ბრიტანეთის დაზვერვა: უკრაინაში ბრძოლები ჩიხში შევიდა
დიდი ბრიტანეთის დაზვერვა ყოველდღიურ ანგარიშში წერს, რომ უკრაინაში ბრძოლები ჩიხში შევიდა. ანგარიშში განხილულია ოპერატიული ვითარება საბრძოლო მოქმედებების რამდენიმე რეგიონში.
აგარიშის თანახმად, უკანასკნელ დღეებში ბრძოლები მიმდინარეობდა სამ სექტორში. ჩრდილო-აღმოსავლეთში, კრემენნაიას მახლობლად, უკრაინის მხარემ, როგორც ჩანს, მცირე უპირატესობას მიაღწია და წარმატებით შეძლო რუსეთის ჯარების კონტრიერიშებისგან თავის დაცვა.
ბახმუტის მიმართულებით რუსეთის ჯარები და კერძო სამხედრო კომპანია „ვაგნერის“ ძალები, სავარაუდოდ, კვლავ იბრუნებენ ბრძოლისუნარიანობას ქალაქ სოლედარში, მას მერე, რაც ერთი კვირის წინ აიღეს ის.
სამხრეთში, ზაპოროჟიეს ოლქში, ორივე მხარეს კონცენტრირებული ჰყავს მნიშვნელოვანი ძალები, რომლებიც საარტილერიო ცეცხლს უშენენ ერთმანეთს. ისინი ერიდებიან მასშტაბურ საიერიშო მოქმედებებს და უმნიშვნელო შეტაკებებს ახორციელებენ.
მთლიანობაში სამხედრო მოქმედებები ჩიხში შევიდა. მაგრამ არსებობს ბახმუტის რაიონში რუსეთის ჯარებს ლოკალური წინსვლის რეალური შესაძლებლობა - დაასკვნის დიდი ბრიტანეთის დაზვერვა.