საქართველოში დასვენება შეიძლება - ტურჩაკი, მისი ქალიშვილი, წულუკიძე და „პუტინის მზარეული“
რუსეთის ფედერაციის საბჭოს პირველი ვიცე-სპიკერისა და პარტია „ედინაია როსიას“ გენერალური საბჭოს მდივნის, ანდრეი ტურჩაკის, ქალიშვილი ოლგა ხშირად ჩამოდის სტუმრად საქართველოში. სავარაუდოდ, თბილისში შეხვდა ის ახალ 2023 წელსაც. მამამისი კი რუსი პოლიტიკოსების უცხოეთში დასვენებითაა აღშფოთებული. კურსკელ დეპუტატს, მაქსიმ ვასილიევს, მექსიკაში დასვენების გამო იგი „ვაგნერის უროთიც“ კი დაემუქრა. ვინ არის ტურჩაკის ქალიშვილი და რა კავშირი აქვს მამამისს კერძო სამხედრო კომპანია "ვაგნერის“ დამფუძნებელთან, "პუტინის მზარეულად" ცნობილ ევგენი პრიგოჟინთან?
კურსკელი დეპუტატი მექსიკაში
დუმის დამოუკიდებელი დეპუტატი კურსკის ოლქიდან მაქსიმ ვასილიევი და მისი ცოლი, „ედინაია როსიას“ წევრი, კურსკის საქალაქო კრების დეპუტატი სვეტლანა ვასილიევა სკანდალში გაეხვივნენ. დეპუტატმა საახალწლო მილოცვის ვიდეო ჩაწერა მექსიკიდან, ოკეანის სანაპიროდან, ლუდით ხელში და კრევეტებით საახალწლო სუფრაზე.
„მაშინ, როცა სასაზღვრო კურსკის ოლქის მცხოვრებლები ცეცხლის ხაზზე არიან, ზოგიერთი „ხალხის რჩეული“ „დუნდულების გათბობის“ უფლებას აძლევს თავს საზღვარგარეთ, თბილ კურორტებზე ლუდის თანხლებით, უადგილო ვიდეოების წერით, ეს ცინიზმისა და არაადამიანობის მწვერვალია. არა სამშობლო. არა დროშა, არა პატივი, არა ღირსება, არა ტვინი“, - დაწერა „ედინაია როსიას“ გენერალური საბჭოს მდივანმა ანდრეი ტურჩაკმა ტელეგრამის არხზე.
ის ვასილიევს საჯაროდ დაემუქრა „ვაგნერის უროთი“ და პოლიტიკოს წყვილს მოუწოდა, მანდატები თავიანთი ნებით დაეთმოთ.
„არ ვიცი, რა უბიძგებს ვასილიევებს ამ გადაწყვეტილებისკენ -„ვაგნერის ურო“, „სტაროვოიტის დარტყმა“ თუ თავიანთი არარაობის გააზრება, დაგვიანებით - მაგრამ იმედი მაქვს, საახალწლო არდადეგების შემდეგ კურსკელი დეპუტატების რიგები შეთხელდება“, - დაამატა ტურჩაკმა.
ვასილიევმა კი, რომელიც ჯერ ისევ მექსიკაში რჩება, გამოცემა "Вёрстка”-სთან თავი იმით იმართლა, რომ ექიმებმა მის ორსულ მეუღლეს „თბილ კლიმატში მშობიარობა“ ურჩიეს.
ვოლოგდის დეპუტატი ემირატებში
ვოლოგდის ოლქის საკანონმდებლო საბჭოს დეპუტატმა დენილ დოლჟენკომ 6 იანვარს სოციალურ ქსელ „ვკონტაქტეში“ მარათონში მონაწილეობის ფოტო გამოაქვეყნა, რომელიც, გეოლოკაციის მიხედვით, დუბაიში იყო გადაღებული. დეპუტატმა დაწერა, რომ თხილამურებით ცუდად სრიალებს, „ასეთ ყინვაში კი სირბილი არც ისე კომფორტულია“, ამიტომ „სინოპტიკოსების რეკომენდაციები გაითვალისწინა და ჩათბა“.
