Новости за 04.12.2023

Күпбалалы ана, волонтер Венера Сабитова үзенең дуслары белән Мәскәүнең Н.Н.Бурденко исемендәге госпитальгә барачагын әйткәч, Актанышның Киров сөт комбинатында эшләүче хатын-кызлар җыелып бер төн эчендә 50 данә чәкчәк пешергән. Бу хакта «Актаныш» сайтында хәбәр ителә.

Кичә Мәскәү Татар мәдәни үзәгенең борынгы концертлар залында күренекле татар эшлеклесе һәм Советлар Союзы Героена багышланган «Җәлил оныклары» истәлекле концерты узды. Чара «Шагыйрь һәм музыка» Халыкара фестиваль кысаларында оештырылды. Бу хакта «Татар-информ» хәбәрчесе Дарья Сәйфиева яза.

Татарстан Гидрометеорология һәм әйләнә-тирә мохит мониторингы идарәсе аномаль салкын һава торышы турында кисәтә. 5-6 декабрь көннәрендә көчле җил, буран фаразлана.

Свердловск дәүләт академия музыкаль комедия театры «Очыш» («Полет») мюзиклын куячак. Ул легендар гимнаст бертуганнар Нәҗметдиноваларга багышлана. Премьера 14 декабрьдә була. Бу хакта Татарстан Республикасының Сверддловск өлкәсендәге даими вәкиллеге матбугат хезмәте хәбәр итә.

Россия Президенты Владимир Путин «Time» журналы версиясе буенча «Ел кешесе» исеменә дәгъва итүчеләрнең беренчел исемлегенә – шорт-битенә кергән. Җиңүче чәршәмбе көнне игълан ителәчәк, диелә әлеге язмада.

13 тапкыр узган шимбә ярминкәсендә Татарстан фермерлары барлыгы 993 млн сумлык авыл хуҗалыгы продукциясе саткан. Бу хакта Татарстан Авыл хуҗалыгы һәм азык-төлек министрлыгының матбугат хезмәте хәбәр итә.

«Миллиард.Татар» интернет-басмасы «Ел татарлары» рейтингы кысаларында «Елның иң яхшы татар айтишнигы» номинациясенә тавыш бирүне башлады. Номинантлар өчен «Миллиард.Татар» телеграм-каналында һәм «ВКонтакте» социаль челтәрендә тавыш бирергә мөмкин.

Сургут шәһәренең Татар үзәгендә татар хатын-кызлары өчен изү ясау буенча мастер-класс узган. Мастер-класста «Ак калфак» татар хатын-кызлары җәмгыяте активистлары, якшәмбе мәктәбе тәрбияләнүчеләре катнашкан. Бу хакта «Татарлар-Сургут» Сургут милли-мәдәни татар автономиясе социаль челтәрләрдәге сәхифәсендә хәбәр итә.

Татарстан Республикасы прокуратурасы ветераны Луиза Мирзахәсән кызы Туктарова 4 декабрьдә 94 яшендә вафат булды. Бу хакта республика прокуратурасы матбугат хезмәте хәбәр итә.

Киләсе елның 1 сентябреннән мәктәпләрдә башлангыч һәм урта сыйныфлар өчен хезмәт буенча мәҗбүри дәресләр кертүне Дәүләт Думасының мәгариф комитетында хуплаганнар. Төзәтмә укучыларга элемтә чараларын куллануны тыю турындагы закон проектына өстәмә булып тора, ул бүген беренче укылышта узды. Бу хакта РИА Новости хәбәр итә.

Россия Президенты Владимир Путин «Теләкләр чыршысы»нда булды. Чарадан видеоязманы журналист Павел Зарубин үзенең телеграм-каналында күрсәтте.

Татар китабы йортында «Мин сезгә васыять язам...» исеме астында чаралар циклы үтәчәк. Ул 8 декабрьдә башлана. Бу турыда Татар китабы йорты социаль челтәрләрдә хәбәр итте.

