Новости за 24.07.2023

Бүген Казан ипподромында Татарстан-Алтай атлар йөрешенә старт бирелә. Бу сәяхәттә татар токымлы алты атта тугыз кеше катнаша. Башкортстанга юл тотканда экспедиция Минзәлә районы аша уза. Бу хакта «Минзәлә-информ» хәбәр итә.

Россиядә хәрби операция зонасында зыян күргән балаларның ата-аналарына бер тапкыр бирелә торган түләүләр билгеләргә тәкъдим ителә. Боерыкның тиешле проектын РФ Хезмәт министрлыгы әзерләгән, ул норматив хокукый актлар проектларының федераль порталында басылып чыккан.

Россия Президенты Владимир Путин Россиядә җенесне үзгәртүне тыю турында закон имзалады. Хәзер ул тиешле медицина күрсәтмәләре булганда гына рөхсәт ителәчәк. Документ хокукый мәгълүматның рәсми порталында урнаштырылган.

Чиләбе өлкәсенең Кунашак районы Чебакул авылында 2519 нчы санлы мәчет ачылды. Аңа Аллаһның 99 исеменең берсе – Әл Җәмил исеме бирелде. Бөтендөнья татар конгрессы шул турыда хәбәр итә.

Банклар физик затларның акча күчерүләрен тикшерергә һәм шикле операцияләрне ике көнгә туктатырга тиеш булачак. Россия Президенты Владимир Путин шундый закон имзалады. Шулай ук закон клиентларның ризалыгыннан башка Үзәк банк базасында булган мошенникларның счетларына күчерелгән акчаларны кире кайтарырга мәҗбүр итә. Документ хокукый мәгълүматның рәсми порталында урнаштырылган.

Татарстанның Яшел Үзән районында татар театрын торгызырга мөмкиннәр. Бу планнар турында шәһәр мэры Михаил Афанасьев телеграм-каналында Яшел Үзән районының «Ак калфак» иҗтимагый оешмасы җитәкчесе Гөлинә Саттарова белән очрашудан соң белдерде.

Хәрби хезмәткә чакырылыш яшен 30 яшькә кадәр күтәрү этаплап барачак, дип белдерде Дәүләт Думасы депутаты Андрей Картаполов. Аның сүзләренчә, парламентның түбән палатасы бу мәсьәләне 25 июльдә узачак утырышта караячак.

Татарстан Республикасында Бала хокуклары буенча вәкаләтле вәкил Ирина Волынец телеграмдагы каналында ата-аналар түләгән акчаларының күпмедер күләмен кире кайтара алулары турында аңлатты.

Казаннан татар токымлы атларда Алтайга кадәр атка атланып бару чабышы башланды. Юлның озынлыгы 3 мең километрдан артык тәшкил итәчәк. Маршрут Россиянең сигез төбәгендәге 56 торак пункт аша уза.

Бер ай элек Биләрдә агачларның яфракларын парсыз ефәк күбәләге кортлары ашап бетерү сәбәпле, агачларның ботаклары гына калган иде. «Татар-информ» журналисты Зилә Мөбәрәкшина бер ай элек Биләрдә булып, шул хакта репортаж әзерләде. Биләр урман хуҗалыгы җитәкчесе Рамил Нуруллин Биләрдә агачларның яңадан яфрак ярганын әйтте.

2024 елның 1 гыйнварыннан кулланучылар займнары буенча кредит каникулларының вакыты чикләнмәгән булачак. Россия Президенты Владимир Путин шундый закон имзалады, документ рәсми хокукый мәгълүмат интернет-порталында урнаштырлган.

Якын көннәрдә Татарстан территориясендә тотрыксыз һава торышы сакланачак, әмма температура фоны шактый күтәрелә. Атнаның икенче яртысында республикада аномаль эсселек урнашачак, дип фаразлый Татарстанның Гидрометеорология үзәге.

