Новости за 02.08.2023

Аксубай районы мәгариф учреждениеләре Лисичанск шәһәре өчен гуманитар ярдәм әзерли. Аны җыюда район мәгариф учреждениеләре актив катнаша. Бу хакта «Авыл таңнары» хәбәр итә.

«Казан» гаилә үзәге каршындагы мәйданчыкта «РФ Кораллы көчләрендә контракт буенча хәрби хезмәт – Синең сайлавың!» акциясе узачак. Чара «Мин күкне сайлыйм» бәйрәме көнендә оештырыла.

Казанның 131 нче лицеен тәмамлаган Никита Перов РФ премьер-министры Михаил Мишустинның халыкара олимпиадаларда җиңүчеләр белән очрашуында катнашты. Ул Хөкүмәт башлыгыннан аңа иң зур тәэсир калдырган китаплар турында кызыксынды. Видеоны Министрлар Кабинеты матбугат хезмәте чыгарды.

Төркмәнстан Татарстан белән хезмәттәшлек итә һәм республика вәкилләренең сәфәрләре аның өчен традиционга әверелде, дип билгеләп үтте Россия Федерациясенең Төркмәнстандагы гадәттән тыш һәм гулы вәкаләтле илчесе Иван Волынкин. Аның сүзләренчә, көз көне Ашхабадта Татарстан Республикасы Рәисе Рөстәм Миңнехановны эш сәфәре белән көтәләр.

Һава-десант гаскәрләре көнендә Менделеевскта тантаналы митинг узды. Район башлыгы Радмир Беляев хәрби хәрәкәтләр ветераны таныклыкларын десантчыларга — махсус операциядә катнашучы рядовой Игорь Бажановка һәм Ренат Гыйләҗевка тапшырды.

Бу җәйдә Төркия беренче тапкыр Россия туристлары өчен иң кыйммәтле илләр исемлегенә керде. Сәяхәт бәясе буенча беренче урында Мальдив утраулары кала, иң арзан юнәлеш – Россия, дип хәбәр итә «Интерфакс». Агентлык бу турыда Россия туроператорлары ассоциациясенең (АТОР) башкарма директоры Майя Ломидзега сылтама белән яза.

Рөстәм Миңнеханов хәрби махсус операциядә катнашучы подполковник Ирек Мәгъсүмовка телеграмма җибәрде. Ул аны Россия Федерациясе Герое исеменә лаек булуы белән котлады.

Казан ипподромы директоры Марат Гыйльфановка сак чарасы үзгәртелде. Гыйльфанов өй арестыннан азат ителә, аңа билгеле бер гамәлләрне тыю рәвешендә сак чарасы сайлана, дип хәбәр итәләр Совет районы судының матбугат хезмәтендә.

Россиянең Мисыр, Марокко, Тунис һәм Алжир белән сәүдә итүе турында килешүләр әзерләнә, дип хәбәр итте Россия Президенты Владимир Путин. Ул Африканың башка илләрен дә күздән ычкындырмаска чакырды, аларның да үзара файдалы хезмәттәшлек өчен зур потенциалы бар. Бу хакта РИА Новости хәбәр итә.

Рөстәм Миңнеханов махсус хәрби операциядә катнашучы, Мамадыш районында туган подполковник Ирек Мәгъсүмовның бүләкләнүенә ихтирамын белдерде. Ул бөтен республиканың аның белән горурлануын белдерде һәм Россияне яклаучыларга рәхмәт җиткерде.

Евро һәм доллар июль антирекордларын яңартуны дәвам итәләр. Мәсәлән, евро бүген төштән соң 102 сумнан артып киткән, дип китерелә Мәскәү биржасы мәгълүматларында. Доллар курсы «иртәгә» исәп-хисаплары белән 70 тиенгә артып, 93,03 сумга җитте. Антирекордларның сәбәпләрен һәм рубльнең көчсезләнүе дәвам итәрме-юкмы икәнен «Татар-информ»га «Арикапитал» идарәче компаниясе генераль директоры Алексей Третьяков сөйләде.

Бүген Татарстанның Нурлат районыннан дүрт кеше контракт буенча хезмәт итү өчен махсус хәрби операция зонасына юл тотты. Аларны тантаналы рәвештә Нурлат хәрби комиссариатыннан озаттылар, дип хәбәр итә «Нурлат-информ».

