Новости за 01.12.2023

Лениногорскиның Керкәле авылыннан махсус хәрби операция зонасында хезмәт итүчегә туганнан туган абыйсы «УАЗ Патриот» машинасын бүләк иткән. Мобилизацияләнгән хәрби туган авылына берничә көнгә генә, машинага документлар рәсмиләштерергә генә кайткан. Бу хакта «Заман сулышы» хәбәр итә.

«Иделем акчарлагы» яшь язучылар бәйгесенең өченче туры башланды. Быел барлыгы 68 катнашучыдан 332 эш кабул ителгән. Жюри чыгарган нәтиҗәләр буенча 25 катнашучы 1-3 декабрь көннәрендә «Волга» яшьләр үзәгендә узачак иҗади мәктәпкә чакырылган.

28 ноябрьдә Мурманск шәһәренең «Сопкалар. Гаилә» киңлегендә «Тукай эзләре буйлап» беренче Тукай укулары узган. Аны шәһәрнең «Якташ» татар мәдәни җәмгыяте белән берлектә балалар-яшүсмерләр китапханәсе оештырган. Бу турыда Мурманск татарларының «Якташ» берләшмәсе социаль челтәрдәге сәхифәсендә хәбәр итте.

Татарстанның атказанган артисты Рамил Вәҗиевның 50 яшьлек юбилеена Камал театры Ркаил Зәйдулланың «Игезәк» спектаклен күрсәтте.

Узган ялларда Мәскәүдә Россия һәм Бәйсез дәүләтләр берлеге халыкларының традицион көрәш төрләре фестивале узды, анда 150 көрәшче җыелды. Бу хакта Түбән Новгород өлкәсенең «Туган як» иҗтимагый-сәяси газетасы «ВКонтакте» социаль челтәрендәге сәхифәсендә хәбәр итә.

Мәскәүдәге «Россия» күргәзмәсенә Татарстан көненә чакыра торган шаян видео интернетта таралды. Чара 2 декабрьдә Халык хуҗалыгы казанышлары күргәзмәсендә (ВДНХ) узачак.

Россия Хөкүмәте Татарстанда һәм Чечняда авыл территорияләрен үстерүгә тагын 654,2 млн сум акча бүлеп бирәчәк. Бу хакта Министрлар Кабинетының матбугат хезмәте хәбәр итә.

Россия төбәкләренең мәгариф оешмаларына Татарстан быел 8 млн сумлык 19 меңнән артык татар теле дәреслеге тапшырды. Бу хакта Татарстан мәгариф һәм фән министры урынбасары Минзәлия Закирова Татарстан Рәисе каршындагы Ватандашлар эшләре буенча координация советы утырышында хәбәр итте, дип яза «Татар-информ» хәбәрчесе Надежда Гордеева.

Бүген Татарстан Республикасы Хөкүмәте Йортында узган киңәшмәдә Татарстан Рәисе Рөстәм Миңнеханов муниципаль берәмлек башлыкларына, министрлык һәм ведомство җитәкчеләренә Инвалидлар декадасын һәм Ватан Геройлары көнен оештыру, Яңа елны бәйрәм итүгә әзерлек буенча йөкләмәләр бирде. Бу турыда Татарстан Рәисенең матбугат хезмәте хәбәр итте.

Татарстан Рәисе Рөстәм Миңнеханов традицион республика киңәшмәсендә режиссер Жора Крыжовниковның илне шаулаткан «Слово пацана. Кровь на асфальте» сериалын тәнкыйтьләде. Мондый фильмнар Россия җитәкчелеге һәм төбәк хакимиятләре сәясәтенә туры килми, дип белдерде ул. Бу турыда «Татар-информ» хәбәр итте.

Бүген Татарстан Республикасы Милли китапханәсендә Мәктәп волейбол лигасына нигез салынуга биш ел тулуга багышланган тантаналы чара узды. Татарстан Республикасы Дәүләт Советы Рәисе һәм Татарстан Республикасы Волейбол федерациясе президенты Фәрит Мөхәммәтшин әлеге бәйрәм белән котлады. Бу турыда Татарстан Дәүләт Советының матбугат хезмәте хәбәр итте.

