Новости за 03.02.2023

Дәүләт автоинспекциясе хезмәткәрләре «Балкы, Түбән Кама!» исеме астында бию флешмобы үткәрде. Аны «Юл хәрәкәте иминлеге» учреждениесе, хокук саклау органнары, 9, 82, 83, 90 нчы балалар бакчалары һәм агросәнәгать көллияте әзерләде. Флешмоб Түбән Кама муниципаль районы башлыгы Рамил Муллин игълан иткән «Спортта 365 сәгать» челлендж кысаларында узды.

Пенза өлкәсе Югары Әләзән мәктәбендә «Дәрестә һәм дәрестән тыш эшчәнлектә телне, мәдәниятне, гореф-гадәтләрне саклау һәм укучыларга рухи-әхлакый тәрбия бирү» дигән темага семинар узды. Анда мәктәп директорлары, туган тел һәм әдәбият укытучылары катнашты.

Иртәгә, 4 февральдә, Татарстанда уртача салкын һәм болытлы һава торышы саклана. Урыны белән, шулай ук Казанда да, бераз кар явачак. Бу хакта Татарстан Гидрометеорология һәм әйләнә-тирә мохитне күзәтү үзәге хәбәр итә.

Ульяновск шәһәрендә Габделҗаббар Кандалыйның 225 еллыгына багышланган чара булды. Бу турыда «Өмет» газетасы телеграм-каналында хәбәр итте.

Бүген Татарстан Транспорт һәм юл хуҗалыгы министрлыгы коллегиясенең киңәйтелгән утырышы кысаларында Россия вице-премьеры Марат Хөснуллин юл хәрәкәте иминлеге мәсьәләләренә игътибарны юнәлтте.

Татарстанда бюджеттан тыш чыганакларны файдаланган очракта, Шәле (М7) - Баулы (М5) түләүле автомобиль юлы озынайтылырга мөмкин. Бу хакта Татарстан Транспорт һәм юл хуҗалыгы министрлыгы коллегиясенең йомгаклау утырышында Россия Хөкүмәте Рәисе урынбасары Марат Хөснуллин хәбәр итте.

Бүген Казанның «Спорт сарае»нда алкалы хоккей буенча «Дуслык кубогы» III бөтенроссия турниры ачылды. Тантанада Татарстан Премьер-министры Алексей Песошин, Континенталь хоккей лигасы президенты Алексей Морозов, дин әһелләре катнашты.

Юл төзелеше күләме буенча Татарстан, Мәскәүне исәпкә алмаганда, Россиядә беренче урында тора. Бу хакта Россия Хөкүмәте Рәисе урынбасары Марат Хөснуллин Татарстан Транспорт һәм юл хуҗалыгы министрлыгы коллегиясенең йомгаклау утырышында әйтте.

Төмән өлкәсенең Тубыл шәһәрендә «И туган тел, и матур тел» шигырен укучылар арасында ХХIХ ачык конкурс игълан ителде. Ул 1992 елның ноябрендә ЮНЕСКОның Генераль конференциясе игълан иткән Халыкара туган тел көненә багышланды. Тубыл шәһәрендә конкурс 1992 елдан бирле уздырыла.

Свердловск өлкәсеннән Дәүләт Думасында депутат Максим Иванов фикеренчә, мобилизация вакытында «кирәкле белгечләр, инженерлар, югары квалификацияле эшчеләр» урынына, беренче чиратта, эшсез кешеләрне чакырырга кирәк.

Татарстан мөфтияте Россия ислам институты һәм «Идел» журналы белән берлектә янәдән «Таян Аллаһка» бөтенроссия әдәби бәйгесен үткәрә. Әлеге конкурс Россия Федерациясендә яшәүче татарлар арасында талантларны барлау һәм берләштерү, аларның иҗади эшчәнлекләрен үстерү максатыннан уздырыла.

Татарстанда туристлык автобуслары паркын яңартырга һәм киңәйтергә кирәк. Республика Президенты Рөстәм Миңнеханов Татарстан Транспорт һәм юл хуҗалыгы министрлыгы коллегиясе утырышында шул хакта әйтте.

Бүген Мәскәүдә «Бердәм Россия» партиясе Генераль советының Халыкара хезмәттәшлек һәм чит илләрдә ватандашларга ярдәм итү комиссиясе утырышы узды. Анда Татарстан Дәүләт Советы Рәисе, партиянең республика бүлеге секретаре Фәрит Мөхәммәтшин катнашты. Бу хакта Татарстан парламентының матбугат хезмәте хәбәр итә.

