Новости за 19.03.2020

Студентийн стипендеш тIедогIучу шеран хьалхарчу дийнахь дуьйна Оьрсийчуьрчу дахаран минимумца дIанисдан деза аьлла йолу Пачхьалкхан Думерчу депутатийн инициатива къобалйина Къилбаседа ХIирийчоьнан парламенто. ХIирийн депутаташа дийцаредина гIуллакх Москвахь, Пачхьалкхан Думехь, айдинарг ю «Нийсонан Оьрсийчоь» партин фракци – цо нийса дац аьлла студенташ биллина дай-наноша лучу ахчанна тIехь баха безаш я дешар кIел а дуьтуш, цхьаьнхьа балха лела безаш хилар. 3000 эзар сом гергга ду Оьрсийчохь стипенди. Читать дальше...

Оьрсийчохь дуьххьара стаг велла коронавирусах, Массанхьачул лахара ду алапаш кавказхойн, Шена къоладарна Прокуроро бехкевина прокурор, Оьрсийчуьрчу конституцин хийцамаш балхабо Европан Кхеташоне Урдунерчу яздархочо (Керланаш кечдеш иллюстрацина пайдаоьцу Маршо Радион архивех а, официалан сайташкарчу материалех а).

Дерриг дуьне а санна, коронавирусо сингаттаме дерзийна нохчийн къам. Ткъа шайн вежарий, йижарий доллучу лаьтта тIехула баьржина хиларе терра, лерг диллина Iа нохчий массо а континенташкарчу хаамашна. Урдунерчу Бено Анвара а, Арслан ТIахIира а довзуьйту Маршо Радион ладогIархошна Урдуно а, цигарчу нохчийн диаспоро а муха йо коронавирусна дуьхьало.

Духхьара стаг хаавелла Ставрополехь коронавирус кхетта хиларх шеко йолуш. Карантине кхачийна, лоьрийн Iуналлехь ву иза. Дукха хан йоццуш дозанал арахьара цIавеана ву и стаг, карарчу муьрехь лоьраша зуьйш бу цуьнан доьзал, цкъачунна билгалдаьлла дац иза цомгуш хилар, хаамбо шен Инстаграмехь Ставропол мехкан губернатора Владимиров Владимира. "Оха тест Новосибирске хьажийна. Ши де оьшур ду цигарчу "Вектор" центрехь диагноз къастон», - яздо губернатора. Коронавирусах мохк ларбен барамаш гIовттийна Ставрополехь. Читать дальше...

Коронавирусан COVID-19 уьнах Гуьржийчоьнан яхархо елла Испанехь. Оцу хьокъехь хаам баржийна гуьржийн премьер-министран пресс-векало Чиковани Ираклийс. 74 шо хилла зудчун. Коронавирус кхетале а яра иза цхьацца лазарша хьийзош, боху Чикованис. Гуьржийн Iедало гIодийр ду ша аьлла еллачун гергарчарна. 40-нне кхаьчна Гуьржийчохь уьно лецначу нехан терахь. Керлачу пациенташлахь ю 80 шо сов хан йолу йоккха стаг а.

Кхааридийнахь дуьйна Къилба ХIирийчуьрчу школашкара бераш дIахецна бIаьстенан мукъаденошна, хенал а хьалха. Регионера уггар а яккхийчех йолу Къилба-ХIирийчоьнан пачхьалкхан университет а дистанцехь деша йитина. Дуккха а республикехь хила беза барамаш а юкъахбаьхна. Бакъду, "Аланин" а, "Краснодар-3" тобанхошна юкъара футболан матч хилийтира, 2000 стаг вовшахтоьхна, субъектан куьйгалхочун Битаров Вячеславан кIентан ловзар а санна. "25 кила картолгаш эцна оха, - дуьйцу БуьритIерчу вахархочо Сергейс. Читать дальше...

Башкауи Адела, Урдунерчу юкъархочо, историка, яздархочо, Европан Кхеташонан Парламентан Ассамблее кехат дахьийтина Оьрсийчоьнан конституцин керлачу редакцин хьокъехь. ДIахьедарехь цо боху, Оьрсийчоьнан конституцина юкъабахка кечбинчу хийцамаша низаме йоккху къаьмнийн сегрегаци а, шайн махкашкахь дехачу кегий къаьмнашна дуьхьал дискриминаци а. Цунна гарехь, статусашка доькъуш ду къамнаш, оьрсий кхечу къаьмнел лакха а бохуш. Башкауи Адела доьху Европан Кхеташонан Парламентан Ассамблейга Венецерчу... Читать дальше...

72 шо кхаьчна зуда елла коронавирусах Москварчу № 2 йолчу инфекцин клиникехь. Пехийн лазарца кху беттан 13-чу дийнахь кхачийна яра иза лоьрашна тIе, боху пачхьалкхан шахьарахь уьнна духьалоечу оперативан штабо. Юьхьанца зудчунна дарба леладайтина доларчу клиникехь. Ткъа 14-чохь иза дехьаяьккхина инфекцин дарбан цIийне. Зудчуьнгара хьал эшош яра цуьнца хьалха дуьйна а хилла цамгарш, диабет а, деган лазар а, боху лоьраша. Шакъастийна, пехашна хIо латтош, кхабна иза № 2 клиникехь, амма аьтто ца баьлла коронавирусах тоян. Читать дальше...

Дагестанерчу Кизил-Юьртан а, гонахарчу а кIоштийн юкъарчу прокуратурехь куьйгалхочун гIовс Iийна Шахбанов Iабдулла кхеле велла, шена даржо еллачу бакъонел совваларна. Талламо дийцарехь, 2018-чу шарахь Шахбановн машена чуьра 15 эзар доллар дайна хилла. Къола дарна бехкевина цо шен коллега, прокуроран шолгIа гIовс, ша хьалхо шен машен цуьнга елла хиларна. Iедале шена къоладар дIа а ца хоуьйтуш, ша къасто сацам бина цо хилларг - таллам беш, ша-шеггара коллега полиграфах чекхваьккхина шозза. "Полиграфо гайтина жамI юьхьар а эцна... Читать дальше...

Тахана дуьйна лаккхара самонан хьал хIоттош ду Iедало Къилбаседа ХIирийчохь. Коронавирусо бохьучу кхерамца доьзна ду мехкан куьйгалхочо Битаров Вячеслава дина омра. Ерриг а ХIирийчоьнна доьхку спортан, синкъераман, нах алссам гулбешболу барамаш хIиттор. Омрица а догIуш, ун даьржинчу мехкашкара баьхкина нах декхаре бу телефонехула эпидемиологашка шаьш хилла меттиг хаийта а, шайца цамгар хааелла яцахь а, 14 денна цIахь совца а. Мегаш дац бахархойн оцу категорина цкъачунна балха я деша баха.