Новости за 01.04.2023

Татарстан урман хуҗалыгы министры урынбасары Рәис Гомәров Баулы һәм Сарман муниципаль районнарына эшлекле сәфәр кылды.

27 марттан 2 апрельгә кадәр Россия Федерациясе Сәламәтлек саклау министрлыгы зарарлы гадәтләрдән баш тарту атналыгын игълан итте. Шул уңайдан Чистай районы Үзәк хастаханәсенең поликлиникасы хезмәткәрләре һәм волонтер-медиклар «Тәмәкене конфетка алмаштыру» акциясен үткәрде.

Апас районы башлыгы Айрат Җиһаншин махсус хәрби операциядә катнашучылар белән очрашты. Алар кыска вакытлы ялга кайтты.

Бүген «Ак Барс» - «Авангард» плей-офф сериясенең беренче уены Казан командасы җиңүе белән тәмамланды. Матч исәбе – 3:2.

Алабуганың «Мир» җәмгыятенә 200 баш токымлы таналар кайтты. Джерси токымлы таналарны Венгрия аркылы Даниядән алып кайтканнар. 

Якшәмбе, 2 апрельдә, Татарстанда һава температурасы +15 градуска кадәр күтәрелә, томан көтелә. Бу турыда Татарстан Гидрометеорология һәм әйләнә-тирә мохитне күзәтү үзәге матбугат хезмәте хәбәр итә.

Россия һәм Беларусь халыклары дәүләт һәм төбәк дәрәҗәсендә тирән мәдәни, сәүдә һәм икътисади элемтәләрне үстерү аша тугандаш мөнәсәбәтләрне ныгытуны дәвам итә. Бу бигрәк тә бүген, ике ил тышкы басымга дучар булган вакытта мөһим. Бу хакта Беларусь һәм Россия халыкларының Бердәмлек көненә багышланган тантаналы чарада Татарстан Дәүләт Советы җитәкчесе Фәрит Мөхәммәтшин сөйләде.

8 апрельдә Россия башкаласында «Мәскәү-Татарстан» VIII халыкара форумы була. Аны Татарстанның Россиядәге Тулы вәкаләтле вәкиллеге оештыра.

Татарстанда хәрби комиссариатлар беренче тапкыр хәрби исәпкә алу турындагы мәгълүматны цифрлы рәвештә алды. Бу хакта «Татар-информ»га Татарстан Республикасы хәрби комиссары, генерал-майор Сергей Погодин хәбәр итте.

«Россия - Ислам дөньясы: KazanForum» Халыкара икътисади форумын уздыруда ярдәм итү өчен 838 волонтер әзерләнәчәк.

5 апрель көнне Роберт Миңнуллинның «Мәхәббәтле көзләрем» дип исемләнгән яңа китабын тәкъдим итү кичәсе узачак. Чара «Китап club» рестораны (Бауман ур., 19) 15.00 сәгатьтә үтәчәк. Китапта Роберт Миңнуллинның яңа шигырьләре һәм элегрәк язылган сайланма әсәрләре урын алган. Бу хакта ТР Язучылар берлеге матбугат хезмәте хәбәр итә.

Лаеш районы башлыгы Илдус Зарипов ялга кайткан мобилизацияләнгән ир-атлар белән очрашты. Ул һәр хәрбине сәламләде һәм Ватанны саклаулары өчен рәхмәт белдерде. Очрашу табын артында узды.

Россия сәясәтчесе Олег Морозов 8 апрельдә «Мәскәү - Татарстан күпере» Мәскәү яшьләр форумы спикеры була.

Мәскәү - Казан М12 юлында алга таба пилотсыз йөк машиналарын җибәрергә планлаштыралар. Якын арада проектны «Нева» М11 юлында сыный башлыйлар, ә аннары тагын берничә федераль трассага җибәрергә уйлыйлар. Бу хакта ТАСС Россия Транспорт министрлыгы башлыгы Виталий Савельевка сылтама белән хәбәр итә.

Ульяновск өлкә татар милли мәдәни автономиясенең президиумы әгъзалары Татар мәдәният үзәгенә чираттагы утырышка җыелды. Анда март аенда башкарылган эшләргә йомгак ясалды һәм апрель аенда узачак чараларның планы расланды. Бу хакта Ульяновскиның «Өмет» газетасы телеграм-каналы хәбәр итә.

Татарстанның күп районнарында кыр эшләре башланды. Бу хакта Татарстан Республикасы Хөкүмәте Йортында узган киңәшмәдә Татарстан авыл хуҗалыгы һәм азык-төлек министрының беренче урынбасары Наил Залаков хәбәр итте.

Татарстанда катлаулы тормыш вазгыятендәге балалар өчен «Игелекле футбол» IV республика хәйрия турниры тәмамланды. Анда Кукмара районы командасы җиңү яулады. Икенче урынны Алексеевск районыннан яшь спортчылар, өченче урынны Левченко исемендәге Казан мәктәбе укучылары алды.

Татарстанда узган тәүлектә тагын 121 кеше Covid-19 йоктырган. Бу алдагы көнгә караганда 8 очракка кимрәк.

Апрельнең беренче көненнән Татарстанда санитар-экология икеайлыгы башлана. Ул чүплекләрне бетерү һәм кыштан соң территорияләрне төзекләндерү максатыннан оештырыла. Бу хакта Татарстан Министрлар Кабинетында узган киңәшмәдә ТР экология һәм табигый ресурслар министры Александр Шадриков хәбәр итте.

Татарстанда 1138000 квадрат метр торак файдалануга тапшырылган, бу 2023 елга планның 37 процентын тәшкил итә. Татарстан төзелеш, архитектура һәм торак-коммуналь хуҗалык министрының беренче урынбасары Алексей Фролов Хөкүмәт Йортында узган киңәшмәдә шул хакта әйтте.

Казанда республика муниципаль берәмлекләре арасында «Татарстанның мәдәни башкаласы» конкурсы старт алды. Мәдәният көннәре шәһәрнең 13 мәйданчыгында узачак. Лениногорск районы беренче булып бәйгедә катнашты.

Апрельдә Татарстанда, шулай ук Казанда уртача һава температурасы климат нормасыннан бер градуска югары булачак. Бу турыда Татарстан Гидрометеорология һәм әйләнә-тирә мохитне күзәтү үзәге матбугат хезмәте хәбәр итә.

1 апрельдән Россиядә социаль пенсияләр күләме 3,3 процентка артты. Индексация 2022 елның июнендә уздырылганга өстәмә булачак, ул вакытта түләүләр 10 процентка арткан иде.

1 апрельдән Россиядә язгы чакырылыш кампаниясе башланды. Аны үткәрү турындагы карарны 30 мартта Россия Президенты Владимир Путин имзалады.

«Дәүләт хезмәтләре» порталыннан хисап язмасын хәзер күпфункцияле үзәккә шәхсән барганда гына алырга мөмкин. Бу соңгы вакытта шәхси кабинетларны җимерү очраклары ешаюы белән бәйле.