Мурдагы 11 спикер укуктук-демократиялык коом курууга чакырышты
Кыргызстанда мурдагы спикерлердин кеңеши бүгүн, 4-июлда өлкөдөгү акыркы саясий кырдаал боюнча билдирүү таратты. Анда парламенттин мурдагы төрагалары Медеткан Шеримкулов, Алмамбет Матубраимов, Мукар Чолпонбаев, Абдыганы Эркебаев, Алтай Бөрүбаев, Муратбек Мукашев, Марат Султанов, Айтибай Тагаев, Зайнидин Курманов, Исхак Масалиев, Акматбек Келдибековдун ысымдары жазылган.
Билдирүүдө азыркы саясий абал коомчулукта тынчсыздануу жаратып жатканы, анын башкы себептеринин бири коррупцияга каршы күрөш экени айтылат.
"Президент Сооронбай Жээнбеков мурдагы досу жана мурдагы президент Алмазбек Атамбаевдин кызыкчылыгынан эл менен мамлекеттин кызыкчылыгын жогору койду. Атамбаевдин алдын ала ойлонулган кыйтыр жана элге каршы саясаты: өзүн уккан президентти, өкмөт башчыны бийликке коюп, өлкөнү өзүм башкарам деген планы ишке ашпай калды. Кыргызстандагы коррупцияга каршы күрөш Атамбаевдин кылмыштуу фактыларын аныктады. Жогорку Кеңеш мурдагы президентти кол тийбестиктен ажыратканы Башкы прокуратурага тергөө иштерин баштоого шарт түздү. Атамбаев буга чейин "мыйзам алдында баары бирдей, ууру түрмөдө отурушу керек" деп айтканы менен өзү аны моюнга албай турганы көрүнүп калды" деп жазылган.
Мындан тышкары мурдагы президент мыйзамдан өзүн жогору койбошу керектиги, өз чындыгын тергөө жана сот органдарына далилдөөгө тийиштиги белгиленген.
Бүгүнкү күнү экономика, кадр саясаты, коррупцияга каршы күрөш, чек ара жана башка тармакта көп иштер жүрүшү керектиги, жалпы элдик референдум аркылуу президенттик же парламенттик башкаруу формасын аныктап алып, андан кийин Конституциялык реформаны баштоо зарылдыгы айтылган. Учурда эл жана өлкөнүн өнүгүшү үчүн чындап иштөө мезгили келгени кошумчаланып, бул билдирүү аркылуу бардык жарандарды провакация, жалган маалымат, убадаларга ишенбөөгө, кырдаалды туура түшүнүүгө, бөлүнбөөгө чакырык ташталган. Мыйзам алдында баары бирдей экени жана ар ким кылган иши үчүн жооп бериши керектиги жазылган. Мурдагы спикерлер кетирилген каталарды биргеликте оңдоп, укуктук-демократиялык коом курууга да үндөштү.
Атамбаев жана анын тарапкерлери көптөн бери азыркы бийликти сындап келе жатышат.
4-июлда Бишкекте "Соке болбой калды" деп аталган митинг уюштурушуп, анда да Атамбаев Жээнбековду сындаган. Ага кайрылып, «от менен ойнобо, бир нерсе болсо жоопкерчилик президентте болот» деп айткан.
27-июнда Жогорку Кеңеш Атамбаевдин «экс-президент» макамын алып, кол тийбестиктен ажыраткан. Бул чечим укук коргоо органдарына аны кылмыш жообуна тартууга мүмкүнчүлүк берет.
Мурдагы президенттин ондогон тарапкерлери 22-июндан бери Кой-Таш айылындагы анын үйүндө топтолуп, тилектештик билдирип турушат. (NT)