Новости за 11.02.2023

Аксубай районында «Татарстанда «Россия чаңгы юлы» ярышларына 1300дән артык кеше катнашты. Мәктәп укучылары, эшләүче яшьләр, өлкәннәр, пенсионерлар, сәламәт яшәү рәвешен яратучылар районның төп чаңгы юлына басты.

Әлмәттә машина кую урыннары җитмәү проблемасын яңа төзелешләрне проектлау этабында хәл итәчәкләр. Бу хакта район башлыгы Тимур Нагуманов 10 февральдә узган хисап сессиясендә белдерде. Сессия эшендә Татарстан Республикасы Рәисе Рөстәм Миңнеханов катнашты. Бу хакта «Әлмәт таңнары» сайтында хәбәр ителә.

Апаста «Татарстан чаңгы юлы-2023» спорт бәйрәме узды. Биредә балалар бакчасында тәрбияләнүче балалар, район мәктәпләре укучылары, аграр көллият студентлары, оешма җитәкчеләре, хезмәткәрләре, муниципаль хезмәткәрләр һәм ветераннар катнашты.

Кукмара районында социаль-икътисади үсеш нәтиҗәләренә багышланган сессия булды.Ул үткән елгы социаль-икътисади үсеш нәтиҗәләренә һәм 2023 елга билгеләнгән бурычларга багышланган иде.

Төркиянең көньяк-көнчыгышындагы Хатай провинциясендә җир кабыгында 200 метр озынлыктагы һәм 30 метр тирәнлектә җир убылган, ягъни ярылган урын барлыкка килгән. Ул 7,8 магнитудалы ике җир тетрәү нәтиҗәсе булды, дип хәбәр итә IHA Haber телеканалы. Гигант ярыкны дрон ярдәмендә күргәннәр һәм төшереп алганнар.

Иртәгә, 12 февральдә, Татарстанда җылы, әмма карлы һәм җилле һава торышы сакланачак. Бу хакта республиканың Гидрометеорология үзәге хәбәр итә.

Төркиянең көньяк-көнчыгышында булган зур җир тетрәүләр аркасында үлүчеләр саны 20 937 кешегә җитте. Бу хакта Төркиянең гадәттән тыш хәлләр идарәсе хәбәр итә, дип яза ТАСС.

Татарстан Республикасының Милли музее һәм Г.Тукай әдәби музее мәктәп укучыларын «Ядкярләрдә Тукай рухы» әдәби конкурсында катнашырга чакыра.

Бүген Казанда «Татарстанның иң яхшы яшь галиме –  2022» республика конкурсында җиңүчеләрне һәм ТР махсус дәүләт стипендиясе ияләрен хөрмәтләделәр. Чарада ТР Дәүләт Советы Рәисе Фәрит Мөхәммәтшин катнашты. Ул республикада фәнни эшчәнлекне стимуллаштыру өчен грант һәм стипендия программалары, фәнни премияләрне дә кертеп, төрле ярдәм чаралары гамәлдә булуын билгеләп үтте.

Россия мөселманнары Диния нәзарәте рәисе мөфти шәех Равил Гайнетдинның хәер-фатихасы белән 2023 елда Россиянең күренекле мөселман теологы һәм тарихчысы Хөсәен Фәезханов (1823-1866) тууына 200 ел булуны бәйрәм итүгә әзерлек һәм аны үткәрү буенча оештыру комитеты төзелә. Россия Мөфтиләр шурасы шул турыда яза.

Татарстанда коронавирус белән авыручыларның теркәлгән саны арта бара. Бүген 94 кешедә Covid-19 расланган. Кичә 89 кешедә, 9 февральдә 83 кешедә, 8 февральдә 78 кешедә расланган булган. Стопкоронавирус.рф порталы мәгълүматлары шуны күрсәтә.

Яңа Шигали бистәсендәге шәхси йортта янгын чыгуның ике төп сәбәбе карала.

Татарстан Премьер-министры Алексей Песошин традицион республика киңәшмәсендә муниципаль районнарда инженер-техник инфраструктурада аварияләр санына һәм сәбәпләренә анализ ясарга йөкләмә бирде. Бу хакта Татарстан Республикасы Рәисенең матбугат хезмәте хәбәр итә.

