Новости за 10.04.2024

Россиянең иң төньягында яшәүче мөселманнар Ураза бәйрәмен билгеләп үтте. Изге Рамазан аеның тәмамлануын бәйрәм итү Якутск Җәмигъ мәчетендә намаз уку белән башланды. Бу хакта Якут-Саха мәгълүмат агентлыгы хәбәр итә.

Яз иртә килгәнлектән кайбер урыннарда инде бал кортлары уянды, әгәр бу атнада Татарстанда җылы һава торышы сакланса, башка бөҗәкләр дә күренәчәк. Казан федераль университеты Фундаменталь медицина һәм биология институтының биоэкология, гигиена һәм иҗтимагый сәламәтлек кафедрасы мөдире Илгизәр Рәхимов шулай дип белдерде. Бу хакта югары уку йортының матбугат хезмәте хәбәр итә.

Ураза бәйрәме әхлакый камиллеккә, уйлар һәм гамәлләрнең чисталыгына омтылышны гәүдәләндерә. Ата-бабаларының бай традицияләренә таянып, ислам динен тотучылар бу бәйрәмдә мохтаҗларга ярдәм күрсәтә, шулай ук вакытын якыннары белән үткәрә, диелә Россия Президенты Владимир Путинның котлавында.

Татарстан мөфтие Камил хәзрәт Сәмигуллин Галиев мәчетендә укылган Ураза гаете вәгазендә Аллаһы Тәгалә кушканча яшәүнең нигезләре, рибаның зыяны һәм зәкятнең файдасы турында сөйләде.

Татарстан мөселманнары Диния нәзарәте яңартылган «Казан басмасы»н бушлай таратуны дәвам итә. Рамазан аеның соңгы көнендә, 9 апрельдә, яңа Мүсхәф Ерак Көнчыгыш мөселманнары Диния нәзарәтенә һәм Приморье крае мөселманнары Диния нәзарәтенә тапшырылды. Барлыгы 200 данә Мүсхәф җибәрелде. Китаплар әлеге төбәкләрнең мәчетләренә һәм мәгариф учреждениеләренә таратылачак. Бу хакта ТР Диния нәзарәте матбугат хезмәте хәбәр итә.

Казанның Галиев мәчетендә Ураза бәйрәме вәгазе укылды. Татарстан мөфтие Камил хәзрәт Сәмигуллин вәгазендә Рамазан аеннан соң игелекле гамәлләр кылу – ураза кабул булуның билгесе, дип атады.

Бүген, 10 апрельдә, Казанның ике мәйданчыгында Ураза гаетен билгеләп үтәчәкләр. Шәһәрлеләрне татар эстрадасы йолдызлары концерты, милли аш-су, мастер-класслар һәм бүләкләр уйнату көтә. Чараларга керү ирекле. Бу хакта Казан мэриясе матбугат хезмәте хәбәр итә.

«Рамазан ае һәм Ураза гаете - гаилә һәм әхлак бәйрәме»– дип башлады вәгазьне ТР мөфтие.

Татарстан Рәисе Рөстәм Миңнеханов һәм Казан мэры Илсур Метшин Казанның Галиев мәчетендәге бәйрәм намазында катнаша. Шулай ук залда махсус хәрби операциядә катнашучылар, шул исәптән Россия Герое Рәсим Баксиков та бар.

Түбән Кама районы агросәнәгатьчеләре техниканың чәчү эшләренә әзерлеге республика смотр-конкурсында җиңү яулады. Бу хакта Түбән Кама муниципаль районы башкарма комитеты җитәкчесе урынбасары Альфред Нигъмәтҗанов шәһәр администрациясендәге атналык планеркада сөйләде. https://nkamsk-rt.ru/ сайтында шул хакта хәбәр ителә.

Казанның Галиев мәчетендә Ураза бәйрәме туры трансляциядә күрсәтелә. Аны ТНВ телеканалы оештыра.

Татарстан Рәисе Рөстәм Миңнеханов үзенең телеграм-каналына язылучыларны Ураза бәйрәме белән котлады.

Бүген, 10 апрельдә, Татарстанда җылы һәм чагыштырмача дымлы һава торышы фаразлана. Бу хакта ТР Гидрометеоүзәге хәбәр итә.

Татарстан Республикасы Рәисе Рөстәм Миңнеханов Ураза бәйрәме белән котлады.

Актаныш районы мәдәният йортында Россиядә - Гаилә елы, Бөтендөнья татар конгрессының «Шәхесләр» елы уңаеннан район оешма предприятие, уку-укыту учреждениеләренең сәнгать коллективлары смотр конкурста катнаша. Бу хакта «Актаныш» сайтында Әлфия Авзалова исемендәге район мәдәният сарае хезмәткәрләренә сылтама белән хәбәр ителә.

Россиядә яңа бәйрәм – йөкле хатын-кызлар көне билгеләп үтелә. Ул елга ике мәртәбә – 7 апрель һәм 7 октябрьдә билгеләп үтеләчәк. Чаллыдагы 5нче шәһәр хастаханәсенең хатын-кызлар консультациясендә үткән файдалы чара да әлеге бәйрәмгә багышланды. Бу хакта «Шәһри Чаллы» сайтында Сәрия Гарипова хәбәр итә.