ნიკა მელია: ჩემსა და ვანო მერაბიშვილს შორის დაპირისპირება დაიწყო…
„ნაციონალური მოძრაობის“ თავმჯდომარე, ნიკა მელია საქართველოს ყოფილ შინაგან საქმეთა მინისტრზე, ვანო მერაბიშვილზე საუბრობს. მისი თქმით, მათ შორის დაპირისპირება დაიწყო 2020 წელს, როდესაც მელია ოპოზიციის მხრიდან კენჭს იყრიდა გლდანში.
„ჩემსა და ვანო მერაბიშვილს შორის დაპირისპირება დაიწყო 2020 წელს, როდესაც მე გლდანში ვიყრიდი კენჭს, როგორც საერთო ოპოზიციური კანდიდატი. ამ დროისთვის მელიას არც აქცია ჰქონდა დაშლილი, არც მიხეილ სააკაშვილი იყო ციხეში და არც რაიმე სახის პრეტენზია არსებობდა, მაგრამ ეს დაპირისპირება მოხდა. ვანო მერაბიშვილმა 60 წლისა და 9 თვის განმავლობაში დაჰყო ბიძინა ივანიშვილის ციხეში და ვფიქრობ, რომ არ არის ამ ქვეყანაში ბევრი ისეთი ადამიანი, რომელსაც შეუძლია ამდენი ხანი სამარტოო საკანში იჯდეს, მაგრამ მე ამ პერიოდს არ ვეხები.
მაგრამ მე ვეხები იმას, რასაც მე გადავაწყდი თავად. მანამდე, საზოგადოებამ მინდა, იცოდეს, რომ მის დაპატიმრებამდე მხოლოდ 2 ჯერ შევხვდი მას. პირველად მე ის ციხეში მოხვედრის შემდეგ ვნახე, როდესაც დეპუტატი ვიყავი და მოვინახულე ციხეში. კარს მომდგარი იყო სპორტის სასახლეში ყრილობა, სადაც პარტიის წევრებს უნდა აგვერჩია პოლიტიკური საბჭოს წევრები და გენერალური მდივანი ხელახლა. გახსოვთ, დიდი ნაწილი პარტიას გამოეყო და დააფუძნა „ევროპული საქართველო“, ბევრისთვის გაურკვეველი იყო, სად იდგა ვანო მერაბიშვილი, როცა ბევრი მისი მეგობარი იყო მეორე მხარეს.
შევედი მარტივი წინადადების განსახილველად მასთან. ვეუბნები ბატონს, ჩვენ გვაქვს რამდენიმე დღეში ყრილობა სპორტის სასახლეში, და ჩვენ კვალავ თქვენ უნდა აგირჩიოთ გენერალურ მდივნად, რაზედაც მან კატეგორიული უარი განმიცხადა, მეტიც, მთხოვა, რომ ეს არ გავაკეთო. ვისაუბრეთ ბევრი, მივხვდი, რომ ამ ადამიანს აღარ უნდა პარტია „ნაციონალური მოძრაობის“ გენმდივნობა, მოვედი კოლეგებთან ცენტრალურ ოფისში, განვიხილეთ ეს საკითხი. ძალიან მძიმე იყო ეს პროცესი, იმიტომ რომ ყრილობა მოდიოდა და პატიმარი ადამიანი თანამდებობიდან უნდა გადაგვეყენებინა და მე ვფიქრობ, ძალიან არასწორად გამოჩნდებოდა პარტიის პოზიცია. და რა გავაკეთეთ, პარტიამ, მიუხედავად ვანო მერაბიშვილის გაცხადებული პოზიციისა, კვლავ ის აირჩია გენერალურ მდივნად. ზუსტად მეორე დღეს გავრცელდა ვანო მერაბიშვილის განცხადება, რომ მისი ნების წინააღმდეგ ავირჩიეთ ჩვენ იგი გენერალურ მდივნად. ამიტომ, ჩემთვის, სიმართლე გითხრათ, 2016 წლიდან 2020 წლამდე სად იდგა ვანო მერაბიშვილი და რა პოლიტიკური პოზიცია ჰქონდა, არ იყო ცნობილი.
მისი ციხიდან გათავისუფლების შემდეგ, მე როგორც ამ პარტიის აქტიური წარმომადგენელი, მართლაც როგორც 7 წელი საკანში გატარებულ ადამიანთან მიმართებით ყოველთვის მოვიქცევი, მართლაც ეს ადამიანი გულში ჩავიკარი იმ გაგებით, რომ მას ყველა ტიპის პრობლემა, კომპლექსი თუკი შეიძლებოდა ჰქონოდა „ნაციონალური მოძრაობის“ ახალ წარმომადგენლებთან, მოხსნოდა. მას 6-7ჯერ სახლშიც კი ვეწვიე. მქონდა არაერთი სატელეფონო საუბარი. და ჰოი საოცრებავ, რა ხდება 2020 წელს. ვარ გლდანში, ძალიან მძიმე საარჩევნო კამპანიაში, მალევე ირკვევა, რომ იქ ოპოზიციას აქვს ძალიან ძლიერი პოზიციები და გამარჯვების უნიკალური შესაძლებლობა არსებობს, ვებრძვით კახი კალაძეს და ამ პროცესში აღმოვაჩინე, რომ ჩვენ თურმე ვებრძვით არა მხოლოდ ბიძინა ივანიშვილს, არამედ ჩვენ გვიპირისპირდება ვანო მერაბიშვილი. მერაბიშვილი ძალიან აქტიურად ყოფილა ჩართული ჩემი საარჩევნო შტაბის დანგრევაში. კონკრეტულ ადამიანებთან, 10-მდე ადამიანთან, მისი წარმომადგენლები, მათ შორის საზოგადოებისთვის ცნობილი ადამიანებიც, გადიან კონტაქტზე და ეუბნებიან, დატოვეთ „ნაც მოძრაობის“ საარჩევნო შტაბი, მელიას საარჩევნო შტაბი და იქნებ არ დაეხმაროთ.
დროთა განმავლობაში ვხედავ, რომ ადამიანების რაოდენობა მცირდება ჩემს გარშემო, მეტიც, დაიკარგნენ ესენი ჩემი თვალთახედვის არიდან რამდენიმე დღის განმავლობაში. ამ ადამიანებს ყური რომ ეგდოთ მერაბიშვილისთვის, არჩევნები ჩაიშლებოდა. სამი დღის მერე მოვიდნენ ადამიანები, გაოცებულები, მითხრეს, მომიყვნენ სიმართლე. დანა რომ ჩაგერტყათ, სისხლი არ წამომივიდოდა. მე მეგონა ვუპირისპირდებოდი ძალიან უთანასწორო ბრძოლაში, შიშველი ხელით ბიძინა ივანიშვილს, კალაძეს და თურმე მე მებრძვის ადამიანი, რომელიც 7 წელიწადი საპატიმროში იყო, გამოდის და მიკეთებს ამას, ნაცვლად იმისა, რომ დამეხმაროს, თან ამას აკეთებს მალულად, შუამავლების მეშვეობით“, – განაცხადა მელიამ.