Новости за 04.08.2023

Казанлы Дмитрий Долженков сурдлимпиячеләрнең I җәйге уеннарында теннисчылар арасында «Без бергә. Спорт» ялгыз һәм парлы разрядларда җиңү яулады. Ярышлар Уфада 23 июльдән 2 августка кадәр барды. Бу хакта Татарстан Спорт министрлыгы матбугат хезмәте хәбәр итә.

Казанда 5 августта алмашынучан болытлы һава торышы көтелә, башлыча явым-төшемсез булачак. Төнлә һава температурасы +17..+19 градус тәшкил итәчәк, көндез синоптиклар +30..+32 градуска кадәр вәгъдә итә. Урыны белән секундына 12 метрга кадәр кыска вакытлы җилләр фаразлана.

Россия Президенты Владимир Путин II дәрәҗә «Укуда аерым уңышлары өчен» көмеш медальләре бирү турындагы законга кул куйды. Укудагы уңышлары белән аерылып торган укучыларны яңа уку елыннан бүләкли башлыйлар. Документ хокукый мәгълүматның рәсми порталында чыкты.

Соңгы 20 елда Казанда уртача температура 1 градуска күтәрелде. Тиздән шәһәрдә тагын да көньяк климат урнашырга мөмкин. Бу хакта «Интервью без галстука» тапшыруында Казан федераль университетының метеорология, климатология һәм экология кафедрасы доценты Тимур Әүхәдиев сөйләде.

Дәүләт Думасында Россия Президенты Владимир Путинның түрәләрне үзебезнең ил автомобильләренә күчереп утырту инициативасын хуплыйлар. Бу хакта Россия парламентының түбән палатасы рәисе Вячеслав Володин әйтте.

Кемеровода «Кузбасс һәм Көньяк Себер татарлары: тарих һәм бүгенге» дигән бөтенроссия фәнни-гамәли конференция булды. Бу хакта Бөтендөнья татар конгрессының матбугат хезмәте хәбәр итә.

Россиядә мобилизациянең яңа дулкыны планлаштырылмый. Бу хакта «Газет.Ru»га Дәүләт Думасының оборона комитеты рәисе Андрей Картаполов мобилизациядән качкан өчен җинаять җаваплылыгы турындагы закон проектын шәрехләп белдерде.

Татарстан Лисичанск балаларына уникаль мәктәп төзеп бирәчәк.

Билгеләп үтелгәнчә, учреждениенең өченче каты бары тик чыгарылыш сыйныф укучылары өчен булачак. Барлык сыйныфлар һәм коридорлар офис стилендә була. Шулай итеп, укучылар студентлар тормышына әзерләнә алачак.

Яңартылган мәктәпнең икенче каты тулысынча патриотик тематикага багышлана. Мәгълүмат стендлары һәм плакатлары ярдәмендә балалар Россия тарихын өйрәнә, үзидарә көнен үткәрә алачак. Беренче кат башлангыч мәктәп укучылары территориясе була. Читать дальше...

Узган елның мартыннан беренче тапкыр евроның бәясе 105 сумннан артты. Бу хакта Мәскәү биржасы хәбәр итә.

Россиядә хәрби исәпкә алынырга тиешле гражданнарга эш яки уку урыны буенча повестка җибәрелгән вакытта һәм военкоматка килгәнче илдән чыгуны тыйдылар. Бу законга Россия Президенты Владимир Путин имза куйды.

Уфа татар театрының иҗат коллективы җәйге ялдан соң яңа сезонда беренче тапкыр җыелды. Директор Фирзат Габидуллин артистларны эшкә чыгулары белән котлады һәм аларны бу елга планнар белән таныштырды. Аерым алганда, сүз гастрольләр һәм яңа спектакльләр турында барды. «Башинформ» шул хакта хәбәр итә.

2023 ел башыннан Татарстан автоинспекторлары ришвәт бирүнең 38 омтылышын һәм 407 коррупция фактын туктаткан. Бу хакта республика Дәүләт автоинспекциясендә хәбәр иттеләр.

2 август көнне Мәҗит Гафуринең мемориаль йорт-музеенда Башкортстанның беренче халык шагыйре Мәҗит Гафури тууга 143 ел һәм язучыга Башкортстанның халык шагыйре исеме бирелүгә 100 ел тулуга багышланган шигъри-музыкаль чара узды. Бөтендөнья татар конгрессы шул турыда яза.

