Краснодар: халкъах дог лазарна – психиатриян клинике?
Краснодар-махкарчу Щербински кIоштан кхело ницкъаша психиатриян клинике хьажош ву меттигера вахархо Соколов Максим. Иза бехкевина Iедалан белхахочух лаьцна доцург а дийцина, иза сийсазварна.
Ша 2013-чу шарахь волавелла Iедалера юьйлу харцонаш Iораяха, оцу бахьаница вохуьйтуш ву корта телхина нах чохь кхобучу дарбан хIусаме, аьлла хета Соколовна. Шена дуьхьал бехктакхаман дов айдар дозу ша прокуратуре а, Талламан комитете а яздинчу аьрзнашца, боху цо.
Дуьххьара 2018-чу шарахь бира Щербинскерчу кхело Соколов психиатриян клинике хьажо сацам. Иза кхетамца галваьлла аьлла йина экспертиза яра цунна бухахь. ТIаьхьо оццу кхело, шен сацам юха а баьккхина, рогIехь талла хьажийра гIуллакх.
Адвокатийн лаамца керла экспертиза Петарбухахь яккхийтира Соколовна. Кхетамца могуш вац иза аьлла дара цигарчу лоьраша дина жамI а. Кхело юха а сацам тIеийцира иза психиатриян хIусаме хьажо. Оцу сацамна а йира Соколовс аппеляци. Амма Щербинскерчу кхело хийцам боцуш битира шен къастам. Эладита даржорах болу бехктакхам тIерабаьккхира Соколовна, низамо жоп деха луш йолу хан чекх а яьлла, амма талламчаша кхеле делира цо полисхо сийсазварна айдина дов.
Соколовн адвоката Денисенко Сергейс "Кавказ.Реалиига" бинчу хаамца, кхелан сацам хилла баьлла, ткъа цкъачунна психиатриян клинике дIавиганза ву «нийсонан бIаьхо». Соколовс клиникехь мел хан йоккхур ю къастор лоьрашна тIехь ду.
Денисенкос дийцарехь, дуьххьара йинчу экспертизин кехаташ гайтина цо психиатриян лаккхара говзалла йолчу Казанерчу университетан профессорна Менделевич Владимирна. «Бух боцуш а, Iилманца ца догIуш а» ду хIетахь эксперташа гойту жамIаш, аьлла профессора, адвоката тоьшалла дарехь, амма Щербинскерчу кхело тергал а ца дина иза.
Соколовс ша кассацин арз дан воллу элира "Кавказ.Реалиига", кхелан сацам шега схьа ма кхеччи, амма кхоьру ша иза чудала цакхиарна – психиатриян хIусаме дIавига тарло тахана-кхана.
Шина а экспертизано ша шизофрения йолуш ву аьлла, амма цара юьйцу симптомаш шеца яц, боху жигархочо: «Цара ма-баххара, кхетам галбаьлла велахь а, суна суо наханна кхераме хиллал галваьлла ву аьлла ца хета, я сайна гонах Iедало лелочух ца кхеташ а вац».
Соколовс дийцарехь, цо хьалха дуккха а аьрзнаш кхехьийтина пачхьалкхан урхаллашка шена харц хетачу Iедалан хьукматех, белхахойх лаьцна. Амма ца хаьа цунна ша билггал хьанна, муьлхачу хьаькамна новкъарло йина.
"Арахь диллина лаьтташ канализацин ор гича, ас иза дIакъовлахьара баьхна. Масала, урамехь буса латош серло ца хилча, дехна серло тасар. Ас дуккха а даьхна Iедалера гIалаташ Iора, сайн муьлха арз хьаькамашна ца тайна ца хаьа. Ас цхьаъ сийсазвина боху, асйса яздинчу эзарнаш кехаташлахь суна ца хаьа муьлхарниг ца тайна. Ца кхета со сайгара хIун зулам даьлла. Гуш ду, пресса ешча, Краснодар-махкахь Iедалера юьйлу харцонаш елхорна бехктакхаме ийзийнарш дуккха а буйла», - дийцира Соколовс.
"Медиазона" портало бинчу хаамца, Соколов жоьпе озийна цо талламчех «педофил» аларна а, «ша жима йоI ю, бохуш, интернетехула бераш Iеха а деш, цаьрца эвхьаздлонаш лелайо» аьлла и талламча сийсазварна а.