10 იანვარს ანდრეი ტურჩაკი დოლჟენკოს პარტბილეთის ჩამორთმევას დაჰპირდა.
„ამ სადღესასწაულო დღეებში რამდენიმე რეზონანსული ამბავი მოხდა, როცა „ედინაია როსიას“ დეპუტატთა კორპუსის წარმომადგენლებმა არაადეკვატურად წამოაჩინეს თავი. ცხოვრებაში ბევრი რამით გართობა შეიძლება - სირბილით, ცურვით, სამთო თხილამურებით, მაგრამ ყველაფერს აქვს დრო და ადგილი. ჩვენს კიდევ ერთ დეპუტატს ჩამოერთმევა პარტბილეთი“, - დაწერა მან.
დოლჟენკომ „გაზეტა.რუს“ უთხრა, რომ უპარტიო დეპუტატია, ოფიციალური შვებულება ჰქონდა და ექიმების რეკომენდაციით, შვილი ზღვაზე წაიყვანა.
„დოჟდი“ წერს, რომ იმავდროულად დუბაიში ისვენებდა რუსეთის თავდაცვის მინისტრის უმცროსი ქალიშვილი ქსენია შოიგუც. 7 იანვარს დეპუტატმა ქსენია შოიგუსთან გადაღებული ფოტოც გამოაქვეყნა, რომელზეც მარათონში მონაწილეობისთვის საჭირო პრომოკოდის რეკლამას აკეთებდა.
ტურჩაკის ქალიშვილი საქართველოში
ანდრეი ტურჩაკის უფროსი ქალიშვილი ოლგა პეტერბურგელი მსახიობია, რამდენიმე ეპიზოდური როლი აქვს ნათამაშები სატელევიზიო ფილმებსა და სერიალში. 2020 წელს კი გამოვიდა პირველი სრულმეტრაჟიანი ფილმი «Смотри как я“ (ნახე, როგორც მე), რომელშიც ტურჩაკი მთავარ როლს ასრულებდა. ფილმი, რომლის ბიუჯეტის ორი მესამედი „კინოფონდის“ გრანტი იყო, მაყურებელს არ მოეწონა. მან კინოგაქირავებაში მხოლოდ 20 ათასი დოლარი მოაგროვა.
ინსტაგრამში ოლგა ტურჩაკი წულუკიძის გვარს იყენებს. სოციალურ ქსელში გამოქვეყნებული ფოტოების მიხედვით ვიგებთ, რომ 2020 წელს მან ვაჟიშვილი გააჩინა. ბავშვის მამა პეტერბურგის მცირე დრამატული თეატრის მსახიობი ბექა წულუკიძეა. რადიო თავისუფლებამ ადრე ვერ შეძლო დაედგინა, იმყოფებიან თუ არა ბექა წულუკიძე და ოლგა ტურჩაკი ოფიციალურ, რეგისტრირებულ ქორწინებაში. ოლგა ტურჩაკმა 2022 წელს საქართველოში გადაღებული ფოტოები გამოაქვეყნა მინაწერით: „საოჯახო ქეიფებს შორის“.
2022 წლის დეკემბერში ოლგა ტურჩაკმა ინსტაგრამზე ვიდეოც ატვირთა საახალწლოდ განათებული თბილისიდან. ტელეგრამ-არხმა სახელწოდებით „ფსკოვის გუბერნია“ დაწერა, რომ მან „ახალი წელი თბილისში აღნიშნა და ამ ბედნიერების შესახებ თავის ინსტაგრამში მოჰყვა“.
ოლგა ტურჩაკს საქართველოში ყოფნის დეტალებთან დაკავშირებით სოციალურ ქსელში მივწერეთ, მაგრამ არ გამოგვეხმაურა.
