Новости за 19.01.2019

Дагестанские огни гIалин яхархочунна дуьхьал бехкзуламан гIуллакх долийна махкарчу Талламан комитето, цо гIаттамхошна гIо латтийна аьлла. "2014-чу шарахь 30 шо долчу оцу жимчу зудчо, некъ гойтуш хьалхабевлла нах а болуш, низамаш дохош, Шеман дозан хадийна хилла. Цигахь "Исламан пачхьалкх" шех олучу тобанхойн организацехь лаьттина иза", - дIахьедо Талламан комитетан пресс-гIуллакххоша. Ишта билгалдоккху, шеконашка эцначу зудчо даIишхошлахь болчийн гергарчаьрца а, церан бевза-безачаьрца а зIенаш тесна... Читать дальше...

Нохчийчуьрчу Юкъараллан Палатехь "МаслаIатан тоба" вовшахтоьхна. ПIераскандийнахь палатан куьйгалхо коьртехь волуш дийцарш дIадаьхьна оцу тобан декъашхоша. Шайн коьрта Iалашо лору маслаIатхоша, шина агIонна юкъахь иккхина дов кхеле а ца долуьйтуш, шаьш юкъа а хьоьвзина, дерзор. Тобан декъашхой тешна бу, шайн белхан группа кхолларо юкъараллана боккха пайда бохьур бу, халкъана юкъахь лаьтта социалан гIоьртина хьал малдарца аьлла. Иштта дегайовхо ю церан, Юкъараллан палатан куьйгалхочо дийцарехь... Читать дальше...

ГIаттамхошна гIоьналла латтийна аьлла, меттигерчу вахархочунна йина кхел юхаяьккхина Нохчийчуьрчу Лакхарчу кхело. Набахтехь даккха 8 шо хан тоьхначу Соьлжа-ГIаларчу жимчу стеган гIуллакх керлачу кхелахошка юхалиста хьажийна. Старопромыслан кIоштарчу кхело кхайкхийнера хьалхо иза бехкелоруш вердикт. Цуьнца а догIуш, масех шо хьалха гIаттамхойн дехарца, цара хьуьнхахь лаьттах доьллина ахча схьа а аьхкина, тIемалошка дIакхачийнера цо, шена мах белча аьлла, дийцина "Кавказский узел" агенталле республикерчу прокуратуран белхахочо. Читать дальше...

Iамеркан Цхьанатоьхначу Штатийн пачхьалкхан департаменто Нохчийчохь ЛГБТ-н векалшна тIехь ницкъбо аьлла, динчу дIахьедарна жоп делла  махкарчу омбудсмено Нухажиев Нурдис. "Гуш ду, Малхбузера Оьрсийчоьнан "партнераш" муьлххачу а гIирсашца шайн Iалашонаш кхочушъян гIерташ хилар. Талламаш бе бохуш, дIахьедар дале хьалха уьш декхаре бара, цу кепара информаци бухера дуьйнна талла. Церан логикаца лелахь, хIора денна Европерчу мехкашкахь, къаьсттина Iамеркехь, лело харцонаш йийца йиш ю-кх", аьлла Нухажиевс. Читать дальше...

Смоленскан кIоштарчу а, Чувашерчу а депутаташа прокуратурашка дехар дина, Нохчийчохь а санна, шайн бахархой а декхарх мукъабаха аьлла. Халкъ дуьхьал гIаттарна кхоьруш, Соьлжа-ГIаларчу Заводской кIоштан кхело "Газпром межрегионгаз Грозный" организаци декхаре ярх махкахошна тIера коммуналан йолах долу 9 миллиард сом тIерадаккха аьлла, яздира Маршо Радионо. "Шуьйрра дIа а кхайкхош, декхар охьадилла дезашверг жоьпалле ийзоро иза дан амал дацарна холчахIоттаво. Оцу бахьаница ерриг юкъаралла сингаттаме кхачайо. Читать дальше...

ГIалгIайчоьнца доза тоьхна лаьттачу ГаланчIожан кIошта шайн дайх дисинчу лаьтта тIехь баха дIабаха луучу доьзалийн терахь 200 хьаладаьлла цхьана кIиранчохь, хаамбина экономика кхиоран министраллан векало. Оцу кIоштахь болх беш яц цхьа а индустри, яц белхан меттигаш, дац некъаш, яц социалан сферан объекташ а бохуш, билгалдоккхуш, керлачу меттиге дехьадовларх ойланашкахь бу цхьаберш. Маршо Радионо яздира, 2018-гIа шо чекхдолчу муьрехь нохчийн Iедалша дийца долорах ГаланчIожан кIошт юхаметтахIотторах. Читать дальше...

Парижерчу а, Европан кхечу гIаланашкара баьхкинчу а нохчаша протестан гулам хIоттийра пIераскана Францерчу Польшин векалтна хьалха. Гуламхоша дийхира Варшаверчу Iедале Полшехь вехачу нохчочунна, Кадыровн режиман критикна Абдурахманов Тумсона политикан тховкIело ялар. Гуламхой тешна бу Абдурахмановс Оьрсийчоьнан низам талхийна дацарх а, иза цига юхахьажавахь, дийна вуьтур вацарх а.