რუსეთი შეეცდება უახლოეს ხანში ხელთ იგდოს მთელი დონბასი - გენერალი ოლექსეი ჰრომოვი
უკრაინის გენერალური შტაბის თანახმად, მოსალოდნელია, რომ უახლოეს ხანში რუსეთის არმია შეეცდება დონეცკის ოლქის მთელი ტერიტორიის დაპყრობას და შემდეგ ძალებს ზაპოროჟიეს ოლქის ოკუპაციისკენ მიმართავს. ამის შესახებ 12 იანვარს გამართულ ბრიფინგზე უკრაინის გენშტაბის მთავარი ოპერატიული სამმართველოს უფროსის მოადგილემ, ბრიგადის გენერალმა ოლექსეი ჰრომოვმა განაცხადა.
„პროგნოზის თანახმად, უახლოეს ხანებში მოწინააღმდეგე შეეცდება დონეცკის ადმინისტრაციულ საზღვარზე გასვლას, ხოლო შემდგომში თავის მოქმედებას, სავარაუდოდ, გააქტიურებს ზაპოროჟიეს ოლქის მარცხენა ნაპირის ხელში ჩასაგდებად“, - მოჰყავს ჰრომოვის სიტყვები გამოცემა „უკრაინსკა პრავდას“.
უკრაინის გენშტაბის ხელთ არსებული ინფორმაციით, ამ გეგმების რეალიზებისთვის რუსეთმა გამოაცხადა შეიარაღებული ძალების მასშტაბური რეფორმირება, რაც, კერძოდ, პირადი შემადგენლობის 1,5 მილიონამდე გაზრდას და არანაკლებ 20 ახალი დივიზიის ფორმირებას ითვალისწინებს.
ასევე გასული წლის ბოლოს რუსეთის თავდაცვის მინისტრი სერგეი შოიგუ გამოვიდა წინადადებით, არმიაში სასწრაფო სამსახურისთვის გაწვეულთა ასაკი გაიზარდოს 18-დან 21 წლამდე, ზღვრულ ასაკად კი 30 წელი დადგინდეს.
შოიგუს ინიციატივაა ასევე რუსეთის შეიარაღებული ძალების რაოდენობა გაიზარდოს 1,5 მილიონ ადამიანამდე, მათ შორის კონტრაქტით დაქირავებულთა რაოდენობა - 695 ათას სამხედრომდე. შოიგუს თქმით, ეს საჭიროა იმისთვის, რომ "გარანტირებული იყოს სამხედრო უსაფრთხოების უზრუნველყოფის ამოცანების გადაჭრა".
ამჟამად პრეზიდენტ ვლადიმირ პუტინის ბრძანებულების თანახმად, რუსეთის შეიარაღებული ძალების რაოდენობა შეადგენს 1 150 628 ადამიანს.