Новости за 18.04.2024

Актаныш районында быел 59215 га мәйданда чәчү эшләре башкарылачак. Бүген район җитәкчелеге хуҗалыклардагы язгы кыр эшләре барышы белән танышты. Бу хакта «Актаныш» сайтында хәбәр ителә.

Татарстан Республикасының Милли музеенда «Ханбикә Сөембикә һәм аның гаиләсе портреты» сурәтен реставрациядән соң тәкъдим иттеләр. Экспонат «Гедеон Рихтер» халыкара фармацевтика кампаниясенең «Хатын-кыз сәламәтлеге атналыгы» социаль проекты кысаларында реставрацияләнгән.

Татарстан халыклары Ассамблеясы Советы Президиумының бүген Баулы районында узган күчмә утырышында республикада яшәүче халыкларның туган телләрен саклау һәм үстерү мәсьәләләре хакында фикер алыштылар. Утырышны ТР Дәүләт Советы Рәисе, Татарстан халыклары Ассамблеясы рәисе Фәрит Мөхәммәтшин үткәрде, дип хәбәр итә ТР Дәүләт Советының матбугат хезмәте.

Милли китапханәдә «Идел» журналы «Инсайт» блогерлар оешмасы белән берлектә әдәби-мәдәни кичә оештырды. Биредә яшь иҗатчылар да, профессиональ шагыйрьләр дә катнашты.

Мамадыш районының волонтер-активисты һәм «Радиоприбор» АҖ предприятиесе хезмәткәре Илнур Галиев заводта фронтка ярдәм хәрәкәтен оештырды. Бүген биредә 1 меңнән артык эшче һәм белгеч эшли.

Тукай районы башлыгы Фаил Камаев ришвәт алуда шикләнелә, дип хәбәр иттеләр РФ Тикшерү комитетының ТР буенча идарәсе матбугат хезмәтендә.

Казанда республика өмәсе 27 апрельдә Нокса урманы территориясендә «Франт» сәүдә үзәге артында ТР экология һәм табигый ресурслар министры Александр Шадриков катнашында узачак. Ә инде бу атнада – 20 апрельдә Казансу елгасы һәм Комсомол күле буенда тагын ике өмә планлаштырылган.

Чиләбе өлкәсенең Снежинск шәһәрендә «Чәк-чәк» милли мәдәният фестивале узды. Бу хакта Бөтендөнья татар конгрессының матбугат хезмәте хәбәр итә.

Бүген, 18 апрель, Бөтендөнья татар конгрессына Пермь крае Губернаторы администрациясенең милли һәм дини мөнәсәбәтләр департаменты директоры Анастасия Субботина җитәкчелегендәге делегация килде. Кунакларны Бөтендөнья татар конгрессы Башкарма комитеты җитәкчесе Данис Шакиров сәламләде. Бу хакта Бөтендөнья татар конгрессы матбугат хезмәте хәбәр итә.

Быел Татарстанда елга пассажир транспортына тарифлар 20 процентка күтәрелә. ТР Тарифлар буенча дәүләт комитеты шундый карар чыгарды. «ТР флоты» АҖ генераль директоры Роман Лизалин «Татар-информ» агентлыгына биргән интервьюсында шулай дип белдерде.

Бүген «Яшь гвардия» хәрәкәте волонтерлары Казанның Арча зиратында Бөек Ватан сугышы ветераннары каберләрен тәртипкә китерде.

РФ мөселманнары Диния нәзарәте каршындагы «Хәләл» Халыкара стандартлаштыру һәм сертификация үзәге Марокко Милли стандартлаштыру институты реестрына (IMANOR) кергән Россиянең беренче компаниясе булды. Бу әлеге илгә шәригать нормаларына туры килгән Россия продукциясен экспортлау өчен мөмкинлекләр ача. РИА Новости агентлыгы РФ мөселманнары Диния нәзарәте матбугат хезмәтенә сылтама белән шул хакта хәбәр итә.

Россиядә тормыш өчен кирәкле һәм зур чыгымлы нозологияләрне дәвалау өчен билгеләнгән препаратлар исемлеген тулыландырдылар. Бу хакта РФ Хөкүмәте телеграм-каналында хәбәр ителә.