Кыска тәнәфестән соң Татарстанга аномаль эсселәр кире кайта. Россия Гидрометеоүзәге фаразлавынча, атна ахырында Казанда көндезге сәгатьләрдә һава температурасы +32 градуска кадәр күтәреләчәк. КФУ профессоры Юрий Переведенцев безнең полосада җәйнең соңгы ае өчен гадәти булмаган эссе һава торышының сәбәпләрен аңлатты.

Чаллыда яшәүче ир-атка 1,5 миллион сум бурычын түләмәгән өчен Россиядән читкә чыгу тыелган, банк счетлары һәм күчемсез милеге кулга алынган. Бу хакта Республика суд приставлары идарәсе матбугат хезмәтендә хәбәр иттеләр.

Филология фәннәре докторы, профессор Зөфәр Рәмиев филология фәннәре кандидаты Марсель Ибраһимов Габдулла Тукайның барлык әсәрләрен диярлек рус теленә тәрҗемә итеп чыгарырга исәпләвен әйтте.

Мәскәү Кремлендә бүләкләү тантанасында махсус операциядә катнашучы подполковник Ирек Мәгъсүмов катнашты. Татарстанның Мамадыш районында туган кыю ир-егеткә Россия Герое исеме бирелде.

10 августта Әдәби кафеда Равил Сабырның Татарстан китап нәшриятында басылып чыккан «Фәхрине үтереп ташладылар» дип исемләнгән китабын укучыга тәкъдим итү кичәсе, автограф-сессиясе узачак.

Кабан күле буенда 3 августта «Хәрәкәттә – бәрәкәт» проектының чираттагы дәресе узачак. Бу юлы Казан халкын һәм кунакларын Самара татар-мишәрләре биюенә өйрәтәчәкләр.

Сәламәтлек саклау министрлыгы кайбер хезмәтләр 1 сентябрьдән түләүле булачак, дигән мәгълүматны кире какты. Бу хакта ТАССка Россия Сәламәтлек саклау министры ярдәмчесе Алексей Кузнецов сөйләде.

Бүген Татарстан мөфтиятендә «Абыстайлар җыены» дип исемләнгән беренче форум үтте. Әлеге форумга Татарстанның 35 районыннан мөслимәләр берлеге җитәкчеләре һәм Казанның барлык мәчетләреннән абыстайлар җыелды. Биредә республика абыстайлары үз эшчәнлекләрендә төп юнәлешләрне билгеләп, нәтиҗәле эш алып бару өчен бергәләп фикер алышырга, тәҗрибә уртаклашырга җыелды.

Казанда 95 яшендә парашюттан соңгы сикерүен башкарган Россиянең иң өлкән десантчысы Павел Клентнев бюстын урнаштырырга планлаштыралар. Бу хакта «Татар-информ» журналистына Советлар Союзы Герое Борис Кузнецов исемендәге Казан кадетлар мәктәп-интернаты каршындагы «Яшь десантчы» хәрби-патриотик клубы җитәкчесе Тәлгать Камалиев хәбәр итте.

Нәзарәтнең «Зәкят» хәйрия фондында күпбалалы һәм мохтаҗ гаиләләрдә тәрбияләнүче балалар өчен рухи-сәламәтләндерү курслары эшли башлады. Ул 9-15 яшьлек 11 бала өчен исәпләнгән. Әлеге курслар балаларга ял итү белән беррәттән, рухи һәм физик торышны да яхшыртырга мөмкинлек бирәчәк.

Бүген көн дәвамында һәм иртәгә, 3 августта, Татарстан территориясендә кыска вакытлы яшенле яңгыр көтелә. Җилнең тизлеге секундына 20 метрга кадәр көчәячәк.

Бөгелмә районы башлыгы Линар Закиров Эдуард Мазакинга «Батырлык өчен» медале тапшырды. Хәрби хезмәткәр РФ Президенты Владимир Путинның 2023 елның 13 маендагы указы нигезендә бүләккә лаек булды, дип хәбәр иттеләр «Татар-информ»га ТР Бөгелмә районы матбугат хезмәтендә.

Башкортстан башлыгы Радий Хәбиров белән сөйләшүдән соң, Уфада шосседа граната шартлату белән янаган хәрби хезмәткәр хокук саклау органнарына бирелде, дип хәбәр итә РИА Новости.