Новости за 03.04.2024

«Миллиард.Татар» басмасы «Татарча мем» бөтенроссия график сурәтләр һәм видеороликлар бәйгесен игълан итә. Бәйге Татарстан Республикасының Мәгариф һәм фән министрлыгы, «Ялкын» һәм «Чаян» журналлары, «Интертат» электрон газетасы белән берлектә, «Сабыйлар» балалар үзәге ярдәме белән уза.

Әлмәт шәһәренең «Кадим Әлмәт» этник музыка төркеме Истанбулда үткәрелгән ифтар мәҗелесендә Төркия татарлары алдында чыгыш ясады. Коллектив тамашачыларга борынгы уен кораллары белән бергә бәетләр һәм борынгы җырлар тәкъдим итте.

Бүген энергетика һәм энергия ресурсларының нәтиҗәлелегенә багышланган Татарстан халыкара форумы кысаларында TatEnergyExpo махсуслаштырылган күргәзмәсе ачылды. Татарстан Рәисе Рөстәм Миңнеханов экспозиция һәм энергетика өлкәсендәге яңалыклар белән танышты. Бу турыда «Татар-информ» хәбәрчесе Александр Хевронин яза.

Татарстанның танылган журналисты Владимир Музыченко вафат булган. Гаммәви мәгълүмат чаралары хезмәткәренең йөрәге 2 апрель кичендә 74 яшендә тибүдән туктаган, дип яза «Казанские ведомости» газетасы.

«Крокус Сити Холл»дагы теракт вакытында һәлак булган балалар саны алтыга җитте, дип хәбәр итә РИА Новости агентлыгы. Элегрәк биш бала үлүе хакында билгеле булган иде.

Татарстан Гадәттән тыш хәлләр министрлыгында, елгаларда суның биеклеге куркыныч билгегә җиткәч, 2024 елның язгы ташу чорында су басу ихтималы булган зоналарны атадылар. Шул хактагы мәгълүмат ведомствоның рәсми сайтында урнаштырылган.

Татарстан мәдәният министры Ирада Әюпова Мәскәүдә «Идел буе халыкларының традицион костюмы» дип аталган күргәзмәне ачу тантанасында катнашты. Экспозиция РФ Федерация Советы вестибюлендә тәкъдим ителгән.

Татар китабы йортының өлкән фәнни хезмәткәре Гөлназ Җиһангирова Татарстан Милли музее филиалы – Шәриф Камал мемориаль музеенда язучы, драматург Кәрим Тинчуринның язу өстәле саклануын әйтте.

Тайваньда җир тетрәү нәтиҗәсендә зыян күрүчеләр саны 711 кешегә җиткән, дип хәбәр итә РИА Новости агентлыгы.

Бүген Башкортстан Республикасына эш сәфәре кысаларында Татарстан Республикасы Премьер-министры урынбасары, Бөтендөнья татар конгрессының Милли Шура рәисе Васил Шәйхразыев Бүздәк районындагы татар тарихи-мәдәни үзәгендә булды. Бу хакта Бөтендөнья татар конгрессы матбугат хезмәте хәбәр итә.

Владимир Жаворонков Казанның Киров һәм Мәскәү районнарының яңа башлыгы итеп билгеләнде. Бу хакта хакимиятнең телеграм-каналында хәбәр ителә.

Бүген республика башкаласында, «Казан Экспо» күргәзмә комплексы мәйданчыгында энергетика һәм энергия ресурсларының нәтиҗәлелеге буенча Татарстан халыкара форумы ачылды. Аны ачу тантанасында ТР Рәисе Рөстәм Миңнеханов та катнашты.

Татарстанда 2024 елда субсидияләнә торган авиамаршрутлар исемлеген киңәйтергә ниятлиләр. ТР Хөкүмәтенең карар проекты коррупциягә каршы экспертиза уза.

Бүген энергетика һәм энергия ресурсларының нәтиҗәлелеге буенча республика халыкара форумы кысаларында автомобильләргә газ тутыра торган ике компрессор станциясе һәм ике криоАЗС ачылды. Чарада ТР Рәисе Рөстәм Миңнеханов та катнашты.

Казан аэропорты җәйге расписаниегә күчте, ул 26 октябрьгә кадәр гамәлдә булачак. Әлеге чорда яңа рейслар ачу көтелә.

Тайваньда соңгы 25 елдагы иң көчле җир тетрәү булган. Бу хакта РИА Новости хәбәр итә.

Татарстанда «Рамазан – изге гамәлләр ае» хәйрия марафоны дәвам итә. Мөфтиятнең «Зәкят» хәйрия фонды изге айның 20 көнендә, битараф булмаган кешеләр ярдәме белән, 19 мохтаҗга, шул исәптән, 15 авыруга: 10 балага һәм 5 олы кешегә акчалата ярдәм күрсәтте. Бу хакта ТР Диния нәзарәте матбугат хезмәте хәбәр итә.

Май аенда Казанда Бөтенроссия китапханәләр конгрессы узачак. Анда катнашу өчен Россиядән һәм чит илләрдән делегатлар көтелә. Форум Татарстан башкаласында беренче тапкыр үтә. Һәм кунакларны кабул итүнең төп мәйданы Татарстан Милли китапханәсе булачак. Бу хакта Бөтендөнья татар конгрессы матбугат хезмәте хәбәр итә.

Татарстанның төрле районнарында Бердәм дәүләт имтиханы (ЕГЭ) һәм Төп дәүләт имтиханы (ОГЭ) тапшыручы укучыларга теләктәшлек сүзләре язылган стендлар, афиша һәм плакатлар элгәннәр. Бу плакатларны «Беренчеләр хәрәкәте» ясаган. Бу гыйбарәләрдә имтиханнарга әзерләнгәндә була торган стресс, борчылулар һәм чыгарылыш укучылары өчен актуаль булган башка темалар күтәрелә, дип хәбәр итә «Беренчеләр. Татарстан» матбугат хезмәте.

Бүген, 3 апрельдә, Татарстанда температура фонының тагын да күтәрелүе көтелә. Бу хакта ТР Гидрометеоүзәге хәбәр итә.

Яңа Уренгойда тарих буенча Бөтенроссия укучылар олимпиадасының йомгаклау этабын ябу тантанасы узды, анда Россиянең 78 төбәгеннән 290 өлкән сыйныф укучысы үз белемнәрен күрсәтте. 24 катнашучы җиңүче булды, призер исемен 112 укучы яулады. Татарстан Республикасы командасы, шул исәптән Әлмәт шәһәренең 2нче лицее укучылары – иң яхшылар арасында. Бу хакта «Әлмәт таңнары» хәбәр итә.

Балтач районы Чутай авылында яшәүчеләр махсус хәрби операция зонасына җибәрү өчен соңгы 2-3 көндә өлешләп 2500 пакет аш тутырган. Бу хакта «Хезмәт» сайтында Гөлзидә Газизуллина хәбәр итә.

Кайбыч районы Борындык авылында туып-үскән Айдар Гыйбадуллин Олы Кайбыч авылындагы кафеда авылдашлары, туганнары өчен ифтар мәҗлесе үткәрде. Бу хакта «Кайбыч таңнары» сайтында Мингазиз Сөнгатуллин яза.

Махсус хәрби операциядә катнашучы Зәй районы Чыбыклы егетләре исемле посылкаларны алган, авылдашларына шундый ярдәмнәре, терәк булганнары өчен рәхмәтләрен җиткереп җавап юллаганнар. Бу хакта «Зәй хәбәрләре» яза.

Саба балыкчылары Чулман елгасының Ташбака дип аталучы урынында, боз астыннан балык тоту буенча 25нче тапкыр-юбилей ярышларын үткәрде. Саба балыкчыларының 1999 елдан бирле оештырыла торган бу бәйгесе үзенчәлекле рекорд булып тора. Бу хакта https://saba-rt.ru/ хәбрә итә.