11 майда Ютазы районы Урыссу бистәсендә хатын-кызлар арасында «Халисә» V Ачык Республикакүләм Коръән укучылар бәйгесе үткәреләчәк. Ул Мәрданшиннар гаиләсе башлангычы белән Татарстан мөфтияте, Ютазы мөхтәсибәте һәм Ютазы муниципаль районы ярдәме белән оештырыла.

Ростов өлкәсендә «Якташлар» татар-башкорт мәдәният үзәге» өлкә иҗтимагый оешмасы «Гражданлык инициативаларын үстерү үзәге» коммерцияле булмаган автоном оешмасы ярдәмендә «Дон татарлары – мәдәни мирасны саклау» проекты кысаларында Тоталь диктант мәйданчыгында («Дон-Плаза» Конгресс-отеле, Зур Садовая урамы, 115) татарча диктант язачак. Бу хакта Бөтендөнья татар конгрессының матбугат хезмәте хәбәр итә.

Казан Яшь тамашачы театрында «Мастеровые» театры аншлаг белән үзенең ике спектаклен күрсәтте. Спектакльләр театрларның үзара гастрольләр алмашу программасы кысаларында күрсәтелде.

Россия мөселманнары Диния нәзарәтенең мәгариф һәм фән департаменты җитәкчесе Илгизәр Дәүләтшин Россия дәүләт китапханәсенең Көнчыгыш әдәбияты үзәгенә спикер итеп чакырылды. Ул «Дөньякүләм диннәр» күргәзмәсе кысаларында «Мәккәгә хаҗ: эчтән караш» дигән лекция белән чыгыш ясады. Бу хакта Россия мөселманнары Диния нәзарәте матбугат хезмәте хәбәр итә.

Быел Казанда җылыту сезоны 20 апрельдә төгәлләнә. ТР башкаласы мэриясенең телеграм-каналында шул хакта хәбәр ителә.

Бердәм дәүләт имтиханын кире тапшыру өчен өстәмә ике көн кертелергә мөмкин. Бу хакта «Татмедиа»да «Мәгариф» журналы оештырган Бердәм дәүләт имтиханына багышланган түгәрәк өстәлдә ТР Мәгариф һәм фән министрлыгының мәгариф өлкәсендә күзәтчелек һәм контроль департаментының төп киңәшчесе Ландыш Әхмәтова хәбәр итте.

Апелляцион инстанция КФУның элеккеге ректоры Илшат Гафуровка карата чик кую чарасын озайтуны раслады. Бу хакта Мәскәү гомуми юрисдикция судлары матбугат хезмәтендә хәбәр иттеләр.

Метеорологлар фаразларынча, 18-23 апрельдә Татарстанда аномаль-эссе, ягъни нормадан 9-15 градус югары һава торышы көтелә. Бу чорда уртача тәүлеклек һава температурасы +19..+27 градус тәшкил итәчәк.

Кичә Татарстан Республикасының атказанган сәнгать эшлеклесе, концертмейстер Мөнирә Хәбибуллина вафат булган булган. Бу хакта «Татар-информ» хәбәрчесенә мәрхүмнең тормыш иптәше Казан дәүләт консерваториясе профессоры, Татарстанның атказанган сәнгать эшлеклесе Сәгыйть Хәбибуллин сөйләде.

22 апрельдә Татарстан башкаласында «Пирамида» мәдәни-күңел ачу комплексында татар дин галиме Нургали Хәсәновның иҗатына багышланган кичә узачак. Әлеге чара кысаларында Татарстан Республикасының халык артисты Раил Садриев башкаруында «Дәрвиш» моноспектакле куелачак.

Татарстанда аномаль эссе һава торышы көтелә. Уртача тәүлеклек һава температурасы 9-15 градуска нормадан югары булачак. Бу турыда Татарстан Гидрометеорология һәм әйләнә-тирә мохитне күзәтү үзәге матбугат хезмәте хәбәр итә.

Ростов өлкәсендә «Якташлар» татар-башкорт мәдәни үзәге «Дон татарлары – мәдәни мирасын саклау» проекты кысаларында Ростов өлкәсе татар мәдәни үзәгендә Туган тел көненә һәм татар шагыйре, публицист һәм җәмгать эшлеклесе Габдулла Тукайның туган көненәш багышланган чаралар үткәрәчәк. Бу хакта Бөтендөнья татар конгерссы матбугат хезмәте хәбәр итә.