Сарман районының иң яхшы белем бирү учакларының берсе булган Җәлил гимназиясе 20 еллык юбилеен билгеләп үтте. Бу турыда Бөтендөнь татар конгрессы хәбәр итте.

Иртәгә Мәскәүдә Халык хуҗалыгы казанышлары күргәзмәсендә (ВДНХ) узачак Татарстан көне алдыннан «Татар-информ» журналистлары «Россия» күргәзмә-форумы белән танышты. Мәгълүмат агентлыгының баш мөхәррир урынбасары Артур Хәлилуллов бәяләвенчә, күргәзмә залына керү юлындагы Татарстан Республикасы стенды шунда ук үзенә игътибарны җәлеп итә.

Киләсе елда Сабантуй бәйрәмен Россия төбәкләре һәм чит илләрдә 399 тапкыр уздыру планлаштырыла. Бу хакта республика мәдәният министры урынбасары Дамир Натфуллин Татарстан Рәисе каршындагы Ватандашлар эшләре буенча координация советы утырышында хәбәр итте.

Бүген Татарстан Республикасы Дәүләт Советы Рәисе Фәрит Мөхәммәтшин Пенза өлкәсе губернаторы Олег Мельниченко белән очрашты. Очрашу республика парламентында узды.

Татарстан Рәисе Рөстәм Миңнеханов республика казанышлары турында сөйләде һәм бар кешене дә Мәскәүдә «Россия» күргәзмәсен карарга чакырды. Әлеге видео күргәзмә-форумның рәсми телеграм-каналында урнаштырылган.

Рус телен белми торып, чит ил студентлары Россия университетларында яхшы белем ала алмаячак, аларга югары уку йортларына кергәнче әзерлек кирәк. Бу хакта Татарстан Республикасы Дәүләт Советы Рәисе Фәрит Мөхәммәтшин Татарстан Рәисе каршындагы Ватандашлар эшләре буенча координация советы утырышында белдерде.

«Саф» балалар радиосы коллективы «Татар-информ» мәгълүмат агентлыгында «Саф музыка» проекты нәтиҗәләре турында сөйләде. Татарстан Композиторлар берлеге рәисе урынбасары, Татарстанның халык артисты, композитор Резеда Ахиярова проект оештыручыларын зур эш башкарганын билгеләп үтте.

Бүген кич, иртәгә төнлә һәм көндез Татарстанда чираттагы тапкыр һава шартлары начарлану фаразлана. Бу хакта Татарстан Гидрометеорология үзәге хәбәр итә.

Кырым башлыгы Сергей Аксенов хәбәр иткәнчә, Кырымда давыл аркасында 5 кеше һәлак булган һәм 12 кеше зыян күргән. Бу турыда «Татар-информ» язды.

Татарстан энергетиклары Лисичанскида 26 километр югары вольтлы кабель сузарга ниятли. Эшләр Казан белгечләре катнашында алып барыла.

«Саф» балалар радиосы коллективы «Татар-информ» мәгълүмат агентлыгында «Саф музыка» проекты нәтиҗәләре турында сөйләде. Проектның төп нәтиҗәсе 4 декабрьдә 18.00 сәгатьтә «Чулпан» мәдәният үзәгендә ясалачак.

Самара өлкәсенең Похвистнево районы Яңа Мансур авылында тагын бер чишмә төзекләндерелгән. Ул «2017-2025 елларга Самара өлкәсендә муниципаль берәмлекләр халкы инициативаларына ярдәм итү» дәүләт программасы һәм авыл халкының актив катнашуы ярдәмендә тормышка ашырылган. Бу хакта «Самара татарлары» хәбәр итә.

Россия Хөкүмәте киләсе елда балалар һәм яшүсмерләрдә артык авырлыкка каршы көрәш буенча комплекслы программа башлап җибәрәчәк. Бу хакта Россия вице-премьеры Татьяна Голикова социаль өлкәдә попечительлек мәсьәләләре буенча Министрлар Кабинеты Советы утырышында белдерде, дип яза ТАСС.

Татарстанда һава торышы начарлана: 1 һәм 2 декабрьдә көчле кар яву, буран һәм томан көтелә, ул юлларда җитди кыенлыклар тудырачак. Республика Дәүләт автоинспекциясендә шулай дип хәбәр иттеләр.