Халкъ а, Iедал а вовшашна муьтIахь хиларна Малхбузен питанаш эшон ницкъ кхочу шайн, боху Кадыровс
Нохчийчуьрчу Iедалхоша диллина, цIена, тешаме къамел до бахархошца, цундела Малхбузен питанашна дуьхьало латтало аьлла, яздина нохчийн куьйгалхочо Кадыров Рамзана "ВКонтактерчу" шен пена тIехь.
"ТIаьххьарчу заманчохь Нохчийчоьнан куьйгаллийна а, нохчийн къомана а дуьхьал кеп-кепарчу социалан машанашкахь йолийна йоккха информацин кампани ю. Малхбузерчу институташа эвсара йоцучу кепашца, амма тIетаьIIина хьийза бахархой меттахабаха, Iедал а, халкъ а къасто гIерташ. Халкъ а, Iедал а цхьа барт болуш хиларна, тхан аьтто болу муьлхха а провокаци юхатоха. Оцу юкъанна, даггара, бакъ диалог бахархошна а Iедалхошна а юкъахь дIатасадаларна, адамаша шайн позици йовзуьйту, Iедалхойн ледарлонех а, кхиамех а шайна хетарг схьа а хоуьйтуш",- яздина Кадыровс.
Иштта, цо бахарехь, регионехь машар лаьтта, Нохчийчоь кеп-кепарчу сферашкахь кхуьуш хиларна.
"Цо аьтто боккху тхан гучудевлла къхачамбацарш оцу сохьта дIанисдан. Республикехь жигара кхуьуш ду дешар а, Iилма а, экономика а, шен-шен рогIехь белхазаллин хеттарш а ду луьстуш, оха бечу балхо дика жамIаш ло, нахана иза гуш ду, шайгара гIо а латтадо цара тхуна. ХIокху информацин тIамехь тхан коьрта герз - бакъдерг ду", - аьлла, билгалдаьккхина Кадыров Рамзана.
Дахначу кхаарин дийнахь дийца даьккхира Нохчийчуьрчу хаамийн гIирсаша, республикан куьйгалхочунна Кадыров Рамзанна дуьхьал кечдеш питанаш ду Малхбузерчу цхьана пачхьалкхехь аьлла. Оцу гIуллакхана леринчу къайлахчу лабараторешкахь цуьнан маска ю яйтина аьлла бара "Чечня Сегодня" агенталло бина и хаам.
Цуьнан информацица, Кадыровн сибатехь йина маска гойтуш видео яьржийна социалан машанашкахь. Къаьстира, и хаам eldit_net инстаграмерчу аккаунтера зорбан гIирсаша схьаэцна хилар. Видеона буха яздина ду, "Шолхаг" ("Двойник") аьллачу кодан цIарца Европехь Кадыров Рамзанна дуьхьал кечъеш операци ю аьлла.
Маска йина йолуш лаьтта, "цуьнах пайда а оьцуш, провокацеш лелон нах бу лоьхуш", яздо REGNUM агенталло. Билгалдаккха догIу, яьржина информаци бакъйеш, официалан гIирсашкахь тоьшаллаш цахилар.