Новости за 11.10.2023

10 октябрьдә Татарстан Язучылар берлегенең Чаллы бүлеге Өлкәннәр көне уңаеннан зур мәҗлес уздырды. Анда сиксәннән артык сәнгать һәм каләм әһеле катнашты. Бу хакта «Шәһри Чаллы» хәбәр итә.

«Европа цивилизациясенең язу тарихы» интернет-порталы презентациясе октябрь аенда Казанда «Европа цивилизациясе язу тарихы һәм Россия халыкларының язу культурасы» халыкара фәнни конференциясе кысаларында узачак. Гадәти булмаган интернет-ресурс мөмкинлекләре турында бүген «Татар-информ»да узган матбугат конференциясендә катнашучылар сөйләде.

Октябрьнең икенче декадасында Татарстан территориясендә аномаль җылы һава торышы сакланачак. Бу — Татарстан Гидрометеорология үзәге фаразыннан күренә, ул Россия Гидрометеорология үзәге мәгълүматларына нигезләнгән.

Россия Президенты Владимир Путин махсус хәрби операциядә катнашучылар һәм аларның гаилә әгъзалары, шулай ук беренче төркем инвалидлар һәм инвалид бала тәрбияләүче гаиләләр өчен газ тоташтыруны субсидияләү тәкъдимен белдерде.

Кайбер телеграм-каналларда ХАМАС лидерларының берсе Халид Машальнең бөтен дөньяда яһүдиләргә каршы һөҗүм оештырырга чакыруы турында хәбәр таралды.

Россия Президенты Владимир Путин 12 октябрьдә Бишкәккә сәфәре вакытында Кыргызстан лидеры Садыйр Җаппаров белән сөйләшүләр үткәрәчәк. Бу хакта Кремльнең матбугат хезмәте хәбәр итә.

Милли музейда «Сания»: беренче татар операсы» күргәзмәсе ачылды. Ике елдан соң операның дөнья күрүенә йөз ел була. Музейда опера белән бәйле фотографияләр, афишалар һәм спектакльләр программасы һәм операны иҗат итүчеләрнең шәхси әйберләре тәкъдим ителгән. Салих Сәйдәшев музее директоры Айдар Әхмәдиев беренче татар операсының йөз еллыгына иҗади проект әзерләргә теләүләрен әйтте.

Бүген кич Казанның «Салават Күпере» торак комплексында чит ил машинасы тукталышка килеп бәрелгән. Бу хакта «Татар-информ»га шәһәр дәүләт автоинспекциясеннән хәбәр иттеләр.

Самарада ел саен уздырылучы «Күңелсезләнмә» («Не скучай») II этнографик фестивале үтте. Ул Самара шәһәренең Идел буе халыклары китапханәсендә 1-8 октябрь көннәрендә оештырылды. Фестиваль Идел буе халыклары мәдәнияте һәм традицияләре дөньясына багышланган. Бу хакта «Самара татарлары» яза.

Татарстан Дәүләт Советы рәисе Фәрит Мөхәммәтшин Таулы Алтайда татар диаспорасы вәкилләре белән очрашты.

2024 елда индексациядән соң ана капиталы беренче балага — 631 мең сум, икенче һәм аннан соңгы балага 834 мең сум тәшкил итәчәк. Бу хакта «Бердәм Россия»нең программа комиссиясе утырышында хезмәт һәм социаль яклау министры Антон Котяков белдерде. Бу турыда «Российская газета» яза.

Бөгелмәлеләр махсус операциядә катнашучы якташларына булышлыкны дәвам итә. Ирле-хатынлы Алексей һәм Ирина Яковенколар махсус хәрби операция зонасына үз машиналарын җибәргән, ул «Алга» батальонында үз теләге белән хезмәт итүче хәрбиләргә тәгаенләнгән.

Язучы Камил Кәримов Марсель Галиевне «татарда бердәнбер профессионал язучы», дип атады.

Россия мөселманнары Диния нәзарәте хәбәр итүенчә, кайбер телеграм-каналларда яһүдиләргә һөҗүм итәргә чакыру турындагы хәбәрләр - дөрес тәрҗемә итмәү нәтиҗәсендә килеп чыккан ялган мәгълүмат.