29 август көнне 18:30 сәгатьтә Г.Тукай исемендәге Татар дәүләт филармониясендә Татарстан Республикасының халык шагыйре, тәҗрибәле журналист, танылган җәмәгать һәм дәүләт эшлеклесе Роберт Миңнуллин иҗатына багышланган «Яшәргә икән, яшәргә!» дип аталган бәйрәм концерты оештырыла.

22 июльдә Саратов өлкәсендә Яңа Борас (Новые Бурасы) шәһәр тибындагы бистәсендә Ринат Халиков исемендәге мәчет ачылды. Россия Мөфтиләр шурасы шул турыда хәбәр итә.

Казанда 66 яшьлек хатын-кыз оныгын ялгыш бензин пычкысы белән яралаган. «Татар-информ»га бу мәгълүматны Татарстан Эчке эшләр министрлыгының матбугат хезмәтендә расладылар.

Бүген иртән Питрәчтә Вишневская урамында өч катлы йортта янгын чыккан. «Татар-информ»га бу турыда Россия Гадәттән тыш хәлләр министрлыгының Татарстан Республикасы буенча Баш идарәсе матбугат хезмәтендә хәбәр иттеләр.

Татарстанда дәүләт хезмәткәрләре санын кабат арттырдылар. Үзгәрешләр Татарстан Республикасы Юстиция министрлыгы хезмәткәрләре санына кагыла. Шундый указны Республика Рәисе Рөстәм Миңнеханов имзалады.

Махсус операция зонасына киткән Башкортстанның атказанган артисты Радик Динәхмәтов хәрби вазифага билгеләнүе турында сөйләде. Бу хакта «Юлдаш» радиосы хәбәр итә.

«Безнең ишегалды» республика программасы буенча төзекләндерелгән Казанның барлык территорияләре видеокамералар белән җиһазландырылачак. Шәһәр Башкарма комитеты җитәкчесе Рөстәм Гафаров мэриядә узган эшлекле дүшәмбе киңәшмәсендә шулай дип белдерде.

Дәүләт Думасында нигезле сәбәбе булмый торып хәрби комиссариатка килмәгән өчен штрафларны элегрәк тәкъдим ителгән 50 мең урынына 30 мең сумга кадәр киметергә җыеналар. Закон проектының төзәтмәләр таблицасында һәм аның икенче укылышка әзерләнгән текстында шулай диелә (әлеге үзгәрешкә РБК игътибар юнәлткән).

22 июльдә Ульяновск өлкәсендәге Инза районы Дракино авылына Ульяновск шәһәреннән Алсу Әлмәтова җитәкчелегендә «Урама» татар фольклор ансамбле әгъзалары иҗади эзләнүләр белән килгән. Бу хакта «Өмет» газетасының телеграм-каналы хәбәр итә.

РФ Президенты Владимир Путин хәрби дәрәҗәсе булган армиядә хезмәт итәргә тиеш гражданнар өчен запаста торуның чик яшен биш елга арттыру турындагы законны имзалады. Документ хокукый мәгълүмат интернет-порталында урнаштырылган.

Татарстан Рәисе Рөстәм Миңнеханов республика министрлыклары һәм муниципалитетлары башлыкларына консолидацияләнгән бюджетка керемнәрне арттыруга юнәлдерелгән күрсәтмәләр бирде. Тиешле бурычларны ул төбәкнең финанс, казначылык һәм салым органнары киңәшмәсендә формалаштырды.

Татарстан Республикасының атказанган матбугат һәм массакүләм коммуникацияләр хезмәткәре, журналист Әлфия Миңнуллина үзгәртеп кору елларыннан соң татар матбугатына зур зыян салынды дип саный.

22 июльдә Чувашия Республикасы мөселманнары Диния нәзарәте Батыр районының Шыгырдан авылында «Урталык» мәчетенең 145 еллыгы уңаеннан тантаналы чара үткәрде. Әлеге истәлекле дата уңаеннан бәйрәмгә күпсанлы мактаулы кунаклар, дин эшлеклеләре һәм дин тотучылар җыелды. Бу хакта Россия мөселманнары Дини җыены Үзәкләштерелгән дини оешмасының матбугат хезмәте хәбәр итә.