Kreml Google-y Moskwadaky ýörişlere çagyrmakda aýyplaýanlarynyň sanawyna goşdy

Russiýa Moskwanyň ýaşaýjylaryny protestlere, şol sanda rugsat berilmedik ýörişlere çagyrmakda aýyplaýanlarynyň sanawyna düýbi Kaliforniýada ýerleşýän Google tehnologiýa läheňini hem goşdy.


Russiýanyň tele-kommunikasiýa pudagyna gözegçilik edýän Roskomnadzor edarasy özüniň 11-nji awgustda ýaýradan beýanatynda Google-yň wideo paýlaşmak üçin platformasy – YouTube-y aýratyn belläp geçdi.


Mundan bir gün öň, Moskwada soňky sekiz ýylyň içinde iň uly protest çäresi geçirilipdi.


Roskomnadzor düýbi ABŞ-da ýerleşýän tehnologiýa läheňi Google-a ugradan hatynda “bikanun köpçülikleýin çäreleri” diýip häsiýetlendiren ýagdaýlaryny mahabatlandyrmazlyga çagyrdy.


Mundanam başga, Moskwa protestleri öjükdirmekde ABŞ-nyň hökümetini we Germaniýanyň döwlet tarapyndan maliýeleşdirilýän Deutsche Welle neşirini aýyplady.


Moskwanyň Geňeşine 8-nji sentýabrda geçirilmeli saýlawlara oppozisiýa wekilleri hasaba alynmanyndan soňra, ýagny iýulyň aýaklaryndan bäri Moskwada her hepde protest çäreleri geçirilýär.