له امریکا وروسته بریتانیا هم له روسیې د تیلو واردات پای ته ورسوي
وروسته له هغې چې امریکا د روسیې د تیلو پر وارداتو بندیز ولګاوه، بریتانیا هم اعلان وکړ چې د روان کال تر پایه به له روسیې د تیلو واردات پای ته ورسوي، خو اروپایي ټولنه چې ډېره د روسیې پر انرژۍ متکي ده، پلان لري چې له روسیې د ګازو واردات دوه په درېیمه برخه کم کړي.
د امریکا د متحد ایالاتونو ولسمشر جو بایډن پرون د روسیې د تیلو پر وارداتو د بندیز لګولو د اعلان پر مهال وویل چې د تیلو د وارداتو بندیز د روسیې ولسمشر ولادیمیر پویتن ته د اوکراین د جګړې په خاطر سخته ضربه ده.
بایډن امریکایانو ته خبرداری ورکړ او څرګنده یې کړه چې له ازادۍ څخه دفاع خپل قیمت لري.
د روسیې د تیلو او ګازو صادرات د روسیې د بودجې د تمویل لویه برخه ګڼل کېږي او هم د دې هېواد د پیسې روبلو د ملاتړ لپاره د بهرنیو اسعارو کلیدي سرچینه ده.
د ستراتيژیکو او نړیوالو مطالعاتو په مرکز کې د انرژۍ څېړونکی بېن کاهیل وایي، د روسیې د تیلو پر وارداتو بندیز به هغه اندېښنې لازیاتې کړي چې له روسیې سره د انرژۍ د سوداګرۍ برخه کې د مالي او قانوني خطرونو پر سر راپورته شوي دي.
روسیه به چې د ورځې شااوخوا پنځه میلیونه بېرله تیل صادروي، په خپلو صادراتو کې د پام وړ کموالي شاهده وي.
د کاهیل په وینا که روسیه د خپلو تیلو لپاره خریدار پیدا نه کړي ښایي د تیلو تولید کم کړي او چین به هم ښایي ونه شي کولی چې ټول هغه تیل او ګاز واخلي چې دا هېواد یې اوس اروپا ته په لوړه بیه صادروي.
د روسیې ګاز د اروپایي ټولنې یو شمېر غړي هېوادونه اخلي.
د جرمني صدراعظم اولاف شولڅ ویلي دي چې دی له دې سره مخالف دی چې له روسیې څخه د ګازو او تیلو صادرات بند شي.
شولڅ ویلي دي چې اروپایي ټولنه له روسیې د انرژي صادراتو ته سخت ضرورت لري.
دغه راز په پام کې ده چې سبا پاریس ته نژدې په ویرسیلیس کې د اروپایي هېوادونو د مشرانو دوه ورځنۍ غونډه پیل شي او دې غونډه کې به هم پردې خبرې وشي چې څرنګه د انرژي په برخه کې پر روسیې اتکا کمولی شي.
په داسې حال کې چې پر اوکراین د روسیې د یرغل نن دوه اوونۍ پوره شوې او پر روسیې د سختو بندیزونو په ترڅ کې له دې هېواده د لویدیځ شرکتونو د وتلو لړۍ روانه ده، په دې ترڅ کې د تیلو ستر شرکت شیل اعلان وکړ چې له روسیې ووځي.
دغه راز د خوړو ستر شرکت مکدونالډس او د کافي شرکت سټاربوکس هم له هغو دوه سوه نورو شرکتونو سره یوځای شول چې روسیه کې یې تر نامعلوم وخته خپل فعالیتونه ځنډولي دي.