Новости за 26.09.2023

Мөселманнар дөньясы бу көннәрдә Мөхәммәт пәйгамбәрнең туган көнен билгеләп төрле чаралар үткәрә. Шундый күркәм бәйрәмнәрнең берсе Яңа Чүпрәле «Минзаһид» мәчетендә узды. Биредә мәчет каршында оештырылган «Мәрҗән» балалар тәрбия үзәге балалар өчен Мәүлид кичәсе оештырды. Бу хакта «Туган як» хәбәр итә.

2023 елда Россия Федерациясе Кораллы Көчләренә контракт буенча хезмәткә 325 меңнән артык кеше кабул ителгән. Бу хакта Россия Федерациясе Иминлек Советы Рәисе урынбасары Дмитрий Медведев белдергән. ТАСС шулай дип хәбәр итә.

Новосибирск өлкәсенең Колыван районы Юрт-Ора авылында 30 сентябрь көнне 12.00 сәгатьтә «Сөмбелә» көз бәйрәме узачак. Бу хакта Новосибирск өлкәсе Татар мәдәни үзәге ВКонтакте социаль челтәрендәге сәхифәсендә хәбәр итә.

Бүген Казанның «Ак Барс» хоккейчылары «Динамо Минск» командасына 3:2 исәбенә оттырды. Матч Минск шәһәрендә узды.

Иркутск өлкәсенең Чуна районы Чуна бистәсе оешуның 77 еллыгы хөрмәтенә бәйрәм оештырганнар. Аны «Чуна бистәсе мөселман җәмгыяте» дини оешмасы рәисе Нуртын Низамов җитәкчелегендә мөселман-активистлар әзерләгән. Бу хакта Россия Федерациясе мөселманнарының Дини җыены үзәкләштерелгән дини оешмасы матбугат хезмәте хәбәр итә.

Идел һәм аның кушылдыклары саегу сәбәпле, элек су астында яшеренгән чүп-чар өемнәре ачыкланган. Моннан тыш, яр буе зонасының артуы законсыз төзүчеләрне җәлеп итәргә мөмкин. Шуңа күрә Табигатьтән файдалану өлкәсендә күзәтчелек федераль хезмәтенең Идел-Кама Төбәкара идарәсе су объектының торышын актив күзәтә. Бу хакта бүген «Татар-информ»да узган матбугат конференциясендә ведомство җитәкчесе Фаяз Шакиров хәбәр итте.

Мәскәүнең иң зур мәчете — Җәмигъ мәчетендә келәмнәрне алыштырганнар. 6000 квадрат метрдан артык идән келәме Төркиядә махсус заказ белән әзерләнгән. Алар күп кешеле бүлмәләр өчен ефәктән тукылган. Элекке келәмнәргә дә урын табылган — аларны Россия төбәкләрендәге мәдрәсә һәм мәчетләренә җибәрәчәкләр. Бу хакта Россия Мөфтиләр шурасы матбугат хезмәте хәбәр итә.

Төркмәнстан җитәкчелеге чакыруы белән Татарстан Рәисе Рөстәм Миңнеханов Аркадаг шәһәренә килде. Хөрмәтле кунак сыйфатында ул дустанә илнең Бәйсезлек көнен бәйрәм итүдә катнашачак.

23 сентябрь көнне Томск шәһәренең Новособорная мәйданында традицион «Чак-чак party» акциясе узган. Ул «Томская кулебяка» фестивале кысаларында оештырылган. Бу хакта Томск Татар мәдәнияте үзәге ВКонтакте социаль челтәрендәге сәхифәсендә яза.

Казанның 41нче мәктәбенең мәктәпкәчә төркемнәр тәрбиячесе Айсылу Лотфуллина «Иң яхшы туган тел һәм әдәбият укытучысы – 2023» Бөтенроссия һөнәри бәйгесендә абсолют җиңүне яулады. 26 сентябрьдә Карачай-Черкесиядән Казанга җиңү белән кайткан тәрбиячене хезмәттәшләре һәм Татарстан мәгариф һәм фән министры Илсур Һадиуллин каршы алды.

Башкортстанның дәүләт экспертизасы идарәсе Уфада крематорий төзү проектына уңай бәяләмә бирә. Әлеге документ бердәм дәүләт нәтиҗәләр реестрында дөнья күргән. Бу хакта «Башинформ» хәбәр итә.

