Новости за 02.04.2024

Бүген Буа районының Исәк авылында берничә урамны су баскан. Берничә сәгать эчендә кар суы елга булып ага. Яшел урамында агым аеруча көчле була. Биредә яшәүчеләр әйтүенчә, мондый су басуны элек күрмәгәннәр.

Ульяновск шәһәренең Засвияжье районында урнашкан Ислам мәдәнияте үзәгендә беренче тапкыр балалар өчен ифтар мәҗлесе үткәрелде. Бу турыда «Өмет» газетасы телеграм-каналында хәбәр ителә.

28 март көнне Пермь краенда «Колос» спорткомплекс базасында Бөтендөнья татар конгрессы бүләкләренә чаңгы ярышлары буенча Барда муниципаль округының беренчелеге узды. Ярыш кышкы сезонның ябылуына багышланды. Бу турыда конгрессның матбугат хезмәте хәбәр итте.

Самара өлкәсе Камышлы районы Татар Байтуганы авылында Сәләй Вәгыйзов музей-йортында 8нче ел дини бәйрәмнәр үткәрелә. Анда «Әлифба» авторларын һәм аларның балаларын искә алу кичәләре, Корбан бәйрәме, Мәүлид-ән–Нәби бәйрәме, ифтарлар булды. Бу хакта «Самара татарлары» сайтында хәбәр ителә.

30-31 мартта Мәскәүдә бодибилдинг буенча Мәскәү кубогының «Гран при столицы» Бөтенроссия ярышлары узды. Мәскәүдән һәм Россиянең башка шәһәрләреннән 400гә якын иң көчле атлет чемпион исеме өчен ярышты. Бу турыда Татарстан Спорт министрлыгы хәбәр итте.

«Апуш» балалар театр студиясе бүген үзенең Кечтүк» спектакле белән XXV халыкара «Брянцев фестивале»ндә чыгыш ясады.

Берләшкән милләтләр оешмасында (БМЛ/О) пилотсыз очкычларның Татарстандагы объектларга һөҗүмен гаепләделәр. Тыныч халыкка һәм гражданлык инфраструктурасына мондый һөҗүмнәр туктатылырга тиеш. Бу хакта ТАССка әңгәмәсендә оешманың рәсми вәкиле Стефан Дюжаррик белдерде.

Казахстан дипмиссияләргә һәм аларның хезмәткәрләренә карата көч куллану һәм агрессиянең теләсә кайсы күренеше кабул ителми дип саный. Шул рәвешле, республиканың Тышкы эшләр министрлыгы Израильнең Дамасктагы (Сирия) Иран илчелегенең консуллык бүлегенә һөҗүм итүен шәрехләде.

5 апрельдән Кыргызстанда «Мир» карталары эшләми башлый. Моңа АКШ керткән санкцияләр сәбәп булган. Бу хакта ТАСС «Элкарт» түләү системасы операторына сылтама белән хәбәр итә.

Менделеевск РФ ВЭБ корпорациясенең «Шәһәрләр өчен биш адым» программасында моношәһәрләр арасында җиңү яулады. Бу хакта Менделеевск районы башлыгы Радмир Беляев Телеграм-каналында сөйләде.

Бүген кайбер Телеграм-каналларда Татарстан объектларына һөҗүм иткән пилотсыз очкычлар, янәсе Казахстан территориясеннән җибәрелгән дигән мәгълүмат чыкты. Казахстан Республикасы Саклану министрлыгында хәбәр итүләренчә, бу мәгълүмат дөреслеккә туры килми. Бу турыда «Татар-информ» яза.

Татарстанда юл хәрәкәте иминлеге кагыйдәләрен белүне тикшерү бәйгесе башланды. Анда 5-11 сыйныф укучылары катнаша ала. Бу хакта республиканың Цифрлы трансформация үзәге матбугат хезмәте хәбәр итә.

Россиядә яңа финанс хезмәте — торак өчен саклыкка җыелган акча килешүе барлыкка килергә мөмкин. Бүген шул хактагы закон проекты Дәүләт Думасында I укылышта кабул ителде. Бу хакта «Дума.ТВ» Телеграм-каналында хәбәр ителә.

