შარლ მიშელი: ცეცხლის შეწყვეტაზე რუსეთის ინიციატივა სიყალბე და ფარისევლობაა
ევროპული საბჭოს თავმჯდომარემ, შარლ მიშელმა, განაცხადა, რომ არ ენდობა რუსეთის ინიციატივას ცეცხლის შეწყვეტის შესახებ მას მერე, რაც რუსეთის პრეზიდენტმა ვლადიმირ პუტინმა დღე-ნახევრიანი ზავის განკარგულება გასცა.
„არის აგრესორი - ესაა კრემლი. არის მსხვერპლი - უკრაინელი ხალხი. რუსეთის ჯარების გაყვანა ერთადერთი სერიოზული გადაწყვეტილებაა, რომელიც მშვიდობას და უსაფრთხოებას მოგვიტანს. ცალმხრივი წესით ცეცხლის შეწყვეტის გამოცხადება ისეთივე სიყალბე და ფარისევლობაა, როგორც აბსურდული, უკანონო ანექსიების წყება და მათთან დაკავშირებული რეფერენდუმები,“ დაწერა მიშელმა ტვიტერში.
მანამდე მსგავსი განცხადება გააკეთეს გერმანიის საგარეო საქმეთა მინისტრმა ანალენა ბერბოკმა, აშშ-ის პრეზიდენტმა ჯო ბაიდენმა და სახელმწიფო დეპარტამენტის ოფიციალურმა წარმომადგენელმა ნედ პრაისმა. ბაიდენის თქმით, ამ პაუზით პუტინი სულის მოთქმას ცდილობს. ანალენა ბერბოკმა განაცხადა, რომ თუ პუტინს მართლაც სურს მშვიდობა, ის უკრაინიდან ჯარებს გაიყვანდა. ნედ პრაისის სიტყვებით კი, კრემლის ინიციატივა დროის მოგების ცინიკური მცდელობაა.
რუსეთის პრეზიდენტმა, ვლადიმირ პუტინმა 5 იანვარს რუსეთის შეიარაღებულ ძალებს უბრძანა, უკრაინაში ცეცხლი შეწყვიტონ შობის დღესასწაულზე, თუმცა კიევი აცხადებს, რომ "დროებითი ზავის" დამყარება შეიძლება მხოლოდ იმ შემთხვევაში, თუ რუსეთი თავის ძალებს გაიყვანს უკრაინიდან.