Карахь, "Хинкал – сан безам" плакат а долуш, гIур ву со кхеле
Гулам болабойла ца хилла дагестанхойн – ида дезна тIаьхьаяьллачу полицех
"Хьалхарчу Майн демонстрацеш" дага а лоцуш, политиках хьакхалуш йоцу лозунгаш а карахь , самукъанечу духаршца, "Монстраци" олу барамаш дIабаьхьира Оьрсийчуьрчу гIаланашкахь кегийрхоша Стигалкъекъа-беттан" 1-чу дийнахь.
Оцу боламах дIакхета гIоьртира Дагестанера жигархой а. Амма аьтто ца белира. 8 декъашхо лаьцна ХIинжа-ГIаларчу Монстрацехь. Царех ялханна кхело бехкедина бакъойоцчу гуламехь дакъалацар. Ткъа бараме баханчара дийцарехь, жигархой ца кхиина ур-атталла шайгара плакаташ хьаладаха а – полисхоша дIадаьхна, этIийна декъашхой йиллинчу метте, гIалин юккъе, дIа а кхачале.
Монстраци – иза театран кепехь, карнавалан битамашца, карахь политикаца бозуш боцу кхайкхамаш а болуш, нах дIасабуьйлало барам бу. Дуьххьара йоьллера ХIинжа-ГIала Оьрсийчохь кест-кеста хуьлучу Монстрацех дIакхета.
Даймехкан хьокъанна, иза тоьлла регион хиларе сатуьйсуш, "Make Dagestan Great Again" ("Ейша Дагестан юха а сийлахь") плакат карахь дерг а тIехь лелийра полисхоша эккхийна, дуьйцу акцин декъашхоша "Кавказ.Реалиига".
Стенна ца магийра?
Монстраци ХIинжа-ГIалахь яйта аьлла, Iедале чуделла дехар дисира кхочушданза, гIали чохь кхерамзалла хIоттол полисхой бац арабаха, дара жоп. Мэри кхеле елира жигархоша, цигахь аьлларг хIара дара: кхо де далале бовзийта безара мэрино шуна шен сацам, амма цо иза ца дина оцу кхаа дийна чохь!
ЖамI – 15 эзар соьманна гIуда тоьхна Монстрацин хьалханчина Сираждинова Райсатна, кхечу пхеаммо токхур ду итт-итт эзар сом гIуданаш.
"Акци хIоьттина а яц. ГIуданаш деттар – полисхойн фантази ю. Суна тIеяздина ас дина а доцу плакат, кхин стаг ву иза кечдинарг. Цхъаьнгахь дара, масала, деккъа цIена кехат, ткъа полицино хIоттийначу документо бахарехь, тIехь йоза а долуш хилла иза", дуьйцу юриста Исмаилов Марата.
Йолаялале йоьхначу Монстрацехь кхиазхой а бара, уьш плакаташ схьаделла а кхиале лаьхкира, дуьйцу кхечу жигархочо.
"Вайн ГIала" проектан жигархо ю Анохина Светлана. "Со барам болалуш, 11 сахьт даьлча, кхечира гIалин юккъе. Соьга сан йоIа дехнера плакаташ шена тIекхачор. Такси а лаьцна, яхара со, амма гуш дара, плакаташ хьаладаха йиш хир йоцийла – гобаьккхина, хIайт-аьлла хьийзара полици", элира цо "Кавказ.Реалиига".
Анохинас дийцарехь, гIенташ тIехь хевшина Iачу берашна тIе а оьхуш, хьерчийна, церан карахь гуш долу кехаташ схьа а дохуш, этIадора ницкъхоша, кегийрхой кхиина а бац шайгара йозанаш дIасагайта.
"Iедало магийна йоцу акци яра иза. Жигархоша дехар динера, амма ца магийнера дIаяхьа. Полисхоша низамехь бина шайн болх, и ду-кха сан шуьга ала", жоп делира бохийначу бараман хьокъехь "Кавказ.Реалиис" динчу хаттарна Дагестанан чоьхьарчу гIуллакхийн министраллан информацин а, юкъараллица зIе латточу а декъан куьйгалхочо Гариева Гаянас.
Барамера дIа а вигина, гIуда такха тIедоьжначех ву юрист Исмаилов Марат. Полисхоша шайн болх низам а ца талхош бойла хьажа вахара ша Монстраце, чIагIдо цо. Иза а, таIзар лайнчех волу кхин пхи стаг а дагахь ву шайна гIуданаш тохар кхеле даккха.
"Йист яккха еза Iедалхоша лелочух"
Стохка гурахь скандал яьржира ХIинжа-ГIалахь AniDag аниме-фестивал хIоттор бахьана долуш. Дуккха а кхиазхой бара оцу бараман декъахь, Монстрацехьчул а башха, цигахь а яцара гуш политикан лозунгаш. Деккъа дIа, гулам беш шайна цатарна, дуьхьалбевлира хьакамаш.
"ХIинжа-ГIаларчу аниме-фестивалехь а бара кхиазхой, цунна а дуьхьалхилира полици. Полицин амалехь ду дуьхьалхилар", - боху Анохинас.
Исмаиловна хетарехь, хIун хир ду цахааро кхерам латтабо хьаькашкахь.
"Уьш боьлла, гуламхошкахь социалан я политикан протест ган. "Суна дукха деза цицигаш" аьлла дара цхьаьнгара плакат, мичахь ю кхузахь политика? Карахь, "Хинкал – сан безам" плакат а долуш, гIур ву со сайна ечу кхеле. Со пикет я митинг еш верг хуьлий? Йист яккха еза Iедалхоша лелочух", - дуьйцу Исмаиловс.
"Кавказ.Реалиица" къамел динчу "Конфликташ тидар а, уьш юхаяхар а" Центран куьйгалхочунна Сокирянская Екатеринина гарехь, плакаташ схьадиллина хилла а доццушехь, ХIинжа-ГIалахь гIуданаш деттар Оьрсийчуьрчу ницкъхошна а, кхелашна а магийна ду.
"ГIалин дайша акци дIаяхьа дихкина хилахь, цига боьлхурш лоьцу, гIуданаш детта. Юьхьанца цхьа ГIалгIайчоь яра и таIзар цадийриг, хIинца олийла дац оцу махках а ишта. Монстраци йохийначу меттигерчу Iедална ца буьсу кхин некъ – лакхара охьадоуьйту цаьрга омра, ма магаде, олий, -чIагIдо эксперто.
"Беламе а, белхаме а ду хилларг. Берех къахета. Уьш дуьххьара нислуш бу Iедалан шогаллина кIел, полицин къизаллина кIел, …ишта ю-кх хIара пачхьалкх. Суна хетарехь, мэрино а, полицино а шайн монстраци дIаяьхьина. Берашка иза цадайтина, иза-х бацарий беккъа дIа самукъаненна гулбеллачу нехан барам бен", даггахьбалламца мах хадийра ХIинжа-ГIалахь хиллачун Анохинас.