Саксызлык аркасында кеше сәламәтлегенә җитди зыян китерүдә гаепләнеп, Бөгелмәдә яшәүче хатын-кыз хөкемгә тартылачак. Бу хакта Тикшерү комитетының Татарстан буенча Тикшерү идарәсе җитәкчесе өлкән ярдәмчесе Андрей Шептицкий хәбәр итә.

Татар милли герое Туган батыр турында икенче китап дөньяга чыкты. Проект авторлары Гарри Поттер кебек кызыклы һәм маҗаралы китаплар циклы әзерләргә планлаштыра.

Татарстан Рәисе Рөстәм Миңнеханов мөселманнарны Мәүлид бәйрәме белән котлады.

Ульяновскиның «Өмет» газетасында «Татар мәктәбендә «Белем бәйрәме» дигән язма чыкты. Аны Димитровград шәһәреннән Мәрьям Хәйбуллова язган.

Үзәк Россия территориясендә 10 октябрь тирәсендә температура шактый түбәнәергә мөмкин. Һава торышы үзәгенең әйдәп баручы белгече Михаил Леус шулай дип фаразлый.

Татарстан халкы кискен респиратор вируслы инфекция һәм коронавирусны ешрак йоктыра башлады. Бу хакта «Татар-информ»га Кулланучылар хокукларын яклау һәм кеше иминлеге өлкәсендә күзәтчелек федераль хезмәтенең Татарстан буенча идарәсе матбугат хезмәтендә сөйләделәр.

Татарстанның Яңа Чишмә районы хуҗалыгында эре мөгезле терлек бруцеллезы табылган. Килгән турыдан-туры зыян 60 млн сумга якын тәшкил итә. Әмма фермерга килгән зыянны капламаячаклар. Бу хакта Татарстан Министрлар Кабинетының Баш ветеринария идарәсе башлыгы Алмаз Хисаметдинов республиканың Хөкүмәт йортында узган брифингта хәбәр итте.

Татарстанда үлгән акчарлакларда кош гриппы ачыкланмаган. Быел башка төбәкләрдә, күбрәк бу кошлар вирус йоктырган, өстәвенә, алар күпләп үлгән. Бу хакта Федераль ветеринар һәм фитосанитар күзәтчелек хезмәтенең Татарстан буенча идарәсе җитәкчесе Илнур Галиев сөйләде.

Татарстанда 26 сентябрь кичендә Мәүлид бәйрәме – Мөхәммәт пәйгамбәрнең туган көнен билгеләп үтәчәкләр. Татарстан мөфтиенең беренче урынбасары, «Кол Шәриф» мәчете имамы Илфар хәзрәт Хәсәнов бу бәйрәмнең нәрсә аңлатканын һәм аны ничек билгеләп үтәргә кирәк икәнен сөйләде.

«Таткультресурсцентр» директоры Алсу Мифтахова «Татарстанның мәдәни башкаласы» конкурсы кысаларында уза торган концертларның аншлаг белән узуын әйтте.

Татарстан башкаласында Евгений Завойский исемендәге премияне тапшырдылар, ул электрон парамагнит-резонанс томографиясенә зур өлеш керткән өчен бирелә. Бүләкне республика Фәннәр академиясе бинасында Татарстан Дәүләт Советы Рәисе Фәрит Мөхәммәтшин тапшырды.

Татарстанда 16 ноябрьдә герой яшь гвардиячеләргә һәйкәл ачу планлаштырыла. Әлегә урыны билгеләнмәгән, Татарстанның берничә район җитәкчелеге белән сөйләшүләр алып барыла. Бу хакта «Татар-информ»га VI чакырылыш ТР Дәүләт Советы депутаты, «Беренчеләр хәрәкәте»нең Казан бүлеге җитәкчесе Динар Бариев хәбәр итте.

24 октябрьдән WhatsApp мессенджеры 5.0 версияле операцион системасы булган Android җайланмаларында гына эшләчәк. Бу хакта мессенджерның сайтында хәбәр ителә.

Дәүләт Думасы депутатлары нефть-газ чыгаручы компанияләр өчен нормадан артык табышка салым кертү турында закон проектын эшләгән. Ул тармакның уртача табышы 2021-2022 елларда 1 млрд сумнан арткан барлык компанияләренә кагыла. Бу исемлеккә шул исәптән «Татнефть», «Лукойл», «Газпромнефть» һәм башкалар эләгә. «Известия» газетасы документка сылтама белән шул хакта яза.