10 февральдә Татарстан Язучылар берлегенең Идарә утырышы узды. Утырышта ике идарә арасында эшләнгән эшләргә хисап тотылды, Габдулла Тукай исемендәге Дәүләт премиясенә һәм Максим Горький исемендәге әдәби премиягә кандидатлар тәкъдим ителде.

Татарстанда 11 февральгә 503 мең кв.метр торак төзелгән, бу 2023 елга планлаштырылган 830 мең кв. метрның 16 процентын тәшкил итә. Бу хакта Татарстан Республикасы Хөкүмәте Йортында узган республика киңәшмәсендә төзелеш, архитектура һәм торак-коммуналь хуҗалык министры Марат Айзатуллин хәбәр итте.

Республика клиник хастаханәсенең матбугат хезмәтендә Питрәч районындагы Яңа Шигали бистәсендә янгыннан чыга алган ана белән баланың хәле турында сөйләделәр.

Татарстан Республикасында дүрт кеше һәлак булган янгынга бәйле «Саксызлык аркасында үлемгә китерү» маддәсе буенча җинаять эше кузгатылды. Россия Тикшерү комитетының Татарстан Республикасы буенча идарәсе җитәкчесенең өлкән ярдәмчесе Андрей Шептицкий шул турыда хәбәр итте.

Казанда күрмәүче һәм начар күрүче кешеләрне укыту һәм реабилитацияләү буенча җиде курс эшли башлаячак. Россиянең төрле төбәкләреннән аларда 245 инвалид катнашачак. Алар Луи Брайль системасы буенча уку һәм язу, гарәп телен һәм башка фәннәрне өйрәнәчәк, компьютер белемнәре үзләштерәчәк.

Яңа Шигали бистәсендә чыккан янгында үлгән өченче баланың мәете 9.47 сәгатьтә табылды, дип сөйләделәр Россия Гадәттән тыш хәлләр министрлыгының Татарстан буенча Баш идарәсе матбугат хезмәтендә.

Бүген иртән Татарстанның Питрәч районында Яңа Шигали бистәсендә иртәнге сигезенчедә янгын чыккан.

Буа мәдрәсәсендә көндезге бүлек шәкертләре арасында «Ислам белгече» бәйгесе уздырылды. Бәйгедә көндезге бүлектә укучы барлык шәкертләр өч командага бүленеп жюри каршында сынау тотты.Бу хакта ТР Диния нәзарәте матбугат хезмәте хәбәр итте.

Мошенниклар кеше исеменә рәсмиләштергән кредитларны түләргә кирәкми. Ссуданы чит кеше рәсмиләштергәне турында полициягә, кредит оешмасына һәм кредит тарихлары бюросына мөрәҗәгать итәргә кирәк. «Честное слово» онлайн микрокредитация сервисы генераль директоры Андрей Петков «РИА Новости»га шул турыда сөйләгән.

Төркиядә җир тетрәү корбаннары саны 20 665 кешегә кадәр җитте, яралылар – 80 меңнән артык, дип хәбәр итте Төркиянең гадәттән тыш хәлләр нәтиҗәләрен булдырмау һәм бетерү идарәсе (AFAD).

Чаллыда «Бизнес башлауда остаз» иҗтимагый проекты башлана. Ул яшь эшмәкәрләр санын арттыру максатыннан оештырыла. Ул «Бердәм Россия» һәм Рост партиясе белән берлектә оештырыла. Хәзерге вакытта гаризалар кабул итәләр. Бу хакта «Шәһри Чаллы» хәбәр итә.

Татарстан Республикасы урман хуҗалыгы министры Равил Кузюров кичә Питрәч һәм Чистай муниципаль районнарында эш сәфәрендә булды. Анда ул 2023 елда янгын чыгу куркынычы янаган чорга һәм урман культуралары сезонына әзерлек мәсьәләләре буенча киңәшмә үткәрде. Бу хакта Татарстан Урман хуҗалыгы министрлыгының матбугат хезмәте хәбәр итә.