Зеленскийца кеста цхьанакхетар ву ша аьлла Порошенкос
Украинан куьйгалхочо Порошенко Петрос хаамбина, президентан харжамашкахь толам баьккхинчу Зеленский Владимирца цхьанакхета барт хилла шен аьлла. Шинаридийнахь телефонехула декъалвира ша Зеленский толам баккхарца, ишта барт хилла шаьшиннан вовшах а кхетта, Оьрсийчоьнца лелор йолчу политикех лаьцна дийцарш дIадахьа аьлла, яздина Порошенкос Фейсбукерчу шен пена тIехь.
"Харжамашкахь лелийна къийсарш тIаьхьадитина оха. Украинан Iедалан куьйгалла дIалучу демократин процессехь пайдаэца оха цхьа а шанс йита ца еза Путинна. Со догтешна ву, иштачу позицина керла президент тIетовр ву аьлла", - дIахьедина Порошенкос.
Оккупаци йинчу территореш тIехь Кремло оьрсийн паспорташ дIадоькъучу юкъанна, массо а хIуманна тIехь позици цхьаъ юй дIагайта деза шина а президенто аьлла, билгалдаьккхина Порошенко Петрос. Оьрсийчоьнан бахархойн бакъонаш Iалашйо боху, сурт а хIиттош, Путин тIеман агрессин керла го баккха кечлуш ву аьлла хета Украинан президентна.
Ишта Порошенкос дош делла, президентан даржехь ша тIаьххьара доккхучу кIиранашкахь Оьрсийчоьнна дуьхьал санкцеш чIагIйийр ю ша аьлла.
Шинаридийнахь Украинан Харжамийн комиссино официалехь дIакхайкхийна, Украинан керла президент тIейогIучу заманчохь Зеленский Владимир хир ву аьлла.
Харжамийн шолгIачу турехь толам баьккхира цо 73, 22 процент кхаьжнаш а кхочуш. Ткъа Порошенко Петрона кхаж теснера 24,45 процент бахархоша.