Башкаланың Кызыл Позиция урамындагы Казан федераль университеты тулай торагында янгыннан соң төзекләндерү эшләре бара. Бу хакта университетның матбугат хезмәте хәбәр итә.

13-15 октябрь көннәрендә узачак дөньякүләм «Татарча диктант» текстын Татарстан өчен профессор, филология фәннәре докторы Фоат Галимуллин, Россия төбәкләре өчен — тележурналист, актер, Татарстанның атказанган сәнгать эшлеклесе Илдар Кыямов, чит илләр өчен Театр һәм кино артисты, Татарстанның атказанган артисты Ришат Әхмәдуллин укыячак. Бу хакта Бөтендөнья татар конгрессы матбугат хезмәте хәбәр итә.

Татарстанда октябрь аенда «Европа цивилизациясенең язу тарихы һәм Россия халыкларының язу культурасы» халыкара фәнни конференциясе узачак. Анда катнашу өчен Россия һәм якын чит илләрдәге фәнни җәмәгатьчелек вәкилләреннән бүгенге көнгә йөзгә якын гариза килгән. Бу хакта Татарстан Фәннәр академиясе вице-президенты Айнур Тимерханов бүген «Татар-информ»да узган матбугат конференциясендә хәбәр итте.

Бүген Татарстан Рәисе Рөстәм Миңнеханов илнең ягулык-энергетика комплексы өчен җаваплы булган Россия вице-премьеры Александр Новак белән очрашты. Очрашу Мәскәүдә узучы «Россия энергетика атналыгы» халыкара форумы кырында үтте.

Казан авиация заводында җитештерелгән Ту-214 урта магистраль пассажир лайнеры Red Wings авиакомпаниясе паркын тулыландырачак. Бу хакта Берләшкән авиатөзелеш корпорациясенең матбугат хезмәте үзенең Telegram-каналында хәбәр итә.

Казанда «Европа цивилизациясе язуы һәм Россия халыкларының язма культурасы тарихы» халыкара фәнни конференциясе барышында төрле язма традиция үрнәкләреннән торган күргәзмә ачыла. Г.Ибраһимов исемендәге Тел, әдәбият һәм сәнгать институты Язма мирас үзәгенең әйдәп баручы фәнни хезмәткәре Азат Ахунов ТАСС агентлыгында узган матбугат конференциясендә шулай дип белдерде.

Татарстанда Куйбышев сусаклагычы саегу аркасында килеп туган социаль киеренкелек саклана. ТР Рәисе Рөстәм Миңнеханов Мәскәүдә Россиянең эчке су юллары буйлап тиз йөрешле транспортта пассажирлар ташуның торышы һәм аны үстерүгә багышланган киңәшмәдә шулай дип белдерде. Бу хакта республика җитәкчесенең матбугат хезмәте хәбәр итә.

Бүген Мәскәүдә «Россия энергетика атналыгында» Татарстан Рәисе Рөстәм Миңнеханов катнашында килешүләр имзаланды. Килешү бер яктан — Казан дәүләт энергетика университеты, икенче яктан — «Россети» ГАҖ һәм «Силовые машины» АҖ арасында төзелде. Бу хакта Татарстан Рәисе матбугат хезмәте хәбәр итә.

Тинчурин театры үзенең 90 еллыгына театрның өлкән яшьтәге артистлары белән премьера чыгара. «Ай, былбылым!» спектакленә багышланган матбугат конференциясе гадәти булмаган урында - «Казан» гаилә үзәгендә үтте.

Татарстан синоптикларының фаразларыннан күренгәнчә, иртәгә көчле җил көтелә, аның тизлеге урыны белән секундына 24 метрга кадәр җитәчәк. Бу хакта Россия Гадәттән тыш хәлләр министрлыгының ТР буенча Баш идарәсендә хәбәр иттеләр.

Шиһабетдин Мәрҗани исемендәге Тарих институтының бер төркем галимнәре Чиләбе өлкәсенә татарлар тарихы белән танышырга киткән.