Олег Табаков театры сәнгать җитәкчесе, Россиянең халык артисты Владимир Машков Россия Федерациясе Театр эшлеклеләре берлегенең яңа рәисе итеп сайланды. Бу хакта ТАСС хәбәр итә.

Россиянең төзелеш һәм торак-коммуналь хуҗалык министры урынбасары Валерий Леонов Лисичанскида шәһәр инфраструктурасын торгызу өчен җаваплы ресурс һәм коммуналь оешма вәкилләре белән очрашу үткәрде.

Дәүләт абортларны тыю юлыннан бармаячак, дип белдерде Федерация Советы спикеры Валентина Матвиенко. Ул Россиядә демографик проблеманы хәл итүдә бернинди тыюлар да ярдәм итмәячәген ассызыклады, дип яза РИА Новости.

Дәүләт Думасының мәгариф комитеты мәктәпләрдә телефон куллануны хәтта белем бирү максатларында да тыю турындагы төзәтмәне хуплады. Бу хакта РИА Новости агентлыгы хәбәр итә.

Казахстанның экс-Президенты Нурсолтан Назарбаев Россия Президенты Владимир Путинга автобиографик китабының авторлык нөсхәсен җибәргән. Бу хакта Кремльнең рәсми вәкиле Дмитрий Песков хәбәр итә.

КФУның Филология һәм мәдәниятара багланышлар институтында язучылар Аяз Гыйләҗев һәм Арпад Галгоциның 95 еллыгына багышланган «Халыклар күңеленә үтеп керик!» кичәсе булды. Татар энциклопедиясе һәм төбәкне өйрәнү институты директоры, тарих фәннәре докторы Искәндәр Гыйләҗев Аяз Гыйләҗев һәм Арпад Галгоциның дуслыгы турында сөйләде.

Ульяновск шәһәренең «Киндяковка» мәдәният йортында эшләүче «Нур» татар халык театры үзенең чираттагы премьерасын тамашачыларга тәкъдим итте. Бу хакта «Өмет» газетасының телеграм-каналы хәбәр итә.

2021 елда казанлылар, мәйданчыкның түләү системасы камил булмавыннан файдаланып, танылган маркетплейстан 23 миллион сумнан артык акча урлаган.

XV Бөтенроссия «Һөнәр» яшь режиссура фестивале Кариев театры сәхнәсендә Ренат Әюповның «Ал җилкәннәр» спектакле белән ачылды. Бу хакта ТР Мәдәният министрлыгы матбугат хезмәте хәбәр итә.

Татарстанда 5-13 декабрьдә аномаль салкын һава торышы урнашыр дип көтелә, шул сәбәпле кисәтү игълан ителде.

4 декабрьдә 20:00 сәгатьтә ТНВ каналында татар телендә өр-яңа фильм күрсәтелә башлый. «Җиде юл чатында» дип аталган сериалны ТНВ белән «Ватан 21нче гасыр» кинокомпаниясе төшергән. Бу хакта телеканал сайтында хәбәр ителә.

14 декабрьдә, 19.00 сәгатьтә Татарстан Милли китапханәсендә урнашкан MOÑ театр мәйданчыгында язучы, Татарстанның халык шагыйре, җәмәгать эшлеклесе Разил Вәлиевкә багышланган кичә була. «Остазлар турында остазлар» дип исемләнгән кичәдә язучылар – Ркаил Зәйдулла, Ләбиб Лерон, Газинур Морат катнаша. Модератор – Баязит Зәйдуллин.

1 декабрьдән Руслан Ганиев Яшел Үзән районында урнашкан «Майский» теплица комбинатының яңа генераль директоры вазифасына кереште. Бердәм дәүләт юридик затлар реестры мәгълүматлары буенча формалаштырыла торган контрагентлар мәгълүмат базасында шулай диелә.