ანდრეი კასიანოვი: გაუგებარია ქართველი პოლიტიკოსებისა და თავდაცვის სამინისტროს განცხადებები, რომ უკრაინამ ითხოვა „ბუკის“ უფასოდ გადაცემა – ჩვენ აღვნიშნეთ, რომ შეიძლება მოხდეს იარაღის და სამხედრო ტექნიკის გადაცემა ან შესყიდვა

უკრაინა ოფიციალურად უარყოფს ნებისმიერ ბრალდებას საქართველოს რუსეთის ფედერაციასთან ომში ჩათრევის მცდელობასთან დაკავშირებით , – ამის შესახებ საქართველოში უკრაინის საქმეთა დროებითმა რწმუნებულმა, ანდრეი კასიანოვმა „პალიტრანიუსის“ გადაცემა „დღის ნიუსრუმში“ უკრაინის მხარის მიერ საქართველოსთვის „ბუკების“ გადაცემის მოთხოვნაზე საუბრისას განაცხადა.

ანდრეი კასიანოვის განცხადებით, გაუგებარია პარლამენტის ვიცე სპიკერის, ასევე საქართველოს თავდაცვის სამინისტროს ბოლო განცხადებები, რომ უკრაინამ ითხოვა „ბუკის“ საჰაერო თავდაცვის სისტემების უფასოდ გადაცემა, რადგან უკრაინის სურვილია მოხდეს იარაღის და სამხედრო ტექნიკის გადაცემა ან შესყიდვა.

„უკრაინის მხარე თანმიმდევრულია ყველა საერთაშორისო პარტნიორისადმი, მათ შორის საქართველოსადმი იარაღის, სამხედრო ტექნიკისა და სხვა საარტილერიო მასალის მიწოდებასთან დაკავშირებით თხოვნაში. იარაღი სასიცოცხლოდ მნიშვნელოვანია რუსეთის ფედერაციის ფართომასშტაბიანი შეჭრის დაწყებიდან. ჩვენთვის გაუგებარია ქართველი პოლიტიკოსების განცხადებები, კერძოდ პარლამენტის ვიცე სპიკერის, ასევე საქართველოს თავდაცვის სამინისტროს ბოლო განცხადებები, რომ უკრაინამ ითხოვა „ბუკის“ საჰაერო თავდაცვის სისტემების უფასოდ გადაცემა. მინდა ვთქვა ამასთან დაკავშირებით და ხაზი გავუსვა, რომ უკრაინამ გაგზავნა საქართველოში, თავდაცვის სამინისტროს მისამართზე უკვე 30 ოფიციალური მოთხოვნა. უკრაინის საელჩოს მიერ ბოლო იყო გაგზავნილი 12 იანვარს და მოთხოვნები უპასუხოდ დარჩა. ჩვენ აღვნიშნეთ, რომ შეიძლება მოხდეს იარაღის და სამხედრო ტექნიკის გადაცემა ან შესყიდვა.

რაც შეეხება უკრაინულ „ბუკებს“, რომელთა დახმარებითაც ჩამოაგდეს ათზე მეტი რუსული თვითმფრინავი, რომლებმაც დაბომბეს მშვიდობიანი ქართული ქალაქები, უკრაინა ადასტურებს მზადყოფნას, შეისყიდოს ისინი საქართველოსგან ურთიერთსასარგებლო პირობებით. მინდა კიდევ ერთხელ აღვნიშნო, რომ უკრაინა ეწინააღმდეგება ამ საკითხის საქართველოს შიდა პოლიტიკურ დღის წესრიგში გამოყენებას და ოფიციალურად უარყოფს ნებისმიერ ბრალდებას საქართველოს რუსეთის ფედერაციასთან ომში ჩათრევის მცდელობასთან დაკავშირებით.

უკრაინული მხარე ხაზს უსვამს საქართველოს საიმედო მოკავშირეების წრის ჩამოყალიბებისა და მისი უსაფრთხოების რეალური გარანტიების მნიშვნელობას. სწორედ ასეთი პოზიციებიდან ვაფასებთ და განვიხილავთ საქართველოს მონაწილეობას მოკავშირეთა და პარტნიორების ფართო კოალიციის ფორმატში, თითოეული ქვეყანა შეიძლება იყოს როგორც დონორი, ასევე სამხედრო დახმარების მიმღები, მსოფლიოს ბევრმა ქვეყანამ გამოიყენა ეს ფორმა იმისათვის, რომ ძველი შეიარაღება მოიშოროს და ახალი იყიდოს“, – განაცხადა კასიანოვმა.

კითხვაზე მისაღებია თუ არა ხელისუფლების წარმომადგენლების არგუმენტი, რომ ისინი ფრთხილ პოლიტიკას ატარებენ, რათა საქართველო შეიარაღების გადაცემით არ წარმოჩინდეს მხარედ, რადგან ეს შეიძლება იყოს საქართველოში მეორე ფრონტის გახსნის წინაპირობა, ანდრეი კასიანოვი აცხადებს, რომ „ჩემთვის გაუგებარია. ჩვენ უარვყოფთ ყველანაირ ბრალდებას, რომ ჩვენ ვცდილობთ საქართველოს ჩავრთოთ რუსეთთან ომში. ჩვენ ვიბრძვით მარტოები“.

ამასთან, ანდრეი კასიანოვის თქმით, უკრაინულმა მხარემ 30 ოფიციალური მოთხოვნა გაუგზავნა საქართველოს თავდაცვის სამინისტროს, თუმცა „გულწრფელად გეტყვით, რომ არცერთი პასუხი არ მიგვიღია ქართული მხარისგან. ჩვენ ვხედავთ აბსოლუტურ დუმილს“.

ანდრეი კასიანოვის თქმით, სამხედრო დახმარება უკრაინისთვის ძალიან მნიშვნელოვანია და ყოველი მოლაპარაკება საერთაშორისო პარტნიორებთან სწორედ ამ თემით იწყება და მთავრდება.

„ბუკები ჩვენთვის მნიშვნელოვანია, შეიარაღება ჩვენთვის მნიშვნელოვანია. რატომ არ შეეშინდა უკრაინას, როცა საქართველოს მიაწოდა სამხედრო დახმარება? თუნდაც სასყიდლის სანაცვლოდ, მაგრამ მიაწოდა ეს სამხედრო დახმარება და ჩვენ ძალიან გვჭირდება ეს საშუალებები და ამაზე საუბრობს პრეზიდენტი ზელენსკი ყოველ დღე, ყველა მოლაპარაკება საერთაშორისო პარტნიორებთან იწყება და მთავრდება ერთით შეიარაღება, იარაღი, იარაღი…“, – განაცხადა ანდრეი კასიანოვმა.