Cовет өкіметі 1949-1989 жылдар аралығында Семей полигонында кемінде 468 ядролық сынақ жарылысын жасады. Қоршаған орта мен адамдарға орасан зор зиян тигізген оның зардабын халық әлі күнге шегіп келеді. Полигонға жақын жердегі Қарауыл ауылында тұрған фототілші Сабыржан Құсайыновтың жеке архивіндегі фотолардан Семей полигонында 1950 жылдарғы ядролық сынақта эксперимент үшін қойылып, жарылыс салдарынан қираған техникалардың қалдығын көруге болады.
Семей сынақ полигоны маңындағы халық арасында бейдауа дерт пен мезгілсіз өлім жиі болатыны жөнінде Азаттықта кейбір деректер сақталған. Оны жергілікті азаматтық хал актілерін тіркеу қызметі құжаттарымен салыстырып көрдік. Олардан алғашқы және соңғы сынақтар кезінде адамдардың дерті мен диагнозы қалай өзгергенін шамалауға болады.