Татарстан Рәисе Рөстәм Миңнеханов Телеграм-каналында бүген Алабугада ачылган Спас ярминкәсеннән фотолар күрсәтте.

Вакытлы хәрби хезмәткә чакыруның югары чиге 30 яшькә кадәр арттырылды. Россия Президенты Владимир Путин 1993 елның 28 мартында гамәлгә куелган «Хәрби бурыч һәм хәрби хезмәт турында»гы федераль законга шундый үзгәрешләр кертте.

Бүген, 4 августта, «Мөхәммәдия» мәдрәсәсендә абитуриентлар өчен көндезге бүлеккә укырга керү сынауларының чираттагысын тапшыра – әңгәмә уза. Мәдрәсә мөгаллимнәре составындагы кабул итү комиссиясе 150 егет һәм 170 кыз белән әңгәмә кора: аларның ислам нигезләре, Коръән уку буенча белем-күнекмәләрен, шулай ук татар телен белү дәрәҗәсен тикшерә. Татарстан Республикасы мөселманнарының Диния нәзарәте шул турыда хәбәр итә.

Яшел Үзәндә «Метеор-2020»не суга төшерү тантанасы булды. Судно Советлар Союзы Герое Муса Җәлил исемен йөртә.

Татарстанның Мамадыш районында яшәүче Нәзирә Мәгъсүмова медаль белән бүләкләнде. Бу хакта «Татар-информ»га районның матбугат хезмәтендә хәбәр иттеләр.

Казанда Азинода күренекле энергетик Форель Тинчурин хөрмәтенә аның исеме белән аталган 110 кВтлы яңа цифрлы подстанция ачылды. Ул процесслар автоматлаштырылган һәм ябык типтагы Татарстан Республикасы башкаласындагы икенче станция. Тантанада республика премьер-министры Алексей Песошин катнашты.

Татарстанда синоптиклар фаразлары буенча +30 градуска кадәр эссе һава торышы көтелә, шуңа бәйле рәвештә республика Дәүләт автоинспекциясе машина йөртүчеләрне сак булырга кирәклеге турында кисәтә.

Июль аенда җиңел автомобильләргә ихтыяҗ узган ел белән чагыштырганда 2,7 тапкырга арткан. Гомумән алганда, Россиядә 30 көн эчендә 95,7 мең яңа машина сатылган, дип хәбәр итә ТАСС «Автостат» аналитик агентлыгы мәгълүматларына сылтама белән.

Башкортстан Республикасының Туймазы районы Төмәнәк авылының «Бабай утары» этнографик музей биләмәсендә үзешчән фольклор ансамбльләрнең «Җырлыйк әле» дип аталган төбәкара фестиваль-бәйгесе үтте. Чарада Бөтендөнья татар хатын-кызлары хәрәкәтенең иҗтимагый координацион советы рәисе, региональ «Ак калфак» татар хатын-кызлары иҗтимагый оешмасы рәисе Кадрия Идрисова катнашты. Бөтендөнья татар конгрессы шул турыда хәбәр итә.

31 июльдә Алтай краенда юл-транспорт һәлакәтендә һәлак булган филология фәннәре докторы, профессор Ләйсән Абдулхакова белән бүген Казан федераль университетының Физика институты бинасында хушлаштылар. Ул – Казан университетының филология факультетының элеккеге деканы, профессор Диләрә Тумашеваның кызы, икътисад факультетының элеккеге доценты Айдар Тумашевның апасы.

Чиләбе өлкәсе Коншак районы Коншак авылында 18-20 августта үтәчәк Милли спорт төрләре буенча I Спартакиада программасында 7 төрле юнәлештә ярышлар оештырылачак. Бу хакта Бөтендөнья татар конгрессы сайты хәбәр итә.

Татарстан вице-премьеры – Татарстан Республикасының Россия Федерациясендәге Тулы вәкаләтле вәкиле Равил Әхмәтшин Мәскәүдә дөньякүләм дәрәҗәдәге татар разведчигы Исхак Әхмәровның кызы Екатерина Әхмәрова белән очрашты. Ул үзе белән легендар әтисенең әйберләрен алып килгән, алар Казандагы музей комплекс экспонатлары булачак.