Новости за 19.08.2023

«Тәтеш урман хуҗалыгы» ДБУ белгечләре «Экология» илкүләм проектының «Татарстан Республикасында урманнарны саклау» федераль проекты кысаларында базислы урман питомнигында чәчүлекләрне карау буенча эшләр алып бара. Бу хакта Татарстан Урман хуҗалыгы министрлыгының матбугат хезмәте хәбәр итә.

Түбән Камада балалар товарларының, шулай ук мәктәп кирәк-яракларының сыйфаты һәм иминлеге мәсьәләләре буенча «кайнар элемтә» эшли. Бу хакта «Туган як» сайтында хәбәр ителә.

Алабугада төзелгән йортлар Курган өлкәсенең Йолдыз татар авылында янгыннан зыян күрүчеләргә җибәреләчәк. Каркас-модульле агач йортларны Алабуганың «ДомоСтроительный Комбинат Клееных Модульных Конструкций 2» предприятиесендә җитештерәләр. Янгыннан зыян күрүчеләр өчен барлыгы 18 йорт төзү планлаштырыла. Бу хакта «Алабуга нуры» хәбәр итә.

Чабаксар участок урманчылыгы территориясендә урман хезмәткәрләренең күчмә утырышы узды. Семинар-киңәшмәдә урманчылар, участок урманчылыкларының урман мастерлары, Аксубай урманчылыгы һәм урман хуҗалыгы аппараты белгечләре катнашты. Бу хакта «Авыл таңнары» сайтында хәбәр ителә.

Татарстан Рәисе Рөстәм Миңнеханов эш сәфәре белән Венгриягә килде. Анда ул Венгрия дәүләтенә нигез салынган көн дип саналган Изге Иштван көне уңаеннан үткәрелә торган чараларда катнашачак. Бу хакта республика җитәкчесенең матбугат хезмәте хәбәр итә.

Коръәнне мыскыл иткән өчен җинаять җәзасын халыкара дәрәҗәдә кертергә кирәк. Бу хакта РИА Новостига Төньяк Кавказ мөселманнарының Координацион үзәге рәисе Исмаил Бердиев сөйләде.

Кичә Филология фәннәре докторы, профессор, Казан федераль университетының профессор-консультанты, Татарстан Республикасы Фәннәр академиясе академигы, Россия лингвистика фәннәре академиясе академигы Мирфатыйх Зәкиев вафат булды. Галим белән хушлашу иртәгә Самосырово мөселман зираты янында 11.00 сәгатьтә була.

Татарстан Рәисе Рөстәм Миңнеханов Россия Тышкы эшләр министрлыгына республикага күрсәтелгән ышаныч өчен рәхмәт белдерде. Яшь дипломатларның глобаль форумы Татарстан башкаласында икенче тапкыр уза. Шулай ук республика җитәкчесе үзенең телеграм каналында форумнан видео да урнаштырды.

Татарстан аграрийлары 3 млн тоннадан артык ашлык җыеп алган, гектардан уртача уңыш 26,3 центнер тәшкил итә. Барлыгы 1,1 млн гектардан артык чәчүлек мәйданыннан уңыш җыеп алынган. Бу хакта «Татар-информ»га Татарстан Авыл хуҗалыгы һәм азык-төлек министрлыгында хәбәр иттеләр.

Татарстан Дәүләт Советы Рәисе Фәрит Мөхәммәтшин XVI Тарихи техника фестиваленә старт бирде, анда бөтен Россиядән борынгы машиналар яратучылар килде. Югары Ослан районының «Зөя калкулыклары» шәһәр-курортына барлыгы 360 берәмлек авто- һәм мототехниканың уникаль үрнәкләре килгән.

Байбулат Батулланың «Ядәч! Истә!» фильмының премьерасы «Короче» фестивалендә булды. Фильм дебютларның тулы метражлы яңа программасының төп конкурсында катнашты. Бу хакта фильм авторлары хәбәр итә.