Бүген Башкортстан Республикасына эш сәфәре кысаларында Татарстан Республикасы Премьер-министры урынбасары, Бөтендөнья татар конгрессының Милли Шура рәисе Васил Шәйхразыев бөек татар шагыйре Габдулла Тукай бюстына чәчәкләр салды. Бу турыда Конгрессның матбугат хезмәте хәбәр итте.

Советлар Союзы таркалганнан соң, безне дошман күрүчеләр Россияне «тулысынча җимерү», ә аннары аны үз мәнфәгатьләренә буйсындыруны максат итеп куйды. Бу хакта Россия Эчке эшләр министрлыгы коллегиясе утырышында РФ Президенты Владимир Путин белдерде, дип яза ТАСС.

Татарстанда 2024 елда Казанда БРИКС Уеннарына әзерлек һәм аны уздыру буенча оператив штаб булдырылачак. Бу боерыкны республика Премьер-министры Алексей Песошин имзалады.

Төркиянең Истанбул шәһәрендә Гайреттепе эшлекле үзәгендә 16 катлы бинада зур янгын чыккан. Бу хакта ТАСС хәбәр итә.

Бүген Чаллыда «Омега» сәүдә комплексы янында контракт буенча хәрби хезмәткә сайлап алу мобиль пункты җәелдерелде. Бу хакта «Челнинские известия» хәбәр итә.

Татарстанда уздырыла торган һәм алда торган халыкара чараларны исәпкә алып, иминлек мәсьәләләренә күбрәк игътибар бирергә кирәк. Республика Иҗтимагый палатасы рәисе Зилә Вәлиева «Алабуга» махсус икътисади зонасына пилотсыз оча торган аппарат һөҗүме белән бәйле хәлне шәрехләп, «Татар-информ»га шундый фикер белдерде.

Мәскәүнең «Тереза Дурова театры» музыкаль-драма театрының сәнгать җитәкчесе, режиссер, Россиянең халык артисты Тереза Дурова Казандагы театр сәнгате һәм тамашачы турындагы фикерен әйтте.

13 апрельдә «Мәскәү - Татарстан күпере» яшьләр форумында Россиянең Париждагы Гадәттән тыш һәм Тулы вәкаләтле вәкиле, ЮНЕСКО каршындагы даими вәкиле Ринат Әләүтдинов үз тәҗрибәсе белән уртаклашачак. Бу хакта Татарстанның Россиядәге Тулы вәкаләтле вәкиллеге хәбәр итә.

Татарстан Рәисе Рөстәм Миңнеханов Алабугада булды, анда ул зыян күргән биналарны карады, төзүчеләр белән аралашты һәм кыска вакыт эчендә торак биналарын торгызырга кушты. Бу хакта Татарстан Рәисе матбугат хезмәте хәбәр итә.

Мәскәүнең «Тереза Дурова театры» беренче тапкыр Казанга спектакльләрен алып килә. 9, 10, 16, 17 апрельдә ике мәйданчыкта театрның ике спектакле күрсәтеләчәк. Бу хакта «Татар-информ» мәгълүмат агентлыгында узган матбугат очрашуында сөйләделәр.

5 апрельдә, изге Рамазанның соңгы җомга көнендә, Казанда хәйрия маршруты йөриячәк. Беренче тапкыр ул рейска Рамазан ае хөрмәтенә мөфтиятнең «Зәкят» хәйрия фонды башлангычы белән узган ел чыкты һәм казанлылар аны хуплап каршы алды. Бу хакта ТР Диния нәзарәте матбугат хезмәте хәбәр итә.

Россиядә мәдәниятне, традицияләрне, ил тарихын һәм телен хөрмәт итүче чит ил кешеләре генә яши һәм эшли ала. Бу принцип хәлиткеч булырга тиеш. Бу хакта Эчке эшләр министрлыгы коллегиясе утырышында Россия Президенты Владимир Путин белдерде.