Кривичниот совет го потврди притворот на Зекири

Кривичниот совет на одделението за организиран криминал и корупција во Кривичниот суд Скопје, кој денеска одлучуваше по жалбата за одредениот притвор за ексгенералниот секретар на Владата Мухамед Зекири, го потврди решението на претходна остапка, што значи дека тој останува во притвор.

Во соопштението од Кривичниот суд се наведува дека по денешната јавна седница во присуство на странките, Кривичниот совет на одделението за организиран криминал и корупција го потврди решението на претходна постапка, со измени во основите кои постојат за определување на мерката притвор.

„Односно, советот го преиначи решението на претходна постапка на начин што ја укина точка 3 од чл. 165 ст.1, односно можност обвинетиот да го повтори делото“, се наведува во соопштението.

Другите две точки врз онова на кои е донесено решението за притвор – можност за бегство и влијание врз сведоци, вештаци, соучесниците или прикривачите остануваат.

Зекири однесен во притвор

Судија на претходна постапка, одлучувајќи по предлог на ОЈО ГОКК за определување мерка притвор, на 8 април донесе решение со кое го прифати предлогот и на осомничениот му определи мерка притвор во траење од 30 дена заради постоење на основите од чл. 165 ст.1 т.1,2 и 3 од ЗКП.

Зекири веднаш откако Јавното обвинителство за борба против организиран криминал и корупција издаде наредба за истражни дејства против него и уште двајца хрватски државјани, си поднесе оставка од функцијата генерален секретар на Владата. Истиот ден му беше определен притвор во траење од 30 дена.