 июльдә Дәүләт теркәве, кадастр һәм картография федераль хезмәтенең Татарстан Республикасы буенча филиалы һөнәри бәйрәм – Кадастр инженеры көненә багышланган ачык ишекләр көне үткәрә. Теләгән һәркемнең җир һәм күчемсез милек белән бәйле мәсьәләләр буенча бушлай квалификацияле ярдәм алу мөмкинлеге бар.

Бөгелмә кешесен танышын үтергән өчен хөкем итәчәкләр. РФ Тикшерү комитеты ТР буенча идарәсе җитәкчесенең өлкән ярдәмчесе Андрей Шептицкий шул хакта хәбәр итте.

Казанда шәфкать туташы-анестезистларның уртача хезмәт хакы 60 мең сум тәшкил итә, стажлы белгечләр өчен ул 140 мең сумга кадәр җитә. SuperJob сервисы, шундый белгечләр өчен эш бирүчеләрнең тәкъдимнәрен анализлап, шул хакта хәбәр итә.

Социаль челтәрләрдә Чаллыда күп катлы йортта урнаштырылган домофон камерасының видеоязмасы чыкты. Анда бер малайның мылтыктан домофонга атуы күренә.

Әгәр чынлыкта булмаган күчемсез милек объектын исәптән төшерсәң, милеккә салым түләгән вакытта акчаны сизелерлек янга калдырырга мөмкин. Бу хакта РИА Новости агентлыгы Дәүләт Думасы депутаты Сергей Гавриловка (КПРФ фракциясе) сылтама белән хәбәр итә.

Июль Татарстан өчен температура күрсәткечләре, шулай ук явым-төшем күләме буенча аномаль булды, дип белдерде КФУның Экология һәм табигатьтән файдалану институты метеорология, климатология һәм атмосфера экологиясе кафедрасы доценты Тимур Әүһәдиев. Ул билгеләп үткәнчә, узган вакыт нәтиҗәләре буенча температура күрсәткечләре климатик нормадан бер ярым градуска түбәнрәк булган, бу бик көчле тайпылыш дип санала. Бу хакта КФУның матбугат хезмәте хәбәр итә.

Төркиянең көнчыгышындагы Малатья провинциясендә 4,2 магнитудалы җир тетрәү булган. Бу хакта РИА Новости агентлыгы Төркиянең табигый бәла-каза нәтиҗәләрен бетерү (AFAD) идарәсенә сылтама белән хәбәр итә.

Бүген совет һәм Россия хәрби җитәкчесе, Бөек Ватан сугышы ветераны, армия генералы, хәрби һәм тарихи фәннәр докторы Мәхмүт Гәрәевнең тууына 100 ел тула. Ул 2019 елда 96 яшендә вафат булды.

Иртәгә Казан вокзалына Самара өлкәсеннән «Җиңү поезды» күчмә күргәзмә-музее килә. Интерактив экспозиция көне буе эшләячәк. Керү – бушлай, алдан теркәлү буенча.

Дүшәмбе, 24 июльдә, Татарстанда алмашынучан болытлы һава торышы көтелә. Яңгыр явачак, төнлә урыны белән, иртән аерым районнарда яшенле яңгыр көтелә. Көньяк-көнчыгыштан искән җилнең тизлеге секундына – 7-12, иртән һәм көндез урыны белән 15-20 метрга кадәр җитәчәк. Һава температурасы төнге сәгатьләрдә +12..+17, көндез +20..+25 градус тәшкил итәчәк.

Татарстан Республикасы Дәүләт киңәшчесе Минтимер Шәймиев Якутиянең «Олонхо театры» спектаклен караганнан соң артистларга баш иеп рәхмәтен белдерде.

Салават башкорт драма театры ветераны, Башкортстанның халык артисты Гөлшат Зыязетдинова 76нчы яшендә вафат булган. Бу хакта «Башинформ» агентлыгы яза.

Алабугада тренерларны, спорт мастерына кандидатларны һәм спорт мастерларын өстәмә матди кызыксындыру чаралары көтә. Бу хакта шәһәр һәм район тормышы мәсьәләләре буенча киңәйтелгән киңәшмәдә район башлыгы Рөстәм Нуриев хәбәр итте. «Алабуга нуры» шул хакта яза.