ТР Дәүләт Советы Рәисе Фәрит Мөхәммәтшин Россия һәм Татарстан Фәннәр академиясе академигы, филология фәннәре докторы Мирфатыйх Зәкиевның гаиләсенә, хезмәттәшләренә һәм укучыларына кайгы уртаклашу белдерде.

14 яшьлек Айназ Гарифуллин җәйге ялын басуда, әтисенә ярдәм итеп үткәрә.

Казанның Краснококшайская урамында кредит оешмасы хезмәткәрен чүкеч белән сугып үтергән Марий Эл республикасының элеккеге депутатын гаепле дип таптылар. Бу хакта Россия Тикшерү комитетының Татарстан буенча Тикшерү идарәсе җитәкчесенең өлкән ярдәмчесе Андрей Шептицкий хәбәр итте.

Мирфатыйх Зәкиев эшләгән чор институтның фәнни югарылыкка күтәрелгән чоры дип саный филология фәннәре кандидаты, әдәбият галиме Зөфәр Мөхәммәтшин.

Махсус хәрби операциядән кайткан кешеләр белән эшләүдә аларның дәвалануы, реабилитация һәм хәрби табиблар комиссиясе узуы җитди проблема булып кала. Хәзер хәрбиләрнең туган төбәгендә, яшәү урыны буенча хәрби табиблар комиссиясе узу мәсьәләсе күтәрелә. Бу хакта «Татарстан-24» өчен интервьюда Татарстан Десантчылар берлеге рәисе Юрий Суворов сөйләде.

Дүшәмбе, 21 августта, Татарстанда мәгариф мәсьәләләре буенча кайнар элемтә уза. Халык балалар бакчаларына, мәктәпләргә (1 һәм 10 сыйныфларга), урта махсус уку йортларына, югары уку йортларына балаларны кабул итү проблемалары турында хәбәр итә ала.

18 августта Казан белән Киров арасында туры авиоэлемтә ачылды. Беренче самолет 22.00 сәгатьтә Кировның Победилово аэропортыннан очты. Бу хакта өлкә Хөкүмәтенең матбугат хезмәтендә сөйләделәр.

Якындагы көннәрдә Көньяк һәм Төньяк Кавказ федераль округларында һава температурасы 33-39 градус була. Россия Гидрометеорология үзәгенең фәнни җитәкчесе Роман Вильфанд билгеләп үткәнчә, бү температура Төркиянең көньягындагы климат белән чагыштырырлык. РИА Новости шул хакта хәбәр итә.

Россиядә яшәүчеләрнең кайбер категорияләренә керүчеләрнең сентябрьдә пенсияләрен индексациялиләр. Бу турыда «Прайм»га Г.В.Плеханов исемендәге Россия Икътисад университетының финанслар һәм бәяләр кафедрасы профессоры Юлия Финогенова сөйләде.

Филология фәннәре докторы, профессор, Казан федераль университетының профессор-консультанты, Татарстан Республикасы Фәннәр академиясе академигы, Россия лингвистика фәннәре академиясе академигы Мирфатыйх Зәкиев вафат булу сәбәпле, Казан федераль университеты җитәкчелеге һәм хезмәт коллективы мәрхүмнең туганнары һәм якыннарының тирән кайгысын уртаклаша.

Югары Ослан районында юл-транспорт һәлакәте фаҗига белән тәмамланган. Бу хакта республика Дәүләт автоинспекциясендә хәбәр иттеләр.

Бәйрәм төрле милләт вәкилләре арасындагы дуслыкны күрсәтә.

Министрлар Кабинеты махсус социаль түләүләр алучы медицина хезмәткәрләре исемлеген киңәйтте. Хәзер аларга медицина белеме булмаган хезмәткәрләр дә дәгъва итә. Карар хокукый мәгълүмат порталында чыкты. ТАСС шул хакта яза.

19 августта Татарстанда алмашынучан болытлы һава көтелә, иртән һәм көндез җил секундына 15-20 метр тизлектә фаразлана. Бу турыда Татарстан Гидрометеорология һәм әйләнә-тирә мохитне күзәтү үзәге матбугат хезмәте хәбәр итә.