Дәүләт хезмәткәрләре өчен Кораллы көчләрдә хезмәт итүне мәҗбүри итәргә тәкъдим иттеләр

Дәүләт Думасы спикеры Вячеслав Володин дәүләт хезмәтендә, суд системасында, прокуратура органнарында вазифа биләү һәм Дәүләт Думасына депутатлар сайлауда катнашу өчен хәрби-учет белгечлеге булуны һәм Кораллы Көчләрдә хезмәт итүне мәҗбүри шарт итеп куярга тәкъдим итте. Бу хакта РИА новости хәбәр итә.

«Безгә моны тикшерергә һәм мөмкин кадәр тизрәк эшләргә кирәк, киләчәктә барлык социаль лифтлар, барлык кадр карарлары да Кораллы көчләрдә хезмәт итүдән чыгып кабул ителергә тиеш. Дәүләт хезмәтендә, суд системасында, прокуратура органнарында вазифа биләү, Дәүләт Думасына депутатлар сайлауда катнашу өчен – мәҗбүри тәртиптә хәрби-учет белгечлеге булу һәм Кораллы Көчләрдә хезмәт итү кирәк», - диде ул сишәмбе көнне узган пленар утырышта.

Парламентарий сүзләренчә, шул рәвешле «кадрлар лифтлары» системасын булдырырга мөмкин булачак.

«Һәр кеше кайда гына эшләсә дә, үз илен якларга тиеш. Иң мөһиме, ул моңа әзер», - дип өстәде Володин.