Татарстанда онкология белән хисапта 115 меңнән артык кеше тора һәм бу рекордлы сан. «Татар-информ»да матбугат конференциясендә Татарстан Сәламәтлек саклау министрлыгының баш онкологы Эдуард Нагуманов шул хакта сөйләде.

Гыйнварның икенче яртысында Магнитогорск Халыклар дуслыгы йортында милли аш-су осталары «Татар бәлеше бәйрәме»нә җыелды. Татар мәдәнияте бүлеге хезмәткәрләре аны 2015 елдан бирле үткәреп килә.

Татарстан Президенты Рөстәм Миңнеханов Татарстанның Гаилә кодексына һәм «Мәгариф турында» гы Татарстан законына үзгәрешләр кертү турындагы законга имза куйды. Бу документ республика җитәкчесенең сайтында чыкты.

Узган ел Татарстанның күп функцияле үзәге офисларында күрсәтелә торган хезмәтләрнең гомуми саны 35кә артып, 287гә җиткән. Социаль әһәмияткә ия хезмәтләрнең үтемлелеге арткан, кайбер документларны, шул исәптән паспорт һәм машина йөртү таныклыгын рәсмиләштерү вакыты кимегән. Татарстанның күп функцияле үзәге директоры Ленара Мозаффарова ведомствоның йомгаклау коллегиясендә шулай дип белдерде.

Чит илдә ял итүне кулай күргән түрәләрне мәҗбүри «чиплаштырырга» кирәк, дип белдерде Дәүләт Думасының иминлек һәм коррупциягә каршы көрәш комитеты әгъзасы Солтан Хәмзәев. Моның өчен ул Россия иярчен датчикларыннан файдаланырга тәкъдим итте. Аның фикеренчә, мондый чараны чит илгә «шәхси эш буенча» чыгучыларга карата гына кулланырга кирәк. Бу хакта РИА Новости агентлыгы хәбәр итә.

Татарстан башкаласыннан Лисичанскига 100 тоннага якын авырлыктагы гуманитар йөк белән биш фура юлга чыкты. «Игелекле Казан» эгидасы астындагы фуралар Татарстанга шефлыкка алынган шәһәр халкына азык-төлек, төзелеш материаллары һәм автоном дизель казанын китерәчәк.

Стопкоронавирус.рф порталы мәгълүматларыннан күренгәнчә, соңгы тәүлектә Татарстанда коронавирус инфекциясенең 76 яңа очрагы ачыкланган, 31 кеше хастаханәгә озатылган. Узган тәүлектә республикада ковидтан терелгән кешеләр дә, шулай ук коронавирус корбаны булган пациентлар да теркәлмәгән.

Әдәбият белгече 93 яшендә вафат булды.

4 февральдә, Казанның «Туган авылым» милли-туристлык комплексында Бөтендөнья хиҗаб көне уңаеннан тантаналы чара - Казанның танылган мөселман хатын-кызлары, хатын-кызлар оешмалары җитәкчеләре, остазлар, мөгаллимәләр һәм җәмәгать эшлеклеләре очрашуы узачак.

Татарстанстат мәгълүматларыннан күренгәнчә, узган атнада, 23-30 гыйнварда, Татарстанда җиләк-җимеш, яшелчә һ.б. азык-төлекнең бәясе күтәрелгән. Әйтик, кыяр аеруча нык кыйммәтләнгән, хәзер аның бер килограммы 214 сум (элегрәк 202 сум иде) тора.

Лениногорск муниципаль районының бер авыл җирлеге Советы депутаты, элеккеге фирма директорына карата кузгатылган җинаять эше судка тапшырылган. 56 яшьлек хатын-кыз акча үзләштерүдә гаепләнә, дип хәбәр итә ТР буенча Эчке эшләр министрлыгының матбугат хезмәте.

Яңа үрнәктәге, гамәлдә булу вакыты 10 ел тәшкил иткән чит ил паспортлары бирүнең вакытлыча туктатылуы Татарстанда «Минем документлар» офислары клиентлары арасында киеренкелек китереп чыгармады. Татарстанның күп функцияле үзәге директоры Ленара Мозаффарова ведомствоның йомгаклау коллегиясеннән соң «Татар-информ» агентлыгына шулай дип белдерде.