Казанда җиңел машина өч баласы белән юлны аркылы чыгып барган хатын-кызны бәрдергән
Казанның Совет районында алтынчы модельле «Жигули» йөртүчесе өч баласы белән юлдан чыгып барган хатын-кызны бәрдергән, сабыйларның берсе коляскада булган.
Агентлык мәгълүматлары буенча, юл-транспорт һәлакәте Ломжа урамындагы 5а йорт янындагы светофорсыз җәяүлеләр кичүендә булган.
«Татар-информ»га мәгълүм булганча, һәлакәт урыныннан балаларны хатын-кыз белән бергә Республика балалар клиник хастаханәсенә алып киткәннәр. Агентлык мәгълүматлары буенча, балаларга – 6, 4 һәм 2 яшь.
«Беренчел мәгълүмат буенча, балаларның барысының да баш мие селкенгән. Аларның анасы да имгәнгән, җәрәхәтләрнең никадәр җитди булуын табиблар ачыклый», - дип хәбәр иттеләр агентлыкка Казанның Сәламәтлек саклау идарәсендә.