საქართველო რუსეთის „არამეგობრული“ ქვეყნების სიაში არ შედის, ისევე როგორც მექსიკა და არაბეთის გაერთიანებული საამიროები, სადაც დეპუტატთა დასვენების გამო აღშფოთდა ანდრეი ტურჩაკი, მაშინ, როცა მისი ქალიშვილი, სავარაუდოდ, საქართველოში იმყოფებოდა.
ტურჩაკის კავშირი პრიგოჟინთან
რადიო თავისუფლების რუსული სამსახური წერდა, რომ ინსტაგრამზე ოლგასა და ბექა წულუკიძის საოჯახო ფოტოებზე ჩანს ბექას ძმაც, ალექსანდრე წულუკიძე (ფოტო ამჟამად მიუწვდომელია). ალექსანდრე წულუკიძემ თავის ინსტაგრამის გვერდზე ბექასთან გადაღებული ფოტოებიც გამოაქვეყნა. მათი მამის, ვიქტორ წულუკიძის მიერ „ოდნოკლასნიკზე“ გამოქვეყნებულ სურათზეც ორივე ძმა ერთადაა.
ალექსანდრე ვიქტორის ძე წულუკიძე 2018 წელს დაარსებული ფირმის, „პერსპექტივის“, ერთადერთი მფლობელია. 2020 წლის 21 ივლისიდან “პერსპექტივა” კომპანია „ემ ინვესტის“ (М Инвест) წილის 99.9%-ს ფლობს. ეს წილი მანამდე ეკუთვნოდა კომპანია „დელტას“ (ЗАО «Дельта), რომლის შემადგენლობაში შემავალი კომპანიები „ვაგნერის“ დამფუძნებლის, ევგენი პრიგოჟინის ნათესავების სახელებს უკავშირდება.
კომპანია „ემ ინვესტი“ მას შემდეგ გახდა ცნობილი, რაც სუდანში ოქროს მომპოვებელი საბადოების განვითარების გეგმის უფლება მიიღო. 2020 წლის ივლისში აშშ-ის სახაზინო დეპარტამენტმა კომპანია და მისი აღმასრულებლები სანქცირებულთა სიაში შეიყვანა. არგუმენტად მოიყვანეს ის, რომ „ემ ინვესტი“ ემსახურებოდა რუსეთის თავდაცვის სამინისტროს და პასუხისმგებელი იყო სუდანის ყოფილი პრეზიდენტის, ომარ ალ-ბაშირის გეგმების შემუშავებაზე საპროტესტო აქციების აღსაკვეთად.
ერთი წლით ადრე უკრაინის უსაფრთხოების სამსახურმა გამოაქვეყნა დოკუმენტები, რომელთა თანახმად, რუსეთის თავდაცვის სამინისტროს საბიუჯეტო დაწესებულება “223-ე მფრინავმა რაზმმა” კონტრაქტი გააფორმა “ემ ინვესტთან”. კომპანიას ადამიანები რუსეთიდან სირიაში, სუდანში, ლიბიაში და ცენტრალური აფრიკის რესპუბლიკაში უნდა გადაეყვანა. კიევი ირწმუნება, რომ საუბარი იყო “ ვაგნერის” მებრძოლებზე.
2019 წელს ტელეარხმა “ნასტოიაშჩეე ვრემია” ევგენი პრიგოჟინთან დაკავშირებული რამდენიმე ფირმის, მათ შორის “ემ ინვესტის”, “ემ ფინანსისა” და “მეგალაინის” საბუღალტრო დოკუმენტაცია შეისწავლა. აღმოჩნდა, რომ ეს ფირმები თანხებს ურიცხავდნენ პრიგოჟინის სტრუქტურებსა და კონტრაქტორებს. ერთ-ერთმა მათგანმა “ნასტოიაშჩეე ვრემიას” დაუდასტურა, რომ “ემ ინვესტის” სახელით მათთან კომუნიკაცია პირადად “პუტინის მზარეულს” ჰქონდა.
2019 წლის აპრილში ომარ ალ-ბაშირი სამხედრო გადატრიალების შედეგად ჩამოაგდეს. განაგრძობს თუ არა “ემ ინვესტი” სუდანში ოქროს მოპოვებას, უცნობია, თუმცა სხვა შეთანხმებების შესრულებისას სუდანის ახალი ხელისუფლება რუსეთის ერთგული დარჩა: მაგალითად, ძალაშია ქვეყანაში რუსული სამხედრო-საზღვაო ფლოტის ბაზის შექმნის გეგმა.
შპს “პერსპექტივა”, რომლის გენერალური დირექტორი ანდრეი ტურჩაკის ქალიშვილის მაზლია, “ემ ინვესტის” მფლობელი გახდა. ეს 6 დღეში მოხდა მას შემდეგ, რაც აშშ-მ სუდანში ოქროს მომპოვებელი კომპანია სანქცირებულთა სიაში შეიყვანა.
“ვაგნერის ურო”
ურო, რომლითაც ანდრეი ტურჩაკი კურსკელ დეპუტატს დაემუქრა, კერძო სამხედრო კომპანია “ვაგნერის” ჯალათების იარაღია. გამოცემა SOTA წერს, რომ უროთი მკვლელობა ვაგნერელების სავიზიტო ბარათია, ჯერ კიდევ სირიის ომიდან მოყოლებული.
2022 წლის ნოემბერში, სავარაუდოდ, უროთი მოკლეს ყოფილი პატიმარი ევგენი ნუჟინი, რომელიც “ვაგნერმა” უკრაინაში ომისთვის დაიქირავა. ნუჟინი მოკლეს მას შემდეგ, რაც ის უკრაინელებს ტყვედ ჩაბარდა და შემდეგ ტყვეთა გაცვლაში მოხვდა.
კერძო სამხედრო კომპანიას პირდაპირ არ უღიარებია მკვლელობა. პრიგოჟინის პრესსამსახურმა მაშინ ასეთი კომენტარი გამოაქვეყნა: “რაც შეეხება უროჩარტყმულს, ამ შოუში ჩანს, რომ მან ვერ იპოვა ბედნიერება უკრაინაში, თუმცა შეხვდა არაკეთილ, მაგრამ სამართლიან ხალხს”. მოგვიანებით პრიგოჟინმა გენერალურ პროკურატურას სთხოვა, შეემოწმებინა ვერსია, ხომ არ უკავშირდება ყოფილი პატიმრის მკვლელობა ამერიკის სპეცსამსახურებს.
“ნოვაია გაზეტა. ევროპა” მკითხველს ახსენებს, რომ ჯერ კიდევ ფსკოვის რეგიონის გუბერნატორობისას, 2010 წელს ანდრეი ტურჩაკი გაანაწყენა ჟურნალისტ ოლეგ კაშინის გამონათქვამებმა თავის ბლოგში და მისგან ბოდიშის მოხდა მოითხოვა. კაშინმა უარი თქვა. მალევე ჟურნალისტს თავს დაესხნენ და არმატურით სცემეს - კაშინი ამბობდა, რომ თავდასხმა ტურჩაკის ორგანიზებული იყო.
“პრაქტიკულად იგივე უროს გამოყენებით გაარკვიეს საქმე ოლეგ კაშინთან”, - ამბობს პოლიტოლოგი იგორ პრეობრაჟენსკი და ამატებს: “ზოგიერთი ცნობით, ტურჩაკს პრიგოჟინთან ერთად აქვს არც ისე ლეგალური ბიზნესი სუდანში, ანუ ტურჩაკი და პრიგოჟინი პარტნიორები არიან”.
ევგენი პრიგოჟინსა და ანდრეი ტურჩაკზე საერთაშორისო სანქციები ვრცელდება. ტურჩაკის ქალიშვილი ოლგა, როგორ რუსეთის “პოლიტიკური ან სახელმწიფო მოღვაწის ოჯახის უახლოესი წევრი”, შეყვანილია უკრაინული პორტალის, “ომი და სანქციების”, სიაში, რომელშიც ხვდებიან ის “ფიზიკური პირები, ვისთვისაც სანქციები ჯერ არ დაუწესებიათ.”