"საკონსულო კავშირზეა პოლიციასთან" - ბელგიაში ქართველი ტრანსგენდერი ქალის მკვლელობის შესახებ ცნობებს საგარეო უწყება ამოწმებს
საგარეო საქმეთა სამინისტრო არ ადასტურებს მედიაში გავრცელებულ ინფორმაციას ბელგიის ქალაქ ანტვერპენში მცხოვრები ტრანსგენდერი ქალის, ლიზა ქისტაურის მკვლელობის შესახებ. როგორც სამინისტროში უთხრეს რადიო თავისუფლებას, "საქართველოს საელჩოში შეტყობინება არ შესულა, ბელგიაში საქართველოს საკონსულო მუდმივ კონტაქტზეა ადგილიბრივ სამართალმდაცველებთან და არკვევს სიტუაციას."
ლიზა ქისტაურის გარდაცვალების ფაქტი ამ დრომდე არც ოჯახს არ დაუდასტურებია.
რადიო თავისუფლებას რამდენიმე წყარო უდასტურებს, რომ ლიზა ქისტაური რამდენიმე დღის წინ გაუჩინარდა და მისი ადგილსამყოფელის შესახებ ინფორმაცია არ ჰქონდათ მის მეგობრებს - იგივე წყაროები მისი სიკვდილის ფაქტს არ ადასტურებენ.
მედიაში გავრცელებული ინფორმაციით, ლიზა ქისტაური წამებით არის მოკლული და დედას შვილის დაზიანებული სხეულის ამსახველი ფოტოები გამოუგზავნეს. ამავე ინფორმაციით, ქალი სავარაუდოდ მისმა პარტნიორმა მოკლა, რომელთან ერთადაც იყო გაუჩინარებული დეკემბრის ბოლო დღეებიდან. როგორც რადიო თავისუფლებას ეუბნებიან მისი მეგობრები, ლიზა ქისტაურთან კავშირი 2 იანვრის შემდეგ გაწყდა.
სოციალურ მედიაში ვრცელდება ლიზას გაუჩინარების კიდევ ერთი ვერსია, რომლის მიხედვითაც მას და მის მეგობარს თავს დაესხნენ, თავდასხმის შედეგად მასთან მყოფი ადამიანი გარდაიცვალა და ლიზა იმალება უსაფრთხოების მიზნით, სანამ სამართალდამცველები თავდამსხმელს იპოვიან და დააკავებენ - ოჯახის მხრიდან არც ეს ვერსიაა დადასტურებული.
ლიზა ქისტაურის ამ დროისთვის ბოლო აქტივობა სოციალურ მედიაში 25 დეკემბერს ტიკ-ტოკზე გამოქვეყნებული ცეკვის ვიდეოა, რომელიც მისი აღწერის მიხედვით, მის ქმარს ეძღვნება.