Новости за 23.04.2024

Киләсе елда «Мин татарча сөйләшәм» акциясе 20нче тапкыр узачак. Бөтендөнья татар яшьләре форумы рәисе Райнур Хәсәнов киләсе елда акцияне уздыруга дәүләт күбрәк ярдәм күрсәтсен иде дип мөрәҗәгать итте.

Татарстан хәрбиләре һәм махсус хәрби операциядә катнашучылар ТР вице-премьеры – Татарстанның Россиядәге Тулы вәкаләтле вәкиле Равил Әхмәтшинны туган көне белән котлады. Котлау видеосын республиканың тышкы сәясәт ведомствосының матбугат хезмәте бастырды.

Татарстан таможня хезмәткәрләре махсус хәрби операция зонасына өч автомобиль тапшырдылар, алар таможня законнарын бозу буенча судлар тарафыннан конфискацияләнгән.

Бүген Казан вокзалына «Хакыйкать дөреслектә» («Сила в правде») агитация поезды килде. Аның вагоннары махсус хәрби операциягә багышланган экспозициягә әверелгән. Ватан тарихы һәм башка патриотик темаларга багышланган вагоннар, хәтта сугыш техникасы белән аерым платформа да бар.

«Мин татарча сөйләшәм» акциясен оештыручылар быел кертелгән яңалыклар турында сөйләде. Акциягә багышланган матбугат очрашуы «Татар-информ» мәгълүмат агентлыгында узды.

22 апрель Кәрим Тинчурин исемендәге Татар дәүләт драма һәм комедия театрында «Татарстанның мәдәни башкаласы» бәйге-фестивале башланып китте. Муниципаль берәмлекләр арасында узучы бәйгегә узган елны Гран-при яулаган Арча муниципаль районы старт бирде. Алар башкала кунакларына «Нәсел җебем синдә, Арчам!» дип исемләнгән концерт-тамаша тәкъдим иттеләр.

Быел Казан белән Ульяновск арасында елга маршруты 1 майда ачыла. Сәяхәтләр «Муса Җәлил» метеорында башкарылачак.

Казанда шәһәр җәмәгать транспортыннан файдалануның камилләштерелгән кагыйдәләрен кабул итәргә җыеналар. Хәзер эшләнгән документ коррупциягә каршы экспертиза уза. Аны кабул итүнең максаты булып, пассажирларга хезмәт күрсәтү культурасын, хәрәкәт итә торган составларның иминлеген һәм саклануын арттыру тора.

Унберенче тапкыр Актаныш районы халкы махсус хәрби операция зонасына якташ сугышчыларга гуманитар ярдәм җибәрде. Районның һәр кешесе хәрбиләргә мөмкин кадәр ярдәм күрсәтә — алар азык-төлек, кием, чиста су китерә. Шулай ук башка кирәк-яраклар сатып алу өчен акча җыелган.

Татар шагыйре Габдулла Тукайның тууына 138 ел тулу уңаеннан Мәскәүдә аның һәйкәленә чәчәкләр салыначак. Тантана 26 апрельдә уза. Бу хакта Татарстан Республикасының Россия Федерациясендәге Тулы вәкаләтле вәкиллегенең матбугат хезмәте хәбәр итә.

Россия Президенты Владимир Путин «А. Н.Островскийның тууына 200 ел тулу уңаеннан» истәлекле медален гамәлгә куйды - аны театр сәнгате өлкәсендәге казанышлары, Россия театр сәнгате традицияләрен өйрәнүгә һәм үстерүгә зур өлеш керткәннәре, югары сәнгатьле образлар, спектакльләр, кино һәм телефильмнар тудырганнары, чит илләрдә Ватан театрын популярлаштыру буенча актив эшчәнлекләре өчен мәдәният эшлеклеләренә һәм хезмәткәрләренә тапшырачаклар.

26 апрельдә Чиләбе шәһәренең 81нче урта гомуми белем бирү мәктәбендә «Аулак өй – көрәш» зона этабы узачак. Бу хакта Бөтендөнья татар конгрессының матбугат хезмәте хәбәр итә.

Татарстан 2023 ел йомгаклары буенча икътисади яктан көчле төбәкләр рейтингында 18нче урынны алды. Әлеге топ Федераль дәүләт статистикасы хезмәте, Финанс министрлыгы, Федераль салым инспекциясе һәм Федераль казначылык мәгълүматлары нигезендә төзелгән. РФ субъектларында 9 күрсәткеч бәяләнгән, шул исәптән уртача хезмәт хакы күләме, яшәү минимумы, салымнар түләү һәм сәнәгать җитештерүе күрсәткече, дип яза «Известия».

Пассажирлар агымы сизелерлек кимегән очракта авиабилетлар арзанрак булачак. Бу хакта «Татар-информ»га «АвиаПорт» агентлыгының башкарма директоры Олег Пантелеев сөйләде.

2024 елның 20 апрелендә Серовтагы «Надеждинский» мәдәният йортында «Без - Урал татарлары» IV ачык фестиваль-конкурсы югары дәрәҗәдә узды. Анда төрле номинацияләрдә һәм яшь категорияләрендә 150дән артык кеше катнашты, дип хәбәр итә ТРның Свердловск өлкәсендәге Даими вәкиллеге матбугат хезмәте.

Россиядә «яшь хезмәткәр» дип, квалификациясенә һәм белеменә карамастан, өч елдан да артык эш стажы булмаган 35 яшькә кадәрге Россия гражданы аталачак. Моннан тыш, бу билгеләмә яшь белгечтән аерым тора. Бу хакта Россия Президенты Владимир Путин имзалаган хокукый мәгълүматның рәсми порталындагы документта күрсәтелгән.

Россиядә тәкъдим ителгән хезмәт хакы күләме артты. Мәсәлән, март аенда вакансияләр урнаштырылган белдерүләрдә эш бирүчеләр хезмәт хакын гыйнвар аена караганда 12,7 процентка югарырак күрсәткәннәр, дип яза «Известия».

Татар халкының бөек җырчысы Рәшит Ваһапов исемендәге фестиваленең 20 еллык юбилей гала-концерты Сергачта үтте, дип яза Бөтендөнья татар конгрессы матбугат хезмәте.

2024 елның 16-18 апрелендә беренче тапкыр Ханты-Мансийскида Габдулла Кариев исемендәге Казан Татар дәүләт яшь тамашачы театрының гастрольләре узды. Гастрольләр «Большие гастроли» программасы ярдәмендә гамәлгә ашырылды, Россия Федерациясе Мәдәният министрлыгының Бөтенроссия гастроль-концерт планы нигезендә РОСКОНЦЕРТ ФДБУК тарафыннан оештырылды, дип хәбәр итә ТР Мәдәният министрлыгы матбугат хезмәте..

Бүген Татарстанда яшенле яңгыр булачак, көндез боз явуы ихтимал. Бу хакта ТР Гидрометүзәге кисәтә.

Казан епархиясе приходларында су басудан зыян күргән Оренбург өлкәсе халкы өчен 1,6 млн сум акча җыелган. Әлеге акчага мотопомпалар һәм су суырту өчен җиңсәләр, һаваны киптерү җайланмалары, раскладушкалар һәм урын-җир кирәк-яраклары, шулай ук эчә торган суны агызу өчен 5 литрлы пластик шешәләр сатып алынган. Бу хакта Казан мэриясе матбугат хезмәте хәбәр итә.

Шигърият сөючеләрне һәм күп еллар дәвамында «Сельская новь» газетасы редакциясен җитәкләгән шагыйрь, прозаик, рәссам һәм журналист Александр Заварихинның иҗатын хөрмәт итүчеләрне «Аксубай җире җырчысы» дигән онлайн-бәйгеседә катнашырга чакыралар. Бу хакта «Аксубай» сайтында хәбәр ителә.

Алабуга шәһәренең «Ләйсән» 35нче балалар бакчасында «Мәктәпкәчә яшьтәге балаларны һәрьяклап үстерү нигезе буларак билингваль һәм полилингваль белем бирү» дип аталган Икенче Бөтенроссия фәнни-гамәли конференция узды. Чарада Кыргызстан Республикасы кунаклары катнашты. Бу хакта «Алабуга нуры» хәбәр итә.

Чирмешәндә Игелек ярминкәсе үтте. Район үзәге оешмалары аннан алган керемне махсус хәрби операция зонасындагы якташларына озатачак. Бу хакта «Безнең Чирмешән» сайтында Марат Гомәров яза.

Саба районы мөхтәсибәте Оренбург өлкәсендә су басудан зыян күрүчеләргә ярдәм җыюны дәвам итә. Кирәк-яракларны Сабаның Җәмигъ мәчетенә тапшырырга мөмкин. Һәркем, хәленнән килгәнчә, табигать бәла-казасыннан зыян күреп йорт-җирсез, мал-мөлкәтсез калган халыкка үзеннән өлеш чыгара ала. Бу хакта https://saby-rt.ru